തമിഴ്നാട്ടിലെ വനിതാ സർക്കാർ ജീവനക്കാർക്ക് വലിയ ആശ്വാസം പകർന്ന് മൂന്നാമത്തെ കുട്ടിക്ക് നൽകിവരുന്ന പ്രസവാവധി ഒരു വർഷമായി വർദ്ധിപ്പിക്കാൻ തമിഴ്നാട് സർക്കാർ തീരുമാനിച്ചു. നിലവിൽ ആദ്യത്തെ രണ്ട് കുട്ടികൾക്ക് ലഭിച്ചിരുന്ന ഒരു വർഷത്തെ പ്രസവാവധിക്ക് തുല്യമായി ഇനി മൂന്നാമത്തെ കുട്ടിക്കും പൂർണ്ണ ശമ്പളത്തോടെയുള്ള അവധി ലഭിക്കും. നിയമസഭയിലെ ധനാഭ്യർത്ഥന ചർച്ചയ്ക്കിടെ മാനവ വിഭവശേഷി വകുപ്പ് മന്ത്രി ഡി. ശരത്കുമാറാണ് സർക്കാരിന്റെ ഈ സുപ്രധാന തീരുമാനം ഔദ്യോഗികമായി അറിയിച്ചത്. സ്ത്രീ ശാക്തീകരണത്തിനും ജീവനക്കാരുടെ സാമൂഹിക ക്ഷേമത്തിനും മുൻഗണന നൽകുന്നതിന്റെ ഭാഗമായാണ് ഈ നടപടിയെന്നും ഇതുസംബന്ധിച്ച സർക്കാർ ഉത്തരവ് ഉടൻ പുറത്തിറങ്ങുമെന്നും അദ്ദേഹം വ്യക്തമാക്കി.
നേരത്തെ സുപ്രീം കോടതി ഉത്തരവിന്റെ അടിസ്ഥാനത്തിൽ ഫണ്ടമെന്റൽ റൂൾ 101(എ) ഭേദഗതി ചെയ്തുകൊണ്ട്, രണ്ടോ അതിലധികമോ ജീവിച്ചിരിക്കുന്ന കുട്ടികളുള്ള വനിതാ ജീവനക്കാരുടെ പ്രസവാവധി 12 ആഴ്ചയായി തമിഴ്നാട് ചുരുക്കിയിരുന്നു. തുടർന്ന് മദ്രാസ് ഹൈക്കോടതിയും ഈ ഭേദഗതി ശരിവെച്ചിരുന്നു. എന്നാൽ പുതിയ പ്രഖ്യാപനത്തിലൂടെ ഈ നിയന്ത്രണം പൂർണ്ണമായും നീക്കം ചെയ്യപ്പെടുകയും മൂന്നാമത്തെ പ്രസവത്തിനും ഒരു വർഷത്തെ മുഴുവൻ അവധി പുനഃസ്ഥാപിക്കപ്പെടുകയും ചെയ്തു.
സംസ്ഥാനത്ത് ജനനനിരക്ക് വലിയ തോതിൽ കുറഞ്ഞുവരുന്നതിലെ ആശങ്കകളും സർക്കാരിന്റെ പുതിയ തീരുമാനത്തിന് പിന്നിലെ പ്രധാന ഘടകമാണ്. തമിഴ്നാട്ടിലെ ജനനനിരക്ക് 1.4 ആയി കുറഞ്ഞുവെന്നും ജനസംഖ്യയുടെ 16 ശതമാനത്തോളം പേർ 60 വയസ്സിന് മുകളിലുള്ളവരാണെന്നും ആരോഗ്യമന്ത്രി കെ.ജി. അരുൺരാജ് നേരത്തെ ചൂണ്ടിക്കാട്ടിയിരുന്നു. കൂടുതൽ കുട്ടികളുണ്ടാകാൻ ദമ്പതികളെ പ്രോത്സാഹിപ്പിക്കുന്നതിനുള്ള നടപടികളുടെ തുടർച്ചയായിട്ടാണ് ഈ പുതിയ ഇളവ് പ്രഖ്യാപിക്കപ്പെട്ടിരിക്കുന്നത്. മുൻപ് 90 ദിവസമായിരുന്ന പ്രസവാവധി ഘട്ടംഘട്ടമായി ഉയർത്തിയാണ് തമിഴ്നാട് സർക്കാർ ഇപ്പോൾ മൂന്ന് കുട്ടികൾക്ക് വരെ 365 ദിവസമാക്കിയത്.
