ചുണ്ടുകൾക്ക് അഴക് നൽകാൻ ഉപയോഗിക്കുന്ന ലിപ്സ്റ്റിക്കുകൾ അത്ര നിരുപദ്രവകാരിയല്ലെന്ന് ആരോഗ്യ വിദഗ്ധരുടെ മുന്നറിയിപ്പ്. സൗന്ദര്യത്തിന് നൽകുന്ന പ്രാധാന്യം ആരോഗ്യത്തിന് നൽകാത്തത് ഭാവിയിൽ ഗുരുതരമായ പ്രത്യാഘാതങ്ങൾ ഉണ്ടാക്കുമെന്ന് പ്രമുഖ പോഷകാഹാര വിദഗ്ധ അഞ്ജലി മുഖർജി ചൂണ്ടിക്കാട്ടുന്നു. ദിവസേന ഉപയോഗിക്കുന്ന ലിപ്സ്റ്റിക്കുകളിൽ അടങ്ങിയിരിക്കുന്ന ഹെവി മെറ്റലുകൾ (Heavy Metals) ശരീരത്തിനുള്ളിലെത്തിയാൽ കോശങ്ങളുടെ ഘടനയെപ്പോലും മാറ്റിമറിക്കാൻ ശേഷിയുള്ളതാണെന്ന് അവർ തന്റെ ഇൻസ്റ്റാഗ്രാം പോസ്റ്റിലൂടെ വ്യക്തമാക്കി.
ലിപ്സ്റ്റിക്കുകളിൽ മനഃപൂർവ്വം ചേർക്കുന്നതല്ലെങ്കിലും, പിഗ്മെന്റുകൾ നിർമ്മിക്കുന്നതിനും അവ ശേഖരിക്കുന്നതിനുമുള്ള പ്രക്രിയയ്ക്കിടെ ലെഡ് (Lead), മെർക്കുറി (Mercury), ആഴ്സനിക് (Arsenic), നിക്കൽ (Nickel) തുടങ്ങിയ ലോഹങ്ങളുടെ അംശം ഉൽപ്പന്നങ്ങളിൽ കലരാൻ സാധ്യതയുണ്ട്. ഇവ വളരെ ചെറിയ അളവിലാണെങ്കിൽ പോലും ദിവസേനയുള്ള ഉപയോഗം മൂലം ശരീരത്തിൽ ഇവ അടിഞ്ഞുകൂടുന്നു (Bioaccumulation). ഇത്തരത്തിൽ ഉള്ളിലെത്തുന്ന ലോഹങ്ങൾ ഫ്രീ റാഡിക്കലുകളെ ഉത്പാദിപ്പിക്കുകയും ഇത് ഓക്സിഡേറ്റീവ് സ്ട്രെസ്സിന് (Oxidative Stress) കാരണമാവുകയും ചെയ്യുന്നു. ഇത് കോശ സ്തരങ്ങളെയും ഡിഎൻഎയുടെ (DNA) സ്വാഭാവികതയെയും നശിപ്പിക്കുമെന്നും മെറ്റബോളിക് പ്രവർത്തനങ്ങളെ തടസ്സപ്പെടുത്തുമെന്നും വിദഗ്ധർ മുന്നറിയിപ്പ് നൽകുന്നു.
മിക്ക രാജ്യങ്ങളിലും ഈ ലോഹങ്ങളുടെ അളവിന് നിയന്ത്രണങ്ങളുണ്ടെങ്കിലും, വർഷങ്ങളോളം തുടർച്ചയായി ഉപയോഗിക്കുമ്പോൾ ഇവ പുറന്തള്ളാൻ ശരീരത്തിന് കഴിയാതെ വരുന്നത് മാരകമായ ആരോഗ്യപ്രശ്നങ്ങൾക്ക് വഴിവെക്കും. ലിപ്സ്റ്റിക്കുകൾ വാങ്ങുമ്പോൾ ലേബലുകൾ ശ്രദ്ധാപൂർവ്വം വായിക്കണമെന്ന് അഞ്ജലി മുഖർജി ഉപദേശിക്കുന്നു. ‘നാച്ചുറൽ’ (Natural), ‘ഓർഗാനിക്’ (Organic), ‘ലെഡ് ഫ്രീ’ (Lead-free), ‘ടോക്സിൻ ഫ്രീ’ (Toxin-free) എന്നിങ്ങനെയുള്ള മുദ്രകളുള്ള ഉൽപ്പന്നങ്ങൾ തിരഞ്ഞെടുക്കുന്നത് ആരോഗ്യത്തിന് ഗുണകരമാകും. എന്നാൽ ‘നാച്ചുറൽ’ എന്ന് എഴുതിയിരിക്കുന്ന എല്ലാ ഉൽപ്പന്നങ്ങളും പൂർണ്ണമായും സുരക്ഷിതമാകണമെന്നില്ലെന്നും, വിശ്വസനീയമായ ബ്രാൻഡുകളും ചേരുവകളും മാത്രം തിരഞ്ഞെടുക്കണമെന്നും ഡെർമറ്റോളജിസ്റ്റുകളും ഓർമ്മിപ്പിക്കുന്നു.
