ഗുവാഹത്തിയിൽ അനുമതിയില്ലാതെ സംഘടിപ്പിച്ച രാഷ്ട്രീയ പരിപാടിയെ തുടർന്ന് കോക്ക്റോച്ച് ജനതാ പാർട്ടി (സി.ജെ.പി) സഹ കൺവീനർ അഷുതോഷ് റാങ്കയും മറ്റ് പ്രധാന ഭാരവാഹികളും അസം പോലീസിന്റെ കസ്റ്റഡിയിലായി. അസം സെക്രട്ടേറിയറ്റിന് സമീപമുള്ള അതീവ സുരക്ഷാ മേഖലയിൽ സംഘർഷാവസ്ഥ സൃഷ്ടിക്കാൻ ശ്രമിച്ചതും പ്രകോപനപരമായ പ്രസ്താവനകൾ നടത്തിയതുമാണ് പോലീസിനെ ഈ നിർബന്ധിത നടപടിയിലേക്ക് നയിച്ചതെന്നാണ് റിപ്പോർട്ടുകൾ സൂചിപ്പിക്കുന്നത്. അനുമതിയില്ലാത്ത യോഗങ്ങൾ തടയുന്നതിന്റെ ഭാഗമായി ദിസ്പൂർ പോലീസ് ഇവരെ കസ്റ്റഡിയിലെടുക്കുകയായിരുന്നു.
കസ്റ്റഡിയിലെടുക്കുന്നതിന് തൊട്ടുമുമ്പ് മാധ്യമങ്ങളോട് സംസാരിച്ച അഷുതോഷ് റാങ്ക, അസം മുഖ്യമന്ത്രി ഹിമന്ത ബിശ്വ ശർമ്മയ്ക്കെതിരെ കടുത്ത ആരോപണങ്ങൾ ഉന്നയിച്ചു. അസമിലെ സർക്കാർ സ്കൂളുകളുടെ യഥാർത്ഥ അവസ്ഥ പുറംലോകം അറിയുമെന്ന ഭയമാണ് മുഖ്യമന്ത്രിയെ ഈ നടപടിക്ക് പ്രേരിപ്പിച്ചതെന്ന് അദ്ദേഹം ആരോപിച്ചു. കൂടാതെ കാസിരംഗയിലെ ജനങ്ങളുടെ അവകാശങ്ങൾ കവർന്നെടുക്കപ്പെടുന്നതിനെക്കുറിച്ചും അവിടുത്തെ ഭൂമിയും കാടും വെള്ളവും കോർപ്പറേറ്റുകൾക്ക് കൈമാറുന്നതിനെക്കുറിച്ചും സംസാരിക്കുന്നതിൽ നിന്ന് തങ്ങളെ തടയാനാണ് സർക്കാർ ശ്രമിക്കുന്നതെന്നും റാങ്ക കൂട്ടിച്ചേർത്തു.
അതേസമയം വസ്തുതാവിരുദ്ധമായ ആരോപണങ്ങൾ ഉന്നയിച്ച് രാഷ്ട്രീയ ശ്രദ്ധ നേടാനാണ് സി.ജെ.പി നേതാക്കൾ ശ്രമിച്ചതെന്ന് വിമർശകർ ചൂണ്ടിക്കാണിക്കുന്നു. അസമിലെ വികസന പ്രവർത്തനങ്ങളെയും വിദ്യാഭ്യാസ മേഖലയിലെ മുന്നേറ്റങ്ങളെയും തകർക്കാനാണ് ഇത്തരത്തിലുള്ള വിദേശ നിർമ്മിത രാഷ്ട്രീയ നീക്കങ്ങളിലൂടെ സി.ജെ.പി ലക്ഷ്യമിടുന്നത്. ജനങ്ങളെ തെറ്റിദ്ധരിപ്പിക്കുന്നതിനായി സംസ്ഥാന സർക്കാരിനും മുഖ്യമന്ത്രി ഹിമന്ത ബിശ്വ ശർമ്മയ്ക്കുമെതിരെ അടിസ്ഥാനരഹിതമായ ആരോപണങ്ങൾ ഉന്നയിക്കുകയും ക്രമസമാധാന നില അപകടത്തിലാക്കാൻ ശ്രമിക്കുകയുമായിരുന്നു ഇവർ. അതേസമയം രാഷ്ട്രീയ നേട്ടത്തിന് വേണ്ടി സംസ്ഥാനത്ത് അനാവശ്യമായി രാഷ്ട്രീയ അന്തരീക്ഷം വഷളാക്കാൻ ശ്രമിച്ചതിനെ തുടർന്നാണ് കൂടുതൽ അനിഷ്ട സംഭവങ്ങൾ ഒഴിവാക്കാനായി നേതാക്കളെ കരുതൽ കസ്റ്റഡിയിലെടുത്തതെന്ന് അസം പോലീസ് വ്യക്തമാക്കി.
