കേന്ദ്രത്തിൽ ബി.ജെ.പി നേതൃത്വത്തിലുള്ള എൻ.ഡി.എ സർക്കാർ ഭരണത്തിൽ 12 വർഷം പൂർത്തിയാക്കുന്നതിന്റെയും, ഏറ്റവും കൂടുതൽ കാലം തുടർച്ചയായി രാജ്യം ഭരിക്കുന്ന എൻ.ഡി.എ പ്രധാനമന്ത്രിയായി നരേന്ദ്ര മോദി മാറുന്നതിന്റെയും പശ്ചാത്തലത്തിൽ വമ്പൻ ജനസമ്പർക്ക പരിപാടികളുമായി ഭാരതീയ ജനതാ പാർട്ടി. ജൂൺ 7-ഓടെയാണ് ഈ ചരിത്ര നേട്ടത്തിലേക്ക് പ്രധാനമന്ത്രി മോദി എത്തിച്ചേരുന്നത്. ഇതിന്റെ ഭാഗമായി ഒരു മാസം നീണ്ടുനിൽക്കുന്ന രാജ്യവ്യാപക കാമ്പെയ്നാണ് ബി.ജെ.പി ആസൂത്രണം ചെയ്തിരിക്കുന്നത്.
പ്രധാനമന്ത്രി നരേന്ദ്ര മോദിയുടെ ഭരണ റെക്കോർഡുകളും ആഗോള ജനപ്രീതിയും വിവിധ സംസ്ഥാനങ്ങളിൽ എൻ.ഡി.എ നേടിയ തിരഞ്ഞെടുപ്പ് വിജയങ്ങളും ജനങ്ങളിലേക്ക് എത്തിക്കുകയാണ് ഈ മാസം നീളുന്ന കാമ്പെയ്ന്റെ ലക്ഷ്യം. ജൂൺ 7 മുതൽ ജൂൺ 21 വരെ നീണ്ടുനിൽക്കുന്ന വിപുലമായ പരിപാടികളാണ് പാർട്ടി ഇതിനായി തയ്യാറാക്കിയിരിക്കുന്നത്.
ജൂൺ 8 മുതൽ 14 വരെയുള്ള ദിവസങ്ങളിൽ കേന്ദ്ര മന്ത്രിമാർ, എം.പിമാർ, സംസ്ഥാന മന്ത്രിമാർ, എം.എൽ.എമാർ എന്നിവരുടെ നേതൃത്വത്തിൽ രാജ്യത്തുടനീളം ‘പ്രഗതി പഥ് യാത്ര’ സംഘടിപ്പിക്കും. എൻ.ഡി.എ സർക്കാരിന്റെ കാലത്ത് രാജ്യത്ത് നടപ്പിലാക്കിയ വൻകിട ഇൻഫ്രാസ്ട്രക്ചർ പദ്ധതികളും അതിവേഗ വികസന സൈറ്റുകളും നേതാക്കൾ നേരിട്ട് സന്ദർശിക്കുകയും ഇതിന്റെ പുരോഗതി ജനങ്ങൾക്ക് മുന്നിൽ പ്രദർശിപ്പിക്കുകയും ചെയ്യും. ഒപ്പം എല്ലാ ജില്ലകളിലും ‘വികസിത് ഭാരത് സങ്കൽപ്’ കൺവെൻഷനുകളും മാധ്യമ സമ്മേളനങ്ങളും നടക്കും.
കാമ്പെയ്ന്റെ ഭാഗമായി ഓരോ സംസ്ഥാനത്തും 1+4 മുതിർന്ന ഭാരവാഹികളുടെയും, ജില്ലാ തലത്തിൽ 1+3 ഭാരവാഹികളുടെയും നേതൃത്വത്തിൽ പ്രത്യേക ടീമുകൾ രൂപീകരിച്ചിട്ടുണ്ട്. ഓരോ എം.പിമാരും തങ്ങളുടെ ലോക്സഭാ മണ്ഡലത്തിലെ ഓരോ നിയമസഭാ മണ്ഡലത്തിലും ഒരു ദിവസം വീതം ചെലവഴിക്കണം. എം.എൽ.എമാർ തങ്ങളുടെ മണ്ഡലത്തിലെ ഓരോ മണ്ഡലം കമ്മിറ്റി പരിധിയിലും ഒരു ദിവസം പൂർണ്ണമായി ഉണ്ടായിരിക്കണം. വിവിധ മേഖലകളിലെ പ്രമുഖരായ കുറഞ്ഞത് 500 വ്യക്തിത്വങ്ങളെ മുതിർന്ന നേതാക്കൾ നേരിട്ട് കണ്ട് സർക്കാരിന്റെ നേട്ടങ്ങൾ അടങ്ങിയ ഫോൾഡറുകൾ നൽകുകയും പൊന്നാടയണിയിച്ച് ആദരിക്കുകയും ചെയ്യും.
ജനക്ഷേമ പദ്ധതികൾ ജനങ്ങളിലേക്ക് നേരിട്ടെത്തിക്കാൻ കാമ്പെയ്ൻ കാലയളവിൽ പ്രത്യേക രജിസ്ട്രേഷൻ ക്യാമ്പുകൾ സംഘടിപ്പിക്കും. ആയുഷ്മാൻ ഭാരത്, ആയുഷ്മാൻ വയ വന്ദന, പി.എം സൂര്യ ഘർ, പി.എം സ്വാനിധി, ലക്ഷ്പതി ദിദി തുടങ്ങിയ പദ്ധതികളുടെ ആനുകൂല്യങ്ങൾ ഈ ക്യാമ്പുകൾ വഴി ലഭ്യമാക്കും. ഇതിന് പുറമെ ആയിരത്തിലധികം കേന്ദ്രങ്ങളിൽ വിദഗ്ദ്ധരെ പങ്കെടുപ്പിച്ചുകൊണ്ട് ‘സ്വാഭാവിക കൃഷി’ ശില്പശാലകളും പ്രായോഗിക പ്രദർശനങ്ങളും നടത്തും. ജൂൺ 21 അന്താരാഷ്ട്ര യോഗ ദിനത്തോടെയാണ് ഈ ജനസമ്പർക്ക പരിപാടി സമാപിക്കുക.
പ്രധാന കാമ്പെയ്ൻ ആരംഭിക്കുന്നതിന് മുന്നോടിയായി ജൂൺ 5 ലോക പരിസ്ഥിതി ദിനത്തിൽ എല്ലാ മണ്ഡലങ്ങളിലും “ഏക് പേഡ് മാ കേ നാം” എന്ന പേരിൽ വിപുലമായ വൃക്ഷത്തൈ നടീൽ കാമ്പെയ്നും ബി.ജെ.പി സംഘടിപ്പിക്കുന്നുണ്ട്. കഴിഞ്ഞ 12 വർഷത്തെ ഭരണം ‘വിശ്വാസം, വികസനം, ജനക്ഷേമം’ എന്നിവയിലൂന്നിയുള്ളതാണെന്ന് ബി.ജെ.പി ദേശീയ നേതൃത്വം വ്യക്തമാക്കി.
