തത്കാൽ റെയിൽവേ ടിക്കറ്റ് ബുക്കിംഗിലെ താമസം ഒഴിവാക്കാനും യാത്രക്കാർക്ക് വേഗത്തിൽ ടിക്കറ്റുകൾ ലഭ്യമാക്കാനും വൻ പരിഷ്കാരങ്ങളുമായി ഐആർസിടിസി (IRCTC). ടിക്കറ്റ് ബുക്ക് ചെയ്യുമ്പോൾ സമയനഷ്ടം ഉണ്ടാക്കുന്ന ഘടകങ്ങൾ ഒഴിവാക്കി സംവിധാനം കൂടുതൽ വേഗത്തിലാക്കുക എന്ന ലക്ഷ്യത്തോടെ അഞ്ച് പുതിയ ഫീച്ചറുകളാണ് ഐആർസിടിസി അവതരിപ്പിച്ചിരിക്കുന്നത്. വെബ്സൈറ്റിലും മൊബൈൽ ആപ്പിലും വരുത്തിയ ഈ മാറ്റങ്ങൾ വരുന്നതോടെ നിമിഷനേരം കൊണ്ട് തത്കാൽ ടിക്കറ്റുകൾ നിഷ്പ്രയാസം സ്വന്തമാക്കാൻ സാധാരണക്കാരായ യാത്രക്കാർക്ക് സാധിക്കും.
തത്കാൽ ബുക്കിംഗിൽ ഏറ്റവുമധികം സമയമെടുത്തിരുന്ന കാപ്ച (CAPTCHA) വെരിഫിക്കേഷൻ ഒഴിവാക്കിയതാണ് ഇതിലെ ഏറ്റവും വലിയ മാറ്റം. മുൻപ് പേയ്മെന്റ് നടത്തുന്നതിന് തൊട്ടുമുൻപ് സംഖ്യകളും അക്ഷരങ്ങളും അടങ്ങിയ കാപ്ച കോഡുകൾ ടൈപ്പ് ചെയ്യേണ്ടി വരുന്നത് കാരണം സെക്കൻഡുകളുടെ വ്യത്യാസത്തിൽ പലരുടെയും ടിക്കറ്റുകൾ വെയ്റ്റിംഗ് ലിസ്റ്റിലേക്ക് പോകുന്ന സാഹചര്യമുണ്ടായിരുന്നു. എന്നാൽ പുതിയ മാറ്റത്തോടെ തത്കാൽ സമയത്ത് കാപ്ച നൽകാതെ തന്നെ നേരിട്ട് പേയ്മെന്റ് പേജിലേക്ക് കടക്കാനും ബുക്കിംഗ് അതിവേഗം പൂർത്തിയാക്കാനും സാധിക്കും.
യാത്രക്കാരുടെ വിവരങ്ങൾ മുൻകൂട്ടി സേവ് ചെയ്തു വെക്കാനുള്ള ‘സേവ്ഡ് പാസഞ്ചർ ഡിറ്റെയിൽസ്’ (Saved Passenger Details) ഫീച്ചറും കൂടുതൽ കാര്യക്ഷമമാക്കിയിട്ടുണ്ട്. തത്കാൽ ബുക്കിംഗ് സമയം ആരംഭിക്കുന്നതിന് മുൻപ് തന്നെ യാത്രക്കാരുടെ പേര്, വയസ്സ്, ജെൻഡർ, ബർത്ത് പ്രിഫറൻസ് തുടങ്ങിയ വിവരങ്ങൾ മാസ്റ്റർ ലിസ്റ്റിൽ നൽകി സേവ് ചെയ്യാം. തത്കാൽ ഓപ്പൺ ആകുന്ന സമയത്ത് ഓരോ വ്യക്തിയുടെയും വിവരങ്ങൾ ടൈപ്പ് ചെയ്യുന്നതിന് പകരം സേവ് ചെയ്ത പ്രൊഫൈൽ സെലക്ട് ചെയ്യുക മാത്രം ചെയ്താൽ മതിയാകും. ഇത് ടിക്കറ്റ് ഉറപ്പാക്കാൻ നിർണ്ണായകമായ സെക്കൻഡുകൾ ലാഭിക്കാൻ സഹായിക്കും.
ഇതിനുപുറമേ, ട്രെയിനുകളിലെ സീറ്റ് ലഭ്യത പരിശോധിക്കുന്നത് കൂടുതൽ എളുപ്പമാക്കാൻ എല്ലാ യാത്രാ ക്ലാസുകളിലെയും (Sleeper, 3AC, 2AC, Chair Car) വിവരങ്ങൾ ഒറ്റ സ്ക്രീനിൽ ലഭ്യമാക്കുന്ന ഫീച്ചറും അവതരിപ്പിച്ചിട്ടുണ്ട്. മുൻപ് ഓരോ ക്ലാസിലെയും സീറ്റ് ലഭ്യത അറിയാൻ വെവ്വേറെ ടാബുകളിലേക്ക് മാറേണ്ടി വന്നിരുന്ന സ്ഥാനത്താണ് പുതിയ സംവിധാനം. ഇതോടെ ലഭ്യമായ സീറ്റുകൾ പെട്ടെന്ന് താരതമ്യം ചെയ്യാനും ഏറ്റവും അനുയോജ്യമായ ക്ലാസിലേക്ക് പെട്ടെന്ന് തന്നെ ബുക്കിംഗ് പൂർത്തിയാക്കാനും സാധിക്കും. സാങ്കേതിക തടസ്സങ്ങൾ ഒഴിവാക്കി ഐആർസിടിസി ലോഗിൻ കൂടുതൽ സുഗമമാക്കുന്ന മറ്റ് സുരക്ഷാ-സാങ്കേതിക മാറ്റങ്ങളും പുതിയ അപ്ഡേറ്റിൽ ഉൾപ്പെടുത്തിയിട്ടുണ്ട്.
