ഇന്ത്യൻ കരസേനയുടെ കരുത്തുറ്റ നെഗേവ് (NEGEV) ലൈറ്റ് മെഷീൻ ഗണ്ണുകൾക്ക് (LMG) ഇനി ഇസ്രയേലിന്റെ അത്യാധുനിക കണ്ണ്. ലോകപ്രശസ്ത പ്രതിരോധ സാങ്കേതിക കമ്പനിയായ മെപ്രോലൈറ്റിന്റെ (Meprolight) അത്യാധുനിക ടെലിസ്കോപ്പിക് കാഴ്ചാ സംവിധാനമായ ‘മെപ്രോ X6’ (MEPRO X6) ആണ് ഇന്ത്യൻ സൈന്യത്തിന്റെ ഔദ്യോഗിക പകൽസമയ ഒപ്റ്റിക്സ് ആയി തിരഞ്ഞെടുത്തത്. പ്രതിരോധ മേഖലയിലെ നീണ്ട വർഷങ്ങളിലെ കഠിനമായ ടെൻഡർ നടപടികൾക്കും പരീക്ഷണങ്ങൾക്കും ഒടുവിലാണ് നിർണായകമായ ഈ കരാർ ഒപ്പിട്ടത്. ഇന്ത്യൻ സൈന്യത്തിന്റെ കൃത്യതയും പ്രഹരശേഷിയും വൻതോതിൽ വർദ്ധിപ്പിക്കുന്നതാണ് ഈ അത്യാധുനിക സാങ്കേതികവിദ്യ.
ഇന്ത്യൻ സൈന്യം വൻതോതിൽ നെഗേവ് മെഷീൻ ഗണ്ണുകൾ വാങ്ങിക്കൂട്ടുന്ന പശ്ചാത്തലത്തിലാണ് ദൂരെയുള്ള ലക്ഷ്യങ്ങൾ പോലും കൃത്യമായി നിരീക്ഷിക്കാനും തകർക്കാനും ശേഷിയുള്ള ഒരു ഡേ-ടൈം ഒപ്റ്റിക് സിസ്റ്റം ആവശ്യമായി വന്നത്. കഠിനമായ പ്രകൃതി സാഹചര്യങ്ങളിലും യുദ്ധഭൂമിയിലും ഇതിന്റെ വിശ്വാസ്യത, ഈടുനിൽപ്പ്, ലക്ഷ്യത്തിലെ കൃത്യത എന്നിവ നേരിട്ട് വിലയിരുത്തിയ ശേഷമാണ് സൈന്യം മെപ്രോ X6 ഉറപ്പിച്ചത്. യഥാർത്ഥ യുദ്ധമുഖത്ത് സൈനികന് ലഭ്യമാകുന്ന വിവരങ്ങളുടെയും കാഴ്ചയുടെയും കൃത്യതയാണ് വിജയ പരാജയങ്ങൾ നിർണ്ണയിക്കുകയെന്നും, യുദ്ധഭൂമിയിലെ ബോധ്യം തങ്ങളുടെ സാങ്കേതികവിദ്യയിലൂടെ നേട്ടമാക്കി മാറ്റുകയാണ് ലക്ഷ്യമെന്നും മെപ്രോലൈറ്റ് സീനിയർ വൈസ് പ്രസിഡന്റ് ഗോലാൻ കലിമി വ്യക്തമാക്കി. ഇന്ത്യൻ പ്രതിരോധ രംഗത്തെ മുൻനിര പൊതുമേഖലാ സ്ഥാപനമായ ഭാരത് ഇലക്ട്രോണിക്സ് ലിമിറ്റഡ് (BEL) വഴിയാണ് ഈ കാഴ്ചാ സംവിധാനങ്ങൾ സൈന്യത്തിന് കൈമാറുക.
‘മേയ്ക്ക് ഇൻ ഇന്ത്യ’ പദ്ധതിക്ക് വലിയ ഊർജ്ജം നൽകിക്കൊണ്ട് സാങ്കേതികവിദ്യ പൂർണ്ണമായും ഇന്ത്യയിലേക്ക് കൈമാറുന്നതിനുള്ള (Transfer of Technology) കരാറും ഇതിന്റെ ഭാഗമായി ഒപ്പിട്ടിട്ടുണ്ട്. മെപ്രോലൈറ്റ് കമ്പനി ഇന്ത്യയിലെ പ്രമുഖ പ്രതിരോധ ഉത്പാദന കമ്പനിയായ ആർ.ആർ.പി ഡിഫൻസുമായിട്ടാണ് (RRP Defence) ഇതിനായുള്ള കരാറിലെത്തിയത്. ഇതനുസരിച്ച് മെപ്രോ X6-ന്റെ നിർമ്മാണ രഹസ്യങ്ങളും സാങ്കേതികവിദ്യയും ഇന്ത്യയ്ക്ക് ലഭിക്കും. തുടർന്ന് ആർ.ആർ.പി ഡിഫൻസ് ഈ ഒപ്റ്റിക്സ് ഇന്ത്യയിൽ വെച്ച് തന്നെ നിർമ്മിച്ച് ബി.ഇ.എല്ലിന് നൽകും. ബി.ഇ.എൽ ആയിരിക്കും ഇത് ഇന്ത്യൻ ആർമിക്ക് പ്രധാന കരാറുകാരെന്ന നിലയിൽ വിതരണം ചെയ്യുക.
അസാധാരണമായ വ്യക്തത നൽകുന്ന 6x ഫിക്സഡ് മാഗ്നിഫിക്കേഷൻ ടെലിസ്കോപ്പിക് കാഴ്ചയാണ് മെപ്രോ X6-ന്റെ പ്രധാന സവിശേഷത. അസാധാരണമായ കരുത്തും ഉയർന്ന ഒപ്റ്റിക്കൽ പെർഫോമൻസും ആവശ്യമുള്ള അസാൾട്ട് റൈഫിളുകൾക്കും ലൈറ്റ് മെഷീൻ ഗണ്ണുകൾക്കും വേണ്ടിയാണ് ഇത് രൂപകൽപ്പന ചെയ്തിരിക്കുന്നത്. അതിവിശാലമായ ദൃശ്യപരിധിയും കഠിനമായ കാലാവസ്ഥയിലും ഒരു തടസ്സവുമില്ലാതെ പ്രവർത്തിക്കാനുള്ള ശേഷിയും ഇതിനുണ്ട്. ഇന്ത്യൻ സൈന്യത്തിന്റെ ആവശ്യാനുസരണം രൂപമാറ്റം വരുത്തിയ ഈ ഇസ്രയേലി സാങ്കേതികവിദ്യ വരുന്നതോടെ അതിർത്തിയിലെ ഇന്ത്യൻ സൈനികരുടെ നിരീക്ഷണ-പ്രതിരോധ ശേഷി പുതിയ ഉയരങ്ങളിലെത്തുമെന്നാണ് വിലയിരുത്തൽ. സോഷ്യൽ മീഡിയയിലും പ്രതിരോധ ചർച്ചകളിലും ഇന്ത്യൻ ആർമിയുടെ ഈ പുതിയ വജ്രായുധം ഇതിനകം തന്നെ തരംഗമായി മാറിക്കഴിഞ്ഞു.
