കണ്ണൂർ: കെഎസ്യു പ്രവർത്തകരുടെ പ്രതിഷേധത്തിനിടെ പരിക്കേറ്റ് ആശുപത്രിയിൽ കഴിയുന്ന ആരോഗ്യമന്ത്രി വീണാ ജോർജിനൊപ്പം സെൽഫിയെടുത്തത് വിവാദമായ പശ്ചാത്തലത്തിൽ വിശദീകരണവുമായി നഴ്സ് സ്മിത പി.സി രംഗത്ത്. മന്ത്രിയുടെ മാനസിക വിഷമം മാറ്റാനാണ് തങ്ങൾ ഫോട്ടോ എടുത്തതെന്നും അതിനെ ഇത്ര ക്രൂരമായി വ്യാഖ്യാനിക്കരുതെന്നും സ്മിത ഫേസ്ബുക്കിൽ കുറിച്ചു. ഐസിയുവിലെ നഴ്സുമാർ മന്ത്രിക്കൊപ്പം നിൽക്കുന്ന ചിത്രം സോഷ്യൽ മീഡിയയിൽ വ്യാപകമായി വിമർശിക്കപ്പെട്ടതോടെയാണ് നഴ്സിന്റെ മറുപടി.
പരിയാരം മെഡിക്കൽ കോളേജിൽ പ്രവേശിപ്പിച്ച മന്ത്രിക്ക് കടുത്ത കഴുത്തുവേദനയും ഉയർന്ന രക്തസമ്മർദ്ദവും ഉണ്ടായിരുന്നു. രാത്രി ഭക്ഷണം കഴിച്ചില്ലെന്നും വെറും രണ്ട് മണിക്കൂർ മാത്രമാണ് ഉറങ്ങിയതെന്നും സ്മിത പറയുന്നു. “മന്ത്രി മാനസികമായി ഏറെ വിഷമം അനുഭവിക്കുന്നു എന്ന് ഞങ്ങൾക്ക് മനസ്സിലായി. രാവിലെ നിർബന്ധിച്ചാണ് ഒരു ഇഡലി കഴിപ്പിച്ചത്. ആഹാരത്തിന് ശേഷം കിടത്തുന്നതിന് മുൻപാണ് ഞങ്ങൾ സിസ്റ്റേഴ്സ് ഒരു ഫോട്ടോ എടുത്തോട്ടെ എന്ന് ചോദിച്ചത്. ഞങ്ങളുണ്ടാകുമെന്ന് ഉറപ്പ് നൽകി അവരെ ചേർത്തുപിടിച്ച് എടുത്തതാണത്,” സ്മിത വ്യക്തമാക്കി.
