ന്യൂയോർക്ക് : നിയമവിരുദ്ധ കുടിയേറ്റത്തിനെതിരെ നടപടികൾക്ക് കടുപ്പിച്ച് യുഎസ്. ഇന്ത്യൻ ട്രക്ക് ഡ്രൈവർമാർക്ക് ഇടയിൽ വ്യാപകമായി നടത്തിയ പരിശോധനയിൽ 30 പേർ അറസ്റ്റിലായി. യുഎസ് അതിർത്തി രക്ഷാസേന (ബോർഡർ പട്രോൾ) ആണ് 30 ഇന്ത്യൻ ട്രക്ക് ഡ്രൈവർമാരെ അറസ്റ്റ് ചെയ്തത്. ഇവരെ ഉടൻതന്നെ ഇന്ത്യയിലേക്ക് നാടുകടത്തുമെന്ന് അധികൃതർ വ്യക്തമാക്കി.
ട്രംപ് ഭരണകൂടത്തിന് കീഴിൽ യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ രാജ്യവ്യാപകമായി ശക്തമാക്കിയ ഇമിഗ്രേഷൻ പരിശോധനകളുടെ ഭാഗമായാണ് ഈ വൻ അറസ്റ്റ്. ’ഓപ്പറേഷൻ ചെക്ക്മേറ്റ്’ എന്ന പേരിലാണ് യുഎസ് ഈ ദൗത്യം ആരംഭിച്ചിരിക്കുന്നത്. കഴിഞ്ഞ ഏതാനും ദിവസങ്ങളിലായി നടന്ന പരിശോധനയിൽ ഇതുവരെ ആകെ 52 പേരെ അതിർത്തി രക്ഷാസേന അറസ്റ്റ് ചെയ്തു. ഇതിൽ 36 പേർ വലിയ സെമി-ട്രക്കുകൾ ഓടിച്ചിരുന്നവരാണ്. ഈ 36 ഡ്രൈവർമാരിൽ 30 പേരും ഇന്ത്യൻ പൗരന്മാരാണെന്ന് അധികൃതർ സ്ഥിരീകരിച്ചു. ബാക്കിയുള്ള ആറുപേർ മെക്സിക്കോ, എൽ സാൽവദോർ, റഷ്യ എന്നീ രാജ്യങ്ങളിൽ നിന്നുള്ളവരാണ്.
