പ്രധാനമന്ത്രി നരേന്ദ്ര മോദിയുടെ ‘ആത്മാനിർഭർ ഭാരത്’ കാഴ്ചപ്പാടിലൂടെ പ്രതിരോധ ഉൽപ്പാദന രംഗത്ത് ലോകരാജ്യങ്ങളെപ്പോലും ഞെട്ടിക്കുന്ന വൻ കുതിച്ചുചാട്ടത്തിന് വഴിയൊരുക്കുകയാണ് ഉത്തർപ്രദേശ്. ഒരു കാലത്ത് ക്രമസമാധാന തകർച്ചയും ഗുണ്ടാരാജും കൊണ്ട് മാത്രം വാർത്തകളിൽ നിറഞ്ഞിരുന്ന സംസ്ഥാനം, ഇന്ന് യോഗി ആദിത്യനാഥ് സർക്കാരിന്റെ ഇച്ഛാശക്തിക്ക് കീഴിൽ ഭാരതത്തിന്റെ സൈനിക ശക്തിയുടെ നട്ടെല്ലായി മാറുന്ന കാഴ്ചയാണ് രാജ്യം കാണുന്നത്. വിദേശ രാജ്യങ്ങളെ ആശ്രയിക്കാതെ സ്വയംപര്യാപ്തമായ ശക്തമായ ഭാരതം കെട്ടിപ്പടുക്കുക എന്ന ദേശീയ ദൗത്യത്തിൽ നിർണ്ണായക പങ്കാണ് ഉത്തർപ്രദേശ് പ്രതിരോധ ഇടനാഴി (UP Defence Industrial Corridor) വഹിക്കുന്നത്. ലഖ്നൗവിലെ ബ്രഹ്മോസ് സൂപ്പർസോണിക് ക്രൂയിസ് മിസൈൽ നിർമ്മാണ യൂണിറ്റ് മുതൽ അലിഗഡിലെ അത്യാധുനിക ഡ്രോൺ സാങ്കേതികവിദ്യ വരെ ഉൾക്കൊള്ളുന്നതാണ് ഈ പ്രതിരോധ ശൃംഖല.
ലഖ്നൗ, കാൺപൂർ, ഝാൻസി, അലിഗഡ്, ആഗ്ര, ചിത്രകൂട് എന്നീ ആറ് തന്ത്രപ്രധാന കേന്ദ്രങ്ങളെ (Nodes) കോർത്തിണക്കിയാണ് യോഗി സർക്കാർ യുപി ഡിഫൻസ് ഇൻഡസ്ട്രിയൽ കോറിഡോർ വികസിപ്പിക്കുന്നത്. ഭാരതത്തിന്റെ പ്രതിരോധ ശേഷി ലോകോത്തര നിലവാരത്തിലേക്ക് ഉയർത്താൻ ലക്ഷ്യമിടുന്ന ഈ പദ്ധതിയിലേക്ക് ഇതിനകം 39,000 കോടിയിലധികം രൂപയുടെ നിക്ഷേപ നിർദ്ദേശങ്ങളാണ് ഒഴുകിയെത്തിയത്. ദക്ഷിണേഷ്യയിലെ തന്നെ ഏറ്റവും വലിയ വെടിമരുന്ന് നിർമ്മാണ സമുച്ചയം (Ammunition Complex) കാൺപൂരിൽ 3,000 കോടിയിലധികം രൂപയുടെ നിക്ഷേപത്തിൽ അദാനി ഡിഫൻസ് യാഥാർത്ഥ്യമാക്കിക്കഴിഞ്ഞു. ഇതിനുപുറമേ എച്ച്എഎൽ (HAL), ബിഇഎൽ (BEL), ബിഡിഎൽ (BDL) തുടങ്ങിയ പ്രമുഖ ഭാരതീയ പൊതുമേഖലാ സ്ഥാപനങ്ങളും വൻകിട പ്രതിരോധ പദ്ധതികളുമായി മുന്നിലുണ്ട്.
യുപിയിലെ വിപ്ലവകരമായ എക്സ്പ്രസ് വേ ശൃംഖലയും ലോകോത്തര അടിസ്ഥാന സൗകര്യ വികസനവുമാണ് ഈ വ്യവസായ കുതിപ്പിന് കരുത്ത് പകരുന്നത്. ലഖ്നൗവിലും സമീപ പ്രദേശങ്ങളിലുമായി നിർമ്മിക്കുന്ന ബ്രഹ്മോസ് മിസൈലുകൾ ഭാരതീയ സൈന്യത്തിന് കൂടുതൽ ശക്തി പകരുക മാത്രമല്ല, ആഗോളതലത്തിൽ ഭാരതത്തിന്റെ സൈനിക കയറ്റുമതി സ്വപ്നങ്ങൾക്ക് ചിറകുകളേകുകയും ചെയ്യും. ഭാരതത്തിന്റെ പാരമ്പര്യ നിർമ്മാണ പാടവവും സാങ്കേതികവിദ്യയും സമന്വയിപ്പിച്ച് ചെറു ആയുധങ്ങൾ, ഡ്രോണുകൾ, വിമാന ഭാഗങ്ങൾ, ഇലക്ട്രോണിക് യുദ്ധ സാമഗ്രികൾ എന്നിവയും ഇവിടെ നിർമ്മിക്കപ്പെടുന്നുണ്ട്.
1,100 ഹെക്ടറിലധികം ഭൂമിയാണ് പ്രതിരോധ യൂണിറ്റുകൾക്കായി ഇതിനകം അനുവദിച്ചിട്ടുള്ളത്. ഐഐടി കാൺപൂർ (IIT Kanpur) പോലുള്ള ഭാരതത്തിലെ മുൻനിര ഗവേഷണ സ്ഥാപനങ്ങളുടെ പങ്കാളിത്തവും പ്രാദേശിക ചെറുകിട ഇടത്തരം വ്യവസായങ്ങളുടെ (MSME) പിന്തുണയും പദ്ധതിയുടെ വ്യാപ്തി വർദ്ധിപ്പിക്കുന്നു. മുൻപ് വിദേശ രാജ്യങ്ങളിൽ നിന്നും ആയുധങ്ങൾ ഇറക്കുമതി ചെയ്യാൻ ക്യൂ നിന്ന അവസ്ഥയിൽ നിന്ന്, ഇന്ന് സ്വന്തം മണ്ണിൽ അത്യന്താധുനിക ആയുധങ്ങൾ നിർമ്മിച്ച് ലോകത്തിന് മുന്നിൽ ഭാരതം കരുത്തുകാട്ടുമ്പോൾ, അതിന്റെ അമരത്ത് ഉത്തർപ്രദേശ് തലയെടുപ്പോടെ നിലകൊള്ളുകയാണ്. വിദേശശക്തികൾക്ക് മുന്നിൽ ഭാരതത്തിന്റെ പരമാധികാരം കൂടുതൽ സുരക്ഷിതമാക്കാൻ ഈ പ്രതിരോധ വിപ്ലവത്തിന് സാധിക്കുമെന്ന് ഉറപ്പാണ്.
