ബോളിവുഡ് സുന്ദരി ആലിയ ഭട്ട് എവിടെ പോയാലും അവിടെ ഒരു വിസ്മയം പ്രതീക്ഷിക്കുന്നവരാണ് ആരാധകർ. എന്നാൽ കഴിഞ്ഞ ദിവസം നടന്ന ‘ചേതക് സ്ക്രീൻ അവാർഡ്’ വേദിയിൽ ആലിയയ്ക്ക് കാര്യങ്ങൾ അത്ര ശുഭകരമായിരുന്നില്ല. പ്രശസ്ത സ്റ്റാൻഡ് അപ്പ് കൊമേഡിയൻ സാക്കിർ ഖാനൊപ്പം ഷോ അവതരിപ്പിക്കാനെത്തിയ ആലിയയുടെ പ്രകടനം സോഷ്യൽ മീഡിയയിൽ വലിയ പരിഹാസങ്ങൾക്കും വിമർശനങ്ങൾക്കും വഴിതെളിച്ചിരിക്കുകയാണ്.
ജനനി എന്ന ഇൻസ്റ്റാഗ്രാം ഉപയോക്താവ് പങ്കുവെച്ച വീഡിയോയാണ് വിവാദങ്ങൾക്ക് തിരികൊളുത്തിയത്. അവാർഡ് ഷോകളിലെ ആലിയയുടെ അവതരണം അസ്വാഭാവികവും വിരസവുമാണെന്നായിരുന്നു വീഡിയോയിലെ പ്രധാന വിമർശനം. പ്രത്യേകിച്ച്, സംവിധായകൻ സഞ്ജയ് ലീല ബൻസാലിയെക്കുറിച്ച് ആലിയ പറഞ്ഞ ഒരു തമാശ പ്രേക്ഷകർക്കിടയിൽ ഒട്ടും ഏശിയില്ല. “2019-ൽ ഞാൻ ഒരു ബൻസാലി ചിത്രത്തിൽ അഭിനയിക്കുകയായിരുന്നു, 2026-ലും ഞാൻ ഒരു ബൻസാലി ചിത്രത്തിൽ തന്നെയാണ് അഭിനയിക്കുന്നത്!”
ബൻസാലി ചിത്രങ്ങളുടെ നീണ്ട ചിത്രീകരണ കാലയളവിനെ പരിഹസിച്ച് ആലിയ പറഞ്ഞ ഈ ഡയലോഗ് ചിരിക്ക് പകരം പ്രേക്ഷകർക്ക് നൽകിയത് വല്ലാത്തൊരു ജാള്യതയായിരുന്നുവെന്ന് സോഷ്യൽ മീഡിയ പറയുന്നു. അഭിനേതാക്കൾ സ്ക്രീനിൽ മികച്ചവരായിരിക്കാം, എന്നാൽ ഒരു ലൈവ് സ്റ്റേജ് കൈകാര്യം ചെയ്യുക എന്നത് തികച്ചും വ്യത്യസ്തമായ കലയാണെന്ന് വീഡിയോ പങ്കുവെച്ച ജനനി കുറിച്ചു. ഈ പോസ്റ്റിന് താഴെ പ്രശസ്ത ടെലിവിഷൻ അവതാരക മിനി മാത്തൂർ കുറിച്ച കമന്റാണ് ഇപ്പോൾ ചർച്ചാവിഷയം.
“നന്ദി. ആരോ ഒരാൾ ഒടുവിൽ ഇത് തുറന്നു പറഞ്ഞല്ലോ!” എന്നായിരുന്നു മിനിയുടെ മറുപടി. ദശാബ്ദങ്ങളായി ഇന്ത്യയിലെ മികച്ച ഷോകൾ അവതരിപ്പിക്കുന്ന മിനി മാത്തൂറിനെപ്പോലെ ഒരാൾ ആലിയയുടെ അവതരണത്തിലെ പാകപ്പിഴകളെ പരോക്ഷമായി ശരിവെച്ചത് ബോളിവുഡിൽ വലിയ ചർച്ചയായിട്ടുണ്ട്.
ഒരു ജോക്ക് പാളിപ്പോയാൽ അത് തിരിച്ചുപിടിക്കാനുള്ള കഴിവ് അവതാരകർക്കുണ്ടാകണമെന്നും, പ്രശസ്തിയുണ്ടെന്ന് കരുതി എല്ലാവർക്കും അവതാരകരാകാൻ കഴിയില്ലെന്നുമാണ് ആരാധകരുടെ പക്ഷം. “കാണാൻ പോലും പ്രയാസമായിരുന്നു” എന്ന തരത്തിലുള്ള കമന്റുകളാണ് ആലിയയുടെ വീഡിയോയ്ക്ക് താഴെ നിറയുന്നത്.
