ന്യൂഡൽഹി : എഥനോൾ ചേർത്ത പെട്രോളിന്റെ എക്സൈസ് തീരുവ കേന്ദ്രസർക്കാർ ഒഴിവാക്കി. പെട്രോളിൽ 22% മുതൽ 30% വരെ എഥനോൾ കലർത്തിയ ഇന്ധന വകഭേദങ്ങളുടെ സെൻട്രൽ എക്സൈസ് ഡ്യൂട്ടി ആണ് പൂർണ്ണമായും ഒഴിവാക്കിയിരിക്കുന്നത്. ബയോഫ്യുവൽ അഥവാ ജൈവ ഇന്ധനങ്ങളുടെ ഉപയോഗം പ്രോത്സാഹിപ്പിക്കുന്നതിനും വിദേശത്തുനിന്നുള്ള ക്രൂഡ് ഓയിൽ ഇറക്കുമതി കുറയ്ക്കുന്നതിനുമായാണ് കേന്ദ്ര സർക്കാരിന്റെ ഈ നിർണ്ണായക നീക്കം.
ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് മാനദണ്ഡങ്ങൾ പാലിച്ചു നിർമ്മിക്കുന്ന നാല് പ്രധാന ഉയർന്ന എഥനോൾ മിശ്രിതങ്ങൾക്കാണ് നിലവിൽ നികുതി ഇളവ് പ്രഖ്യാപിച്ചിരിക്കുന്നത്. 78% പെട്രോളും 22% എഥനോളും അടങ്ങിയ E22, 75% പെട്രോളും 25% എഥനോളും അടങ്ങിയ E25, 73% പെട്രോളും 27% എഥനോളും അടങ്ങിയ E27, 70% പെട്രോളും 30% എഥനോളും അടങ്ങിയ E30 എന്നീ വേരിയന്റുകളുടെ എക്സൈസ് തീരുവ ആണ് പൂർണ്ണമായും ഒഴിവാക്കിയിരിക്കുന്നത്. കൂടാതെ, ഇവയ്ക്കുമേൽ ഈടാക്കിയിരുന്ന റോഡ് ആൻഡ് ഇൻഫ്രാസ്ട്രക്ചർ സെസ് ഉൾപ്പെടെയുള്ള അഡീഷണൽ ഡ്യൂട്ടികളിൽ നിന്നും ഇളവ് നൽകിയിട്ടുണ്ട്.
