ടെഹ്റാൻ : ഇറാന് നേരെ വീണ്ടും ഏതെങ്കിലും വിധത്തിലുള്ള ആക്രമണം ഉണ്ടായാൽ യുറേനിയം സമ്പുഷ്ടീകരണം 90 ശതമാനം വരെ വർദ്ധിപ്പിക്കുമെന്ന് മുന്നറിയിപ്പ്. ആണവായുധ നിർമ്മാണത്തിന് ആവശ്യമായ നിലവാരമാണിത്. അമേരിക്കയുടെയോ ഇസ്രായേലിന്റെയോ ഭാഗത്തുനിന്ന് വീണ്ടും ആക്രമണമുണ്ടായാൽ ഇറാന്റെ മുന്നിലുള്ള ഓപ്ഷനുകളിലൊന്ന് 90 ശതമാനം യുറേനിയം സമ്പുഷ്ടീകരണമാണെന്ന് ഇറാൻ പാർലമെന്റിലെ വിദേശനയ-ദേശീയ സുരക്ഷാ സമിതി വക്താവ് ഇബ്രാഹിം റെസായിയാണ്അറിയിച്ചത്.
യുഎസ് പ്രസിഡന്റ് ഡൊണാൾഡ് ട്രംപ് ഇറാന്റെ സമാധാന നിർദ്ദേശം തള്ളുകയും സൈനിക നടപടിയിലേക്ക് നീങ്ങുമെന്ന സൂചന നൽകുകയും ചെയ്തതിന് പിന്നാലെയാണ് ഇറാൻ വക്താവ് ഇക്കാര്യം അറിയിച്ചിരിക്കുന്നത്. ഇറാൻ സമർപ്പിച്ച പുതിയ വെടിനിർത്തൽ നിർദ്ദേശം പൂർണ്ണമായും അസ്വീകാര്യമാണ് എന്ന് തിങ്കളാഴ്ച ഡൊണാൾഡ് ട്രംപ് പ്രഖ്യാപിച്ചു. വെടിനിർത്തൽ കരാർ ഇപ്പോൾ വെന്റിലേറ്ററിലാണെന്നും അദ്ദേഹം വിശേഷിപ്പിച്ചിരുന്നു. ഇറാനിലെ ആണവ കേന്ദ്രങ്ങളെ തകർക്കാൻ വീണ്ടും സൈനിക നടപടിക്ക് ട്രംപ് ഒരുങ്ങുന്നതായാണ് ഏറ്റവും പുതിയ സൂചന.
നിലവിൽ ഇറാൻ 60 ശതമാനം വരെ യുറേനിയം സമ്പുഷ്ടീകരിക്കുന്നുണ്ട്. ഇത് ആണവായുധ നിർമ്മാണത്തിന് ആവശ്യമായ 90 ശതമാനത്തിലേക്ക് എത്തിക്കാൻ സാങ്കേതികമായി ചെറിയൊരു ഘട്ടം കൂടി മാത്രമേ ആവശ്യമുള്ളൂ. ഇറാന്റെ പക്കൽ ഇപ്പോൾത്തന്നെ 60% സമ്പുഷ്ടീകരിച്ച 400 കിലോഗ്രാം യുറേനിയം ഉണ്ടെന്ന് അന്താരാഷ്ട്ര ആണവോർജ്ജ ഏജൻസി നേരത്തെ വ്യക്തമാക്കിയിരുന്നു. ഈ വർഷം ജൂണിൽ ഇറാന്റെ ആണവ അടിസ്ഥാന സൗകര്യങ്ങൾ തകർത്തതായി ട്രംപ് അവകാശപ്പെട്ടിരുന്നുവെങ്കിലും, ഇറാന്റെ പക്കലുള്ള യുറേനിയം ശേഖരം നീക്കം ചെയ്യാതെ ഭീഷണി ഒടുങ്ങില്ലെന്നാണ് യുഎസ് ഇന്റലിജൻസ് വിലയിരുത്തൽ.
