പശ്ചിമേഷ്യയിൽ നിലനിൽക്കുന്ന ഭൗമരാഷ്ട്രീയ സംഘർഷങ്ങൾക്കിടയിൽ മേഖലയ്ക്ക് സ്ഥിരത കൊണ്ടുവരുന്നതിൽ ഇന്ത്യയ്ക്ക് വലിയ പങ്കുവഹിക്കാൻ കഴിയുമെന്ന് ഇന്ത്യയിലെ ഇസ്രായേൽ അംബാസഡർ റൂവൻ അസർ വ്യക്തമാക്കി. ഇന്ത്യയുടെ വികസിച്ചുകൊണ്ടിരിക്കുന്ന സാമ്പത്തിക ശക്തിയും വ്യാപാര പങ്കാളിത്തവും മേഖലയിൽ വലിയ മാറ്റങ്ങൾ കൊണ്ടുവരുമെന്ന് അദ്ദേഹം പറഞ്ഞു. തീവ്രവാദ സ്വഭാവമുള്ള ഘടകങ്ങളെ നിർവീര്യമാക്കി മേഖലയിൽ സ്ഥിരത ഉറപ്പാക്കുകയാണെങ്കിൽ, ഇന്ത്യയുടെ സാമ്പത്തിക വളർച്ചയുടെ പ്രയോജനം ഈ മേഖലയ്ക്ക് ലഭിക്കുമെന്ന് അസർ കൂട്ടിച്ചേർത്തു.
ഇന്ത്യയുമായി ഇസ്രായേലിന് വളരെ സവിശേഷമായ ഒരു ബന്ധമാണുള്ളതെന്ന് പ്രധാനമന്ത്രി ബെഞ്ചമിൻ നെതന്യാഹു അടുത്തിടെ അഭിപ്രായപ്പെടുകയുണ്ടായി. ലോകത്തിന്റെ പല ഭാഗങ്ങളിലും ഇസ്രായേൽ വിമർശനങ്ങൾ നേരിടുമ്പോൾ ഇന്ത്യയിൽ നിന്ന് വലിയ തോതിലുള്ള പിന്തുണയാണ് ലഭിക്കുന്നതെന്ന് അദ്ദേഹം ചൂണ്ടിക്കാട്ടി. ഇന്ത്യയിലെ ജനങ്ങൾക്ക് ഇസ്രായേലിനോട് വലിയ സ്നേഹമാണുള്ളതെന്നും, തനിക്ക് ഇന്ത്യയിൽ നിന്നാണ് ഏറ്റവും കൂടുതൽ ഫോളോവേഴ്സ് ഉള്ളതെന്നും നെതന്യാഹു പറഞ്ഞു.
പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ പ്രതിരോധം, സാങ്കേതികവിദ്യ, വ്യാപാരം, കൃഷി തുടങ്ങിയ വിവിധ മേഖലകളിൽ ഇരുരാജ്യങ്ങളും സഹകരണം വർധിപ്പിച്ചിട്ടുണ്ട്. ഈ വർഷം നടന്ന പ്രധാനമന്ത്രി മോദിയുടെ ഇസ്രായേൽ സന്ദർശനം ഇരുരാജ്യങ്ങളും തമ്മിലുള്ള ബന്ധം കൂടുതൽ ശക്തമാക്കി. സന്ദർശനത്തിനിടെ ഇസ്രായേലിന്റെ ഏറ്റവും ഉയർന്ന പാർലമെന്ററി ബഹുമതിയായ “സ്പീക്കർ ഓഫ് ദ നെസെറ്റ് മെഡൽ” നൽകി മോദിയെ ആദരിച്ചിരുന്നു. കൂടാതെ, ഇസ്രായേൽ പ്രധാനമന്ത്രി തന്റെ ആദ്യകാല വ്യക്തിജീവിതത്തിലെ ഇന്ത്യയുമായുള്ള ബന്ധത്തെക്കുറിച്ച് ഓർമ്മിപ്പിക്കുകയും ചെയ്തു.
