കോമൺവെൽത്ത് ഗെയിംസിൽ ഭാരോദ്വാഹനത്തിൽ ഭാരതത്തിനായി അഭിമാനകരമായ വെള്ളിമെഡൽ സ്വന്തമാക്കിയതിന് പിന്നാലെ അവിശ്വസനീയമായ പോരാട്ടവീര്യത്തിന്റെ കഥ തുറന്നുപറഞ്ഞ് വനിതാ താരം ഗ്യാനേശ്വരി യാദവ്. 53 കിലോഗ്രാം വിഭാഗത്തിൽ മെഡൽ സ്വന്തമാക്കാൻ വേദിയിലേക്ക് എത്തുമ്പോൾ, കഠിനമായ ശരീരവേദനയോടും ശാരീരിക ബുദ്ധിമുട്ടുകളോടും പോരാടുകയായിരുന്നു താനെന്ന് ഗ്യാനേശ്വരി വെളിപ്പെടുത്തി. മത്സരദിനം തന്റെ ആർത്തവത്തിന്റെ ആദ്യ ദിനമായിരുന്നുവെന്നും, ശരീരം എങ്ങനെ പ്രതികരിക്കുമെന്ന ഭയമുണ്ടായിരുന്നെങ്കിലും പിന്മാറാൻ തയ്യാറായിരുന്നില്ലെന്നും താരം പ്രതികരിച്ചു.
വർഷങ്ങളുടെ ത്യാഗവും കഠിനാധ്വാനവും അച്ഛന്റെ പൂർത്തീകരിക്കാത്ത കായിക സ്വപ്നങ്ങളുമാണ് എല്ലാ പ്രതിസന്ധികളെയും അതിജീവിച്ച് തന്നെ വേദിയിൽ എത്തിച്ചതെന്ന് ഗ്യാനേശ്വരി ഓർത്തെടുത്തു. ആർത്തവത്തിന്റെ ആദ്യദിനത്തിലെ രൂക്ഷമായ വയറുവേദനയും തളർച്ചയും അസ്വസ്ഥതയും വേട്ടയാടിയെങ്കിലും, രാജ്യത്തിനായി മെഡൽ നേടണമെന്ന ഉറച്ച നിശ്ചയദാർഢ്യം മാത്രമാണ് മനസ്സ് നിറയെ ഉണ്ടായിരുന്നത്. ആത്മവിശ്വാസത്തോടെ കളത്തിലിറങ്ങിയ താരം സ്നാച്ചിൽ 88 കിലോയും ക്ലീൻ ആൻഡ് ജെർക്കിൽ 111 കിലോയും ഉൾപ്പെടെ ആകെ 199 കിലോ ഗ്രാം ഭാരം ഉയർത്തി പുതിയ ദേശീയ റെക്കോർഡോടെയാണ് ചരിത്ര നേട്ടം കുറിച്ചത്.
പോഡിയത്തിൽ വെള്ളിമെഡലണിഞ്ഞ് ഭാരതീയ ത്രിവർണ്ണ പതാകയ്ക്ക് മുന്നിൽ തൊഴുതുനിൽക്കുമ്പോൾ തന്റെ കണ്ണുകൾ നിറഞ്ഞത് കഠിനമായ വേദനകളെ മറികടന്ന് സ്വന്തമാക്കിയ ഈ വിജയത്തിന്റെ തിളക്കം കൊണ്ടായിരുന്നുവെന്ന് ഛത്തീസ്ഗഡ് സ്വദേശിയായ ഈ 23-കാരി പറഞ്ഞു. കായികരംഗത്ത് വനിതകൾ നേരിടുന്ന വലിയ ശാരീരിക വെല്ലുവിളികളിലൊന്നിനെ പരസ്യമായി തുറന്നുപറയാൻ മടി കാണിക്കാത്ത ഗ്യാനേശ്വരിയുടെ ഈ ധീരമായ നിലപാടും പോരാട്ടവീര്യവും കായികലോകത്ത് വൻ പ്രശംസയ്ക്കാണ് വഴിവെച്ചിരിക്കുന്നത്.
