സോനം വാങ്ചുക്കിന് പിന്തുണ പ്രഖ്യാപിച്ച് കോൺഗ്രസ് നടത്തുന്ന പ്രതിഷേധ സമരങ്ങളെ രൂക്ഷമായി വിമർശിച്ച് അദ്ദേഹത്തിന്റെ ഭാര്യ ഗീതാഞ്ജലി ആങ്മോ. ഡൽഹിയിൽ പ്രധാനമന്ത്രിയുടെ വസതിക്ക് സമീപം കോൺഗ്രസ് സംഘടിപ്പിച്ച സമരം തികച്ചും ആത്മാർത്ഥതയില്ലാത്തതാണെന്നും രാഷ്ട്രീയ അജണ്ടകൾ നടപ്പിലാക്കാനുള്ള ശ്രമത്തിന്റെ ഭാഗമാണെന്നും അവർ കുറ്റപ്പെടുത്തി. ഇന്ത്യ ടുഡേയ്ക്ക് നൽകിയ പ്രത്യേക അഭിമുഖത്തിലാണ് ഗീതാഞ്ജലി കോൺഗ്രസ് നേതൃത്വത്തിനെതിരെ കടുത്ത ഭാഷയിൽ തുറന്നടിച്ചത്.
കഴിഞ്ഞ ചൊവ്വാഴ്ച രാഹുൽ ഗാന്ധിയുടെ നേതൃത്വത്തിൽ പ്രധാനമന്ത്രിയുടെ വസതിക്ക് മുന്നിൽ നടന്ന മിന്നൽ പ്രതിഷേധത്തെ ചൂണ്ടിക്കാണിച്ചാണ് അവരുടെ വിമർശനം. യഥാർത്ഥ ആവശ്യങ്ങളുമായി തെരുവിൽ സമരം ചെയ്യുന്ന വിദ്യാർത്ഥികൾക്കും സാധാരണക്കാർക്കും ഒപ്പം ജന്തർ മന്തറിലെത്തി പിന്തുണ അറിയിക്കുന്നതിന് പകരം സ്വന്തം രാഷ്ട്രീയ ലാഭത്തിനായി സമരം മാറ്റിതീർക്കാനാണ് പ്രതിപക്ഷ നേതാക്കൾ ശ്രമിക്കുന്നത്. ജനങ്ങളുടെ യഥാർത്ഥ ആവശ്യങ്ങളെ മറയാക്കി രാഷ്ട്രീയ മുതലെടുപ്പ് നടത്തുന്നത് അംഗീകരിക്കാനാകില്ലെന്ന് അവർ വ്യക്തമാക്കി. പ്രതിപക്ഷത്തിന്റെ ഇത്തരം കാപട്യം നിറഞ്ഞ ഇടപെടലുകൾ തങ്ങളുടെ യഥാർത്ഥ ആവശ്യങ്ങളെ ദുർബലപ്പെടുത്തുമെന്ന ഭയവും അവർ പങ്കുവെച്ചു.
