ലോക സംഗീതവേദിയിലെ പരമോന്നത പുരസ്കാരമായ ഗ്രാമി അവാർഡ് നിശയിൽ കലയും സംഗീതവും മാത്രമല്ല, ഇന്ത്യൻ ഫാഷനും തരംഗമാകുന്നു. ഫെബ്രുവരി ഒന്നിന് ലോസ് ഏഞ്ചൽസിലെ ഡോൾബി തിയേറ്ററിൽ നടന്ന 68-ാമത് ഗ്രാമി അവാർഡ് വേദിയിലാണ് ഇന്ത്യൻ കരകൗശല വിദ്യയുടെയും പാരമ്പര്യത്തിന്റെയും പ്രൗഢി വിളിച്ചോതുന്ന ദൃശ്യങ്ങൾ അരങ്ങേറിയത്. പാശ്ചാത്യ താരങ്ങൾക്കിടയിൽ ഇന്ത്യൻ വസ്ത്രധാരണവും ആഭരണങ്ങളും അണിഞ്ഞ് എത്തിയ താരങ്ങൾ റെഡ് കാർപെറ്റിൽ വിസ്മയമായി.
പ്രശസ്ത ഫാഷൻ ഡിസൈനർ സബ്യസാചിയുടെ കലാവൈഭവമാണ് ഇത്തവണ റെഡ് കാർപെറ്റിലെ പ്രധാന ആകർഷണം. അമേരിക്കൻ ഗായിക കെൽസി ബല്ലേരിനി സബ്യസാചിയുടെ ഫൈൻ ജ്വല്ലറി കളക്ഷനിൽ നിന്നുള്ള കമ്മലുകളും മോതിരവുമാണ് അണിഞ്ഞത്. മിനിമലിസ്റ്റിക് ശൈലിയിലുള്ള ഈ ആഭരണങ്ങൾ ആഗോള തലത്തിൽ ഭാരതീയ ബ്രാൻഡുകൾക്ക് ലഭിക്കുന്ന സ്വീകാര്യതയുടെ തെളിവായി. ഗായിക രാജ കുമാരി സബ്യസാചി ഡിസൈൻ ചെയ്ത ആനിമൽ പ്രിന്റ് സാരി അണിഞ്ഞാണ് എത്തിയത്. സാരിക്കൊപ്പം കറുത്ത പൊട്ടും (Bindi) സൺഗ്ലാസും അണിഞ്ഞെത്തിയ താരം ഇന്ത്യൻ പാരമ്പര്യവും ആധുനികതയും ഒത്തുചേരുന്ന മനോഹരമായ കാഴ്ചയാണ് സമ്മാനിച്ചത്.
ലോക ശ്രദ്ധയാകർഷിച്ച മറ്റൊരു താരം ഇൻഡോ-ശ്രീലങ്കൻ വംശജയായ ഗായിക ലാറ രാജാണ്. പ്രശസ്ത ഗേൾ ഗ്രൂപ്പായ ‘കാറ്റ്സി’ അംഗങ്ങൾക്കൊപ്പം വെള്ള നിറത്തിലുള്ള മിന്നുന്ന വസ്ത്രങ്ങൾക്കൊപ്പം ലാറ അണിഞ്ഞത് ‘ഓം’ (Om) നെക്ലേസും നെറ്റിചുട്ടിയുമയാണ് (Maang Tikka). ലോകത്തെ ഏറ്റവും വലിയ സംഗീത വേദിയിൽ സ്വന്തം സാംസ്കാരിക വേരുകൾ അഭിമാനത്തോടെ പ്രദർശിപ്പിച്ച ലാറയുടെ ലുക്ക് സോഷ്യൽ മീഡിയയിൽ വൈറലായിക്കഴിഞ്ഞു.
Discussion about this post