ഭോപ്പാൽ : ആദിത്യ ധർ സംവിധാനം ചെയ്ത ‘ധുരന്ധർ 2’ ഇന്ത്യൻ സിനിമാ ചരിത്രത്തിലെ തന്നെ ഏറ്റവും വലിയ വിജയങ്ങളിലൊന്നായി മാറിക്കൊണ്ടിരിക്കുകയാണ്. ചിത്രത്തിന്റെ വിജയകുതിപ്പ് തുടരുന്ന വേളയിൽ മഹാകാലേശ്വരന് നന്ദി അറിയിക്കാനായി ഉജ്ജയിനിലെത്തി നായികയായ സാറ അർജുൻ. ശനിയാഴ്ച മഹാകാലേശ്വർ ക്ഷേത്രത്തിൽ ദർശനം നടത്തിയ സാറ ഏറെ പ്രസിദ്ധമായ ഭസ്മ ആരതിയിലും പങ്കെടുത്തു.
ഒരു പ്രത്യേക ദൈവവിളിയാണ് തന്നെ ഇങ്ങോട്ട് എത്തിച്ചതെന്ന് സാറ അർജുൻ ദർശനത്തിന് ശേഷം മാധ്യമങ്ങളോട് സംസാരിക്കവെ അറിയിച്ചു. “എനിക്ക് വാക്കുകളില്ല. എവിടെ നിന്നോ ഉണ്ടായ ഒരു ദൈവിക വിളി പോലെയാണ് ഞാൻ ഇവിടെ എത്തിയത്. ഈ ലോകത്ത് ഇതിലും വലിയൊരു അനുഭവം വേറെയില്ല. ഞാൻ അതീവ സന്തോഷവതിയാണ്,” എന്ന് സാറ വ്യക്തമാക്കി. മാതാപിതാക്കളും താരത്തോടൊപ്പം ഉണ്ടായിരുന്നു. ഭസ്മ ആരതിക്ക് ശേഷമുള്ള അനുഭവം വിവരിക്കാൻ വാക്കുകൾ ലഭിക്കുന്നില്ലെന്നും താൻ ഇപ്പോഴും ആ ഒരു ആത്മീയ അനുഭൂതിയിലാണെന്നും സാറ വ്യക്തമാക്കി.
ആഗോളതലത്തിൽ 1,650 കോടിയിലധികം രൂപയാണ് ‘ധുരന്ധർ 2’ ഇതുവരെ നേടിയത്. ചിത്രത്തിൽ രൺവീർ സിംഗിന്റെ നായികയായി ‘യലീന’ എന്ന കഥാപാത്രത്തെയാണ് സാറ അവതരിപ്പിക്കുന്നത്. ബാലതാരമായി വന്ന് ഇപ്പോൾ ഇന്ത്യൻ സിനിമയിലെ മുൻനിര നായികമാരുടെ പട്ടികയിലേക്ക് ഉയരുന്ന സാറയുടെ ഈ ആത്മീയ യാത്ര ആരാധകർക്കിടയിലും വലിയ ചർച്ചയായിട്ടുണ്ട്. സോഷ്യൽ മീഡിയയിൽ താരത്തിന്റെ ക്ഷേത്ര ദർശനത്തിന്റെ വീഡിയോകൾ ഇതിനോടകം വൈറലായിക്കഴിഞ്ഞു.
