ഐക്യരാഷ്ട്രസഭ രക്ഷാസമിതിയിൽ ഇന്ത്യയ്ക്ക് സ്ഥിരാംഗത്വം നൽകണമെന്ന ആവശ്യത്തിന് പൂർണ്ണ പിന്തുണ പ്രഖ്യാപിച്ച് റഷ്യൻ വിദേശകാര്യ മന്ത്രി സെർജി ലാവ്‌റോവ്. ഐക്യരാഷ്ട്രസഭ പൊതുസഭയെ അഭിസംബോധന ചെയ്ത് സംസാരിക്കവെയാണ് ഏഷ്യ, ആഫ്രിക്ക, ലാറ്റിൻ അമേരിക്കൻ രാജ്യങ്ങൾക്ക് രക്ഷാസമിതിയിൽ കൂടുതൽ പ്രാതിനിധ്യം വേണമെന്ന് ആവശ്യപ്പെട്ടുകൊണ്ട് ലാവ്‌റോവ് ഇന്ത്യയുടെയും ബ്രസീലിന്റെയും അംഗത്വത്തെ പിന്തുണച്ചത്.
എന്നാൽ, രക്ഷാസമിതിയിൽ പാശ്ചാത്യ രാജ്യങ്ങൾക്ക് കൂടുതൽ സീറ്റുകൾ നൽകുന്നതിനെ റഷ്യ എതിർത്തു. സൈനികവൽക്കരണത്തിലേക്കും സൈനിക നയങ്ങളിലേക്കും നീങ്ങുന്ന ജർമ്മനി, ജപ്പാൻ തുടങ്ങിയ പാശ്ചാത്യ രാജ്യങ്ങൾക്ക് യാതൊരു കാരണവശാലും അധിക സീറ്റുകൾ നൽകരുതെന്ന് അദ്ദേഹം വ്യക്തമാക്കി. നിലവിലെ സ്ഥിരാംഗങ്ങളായ ചൈന, ഫ്രാൻസ്, റഷ്യ, യുകെ, യുഎസ് എന്നീ അഞ്ച് രാജ്യങ്ങളുടെ സവിശേഷാധികാരങ്ങൾ നിലനിർത്തിക്കൊണ്ട് മാത്രമേ രക്ഷാസമിതി പരിഷ്കരണങ്ങൾ നടപ്പിലാക്കാവൂ എന്നും റഷ്യ ഊന്നിപ്പറഞ്ഞു. ഗ്ലോബൽ സൗത്ത് രാജ്യങ്ങൾക്കും ആഫ്രിക്കൻ ഭൂഖണ്ഡത്തിനും ശക്തമായ പ്രാതിനിധ്യം ഉറപ്പാക്കണമെന്നും റഷ്യ ആവശ്യപ്പെട്ടു.
ഇതിനുമുമ്പ് ന്യൂഡൽഹി പ്രഖ്യാപനത്തിലൂടെയും ബിആർഐസിഎസ് രാജ്യങ്ങൾഇന്ത്യയ്ക്കും ബ്രസീലിനും ഐക്യരാഷ്ട്രസഭയിൽ വലിയ പങ്കാളിത്തം നൽകണമെന്ന നിലപാട് വ്യക്തമാക്കിയിരുന്നു. നിലവിലെ ആഗോള രാഷ്ട്രീയ, സാമ്പത്തിക യാഥാർത്ഥ്യങ്ങൾ ഉൾക്കൊണ്ട് രക്ഷാസമിതി പുനഃസംഘടിപ്പിക്കണമെന്ന ആവശ്യം പൊതുസഭയിൽ ശക്തമായി ഉയർന്നു. മറ്റ് നിരവധി രാജ്യങ്ങളും ഇന്ത്യയുടെ സ്ഥിരാംഗത്വത്തെ പിന്തുണച്ച് രംഗത്തെത്തി. ആഗോളതലത്തിൽ ഇന്ത്യ വഹിക്കുന്ന നിർണ്ണായക പങ്കിനെ പ്രകീർത്തിച്ചുകൊണ്ട് മൗറീഷ്യസ് വിദേശകാര്യ മന്ത്രി ധനഞ്ജയ് രാംഫൂൾ ഇന്ത്യയ്ക്ക് പിന്തുണ അറിയിച്ചു.
പോർച്ചുഗൽ പ്രധാനമന്ത്രി ലൂയിസ് മോണ്ടെനെഗ്രോയും ആഫ്രിക്ക, ബ്രസീൽ, ഇന്ത്യ എന്നീ രാജ്യങ്ങൾക്ക് സ്ഥിരാംഗത്വം ഉറപ്പാക്കുന്ന ഘടനാപരമായ മാറ്റങ്ങൾ വേണമെന്ന് അഭിപ്രായപ്പെട്ടു. ജി4 കൂട്ടായ്മയിലെ ഇന്ത്യ ഉൾപ്പെടെയുള്ള രാജ്യങ്ങൾക്ക് പിന്തുണയുമായി മാർഷൽ ദ്വീപുകളുടെ പ്രസിഡന്റ് ഹിൽഡ ഹൈനും സംസാരിച്ചു. അന്താരാഷ്ട്ര സമൂഹത്തിന്റെ ഇന്നത്തെ യാഥാർത്ഥ്യങ്ങൾ പ്രതിഫലിപ്പിക്കുന്ന രീതിയിൽ സുരക്ഷാസമിതി അടിയന്തരമായി മാറ്റിയെഴുതണമെന്ന് ജപ്പാൻ പ്രധാനമന്ത്രി സനേ തകൈച്ചിയും ആവശ്യപ്പെട്ടു
