പാകിസ്താനിൽ നിന്നുള്ള ഭീകരവാദ ഭീഷണിയെക്കുറിച്ചുള്ള ഇന്ത്യയുടെ സുരക്ഷാ ആശങ്കകളോട് അമേരിക്ക പുലർത്തുന്ന അനുഭാവമില്ലായ്മയിലും (lack of empathy) ഏകപക്ഷീയമായ വ്യാപാര നയങ്ങളിലും കടുത്ത അമർഷം പങ്ക് വെച്ച് ഇന്ത്യൻ വിദേശകാര്യ മന്ത്രി എസ്. ജയശങ്കർ. ന്യൂയോർക്കിൽ ഐക്യരാഷ്ട്രസഭാ പൊതുസഭയുടെ വാർഷിക സമ്മേളനത്തിന് ശേഷം ഏഷ്യ സൊസൈറ്റി (Asia Society) സംഘടിപ്പിച്ച ചർച്ചയിൽ സംസാരിക്കവെയാണ് ജയശങ്കർ അമേരിക്കൻ നിലപാടുകളെ കടന്നാക്രമിച്ചത്. ഇന്ത്യയുടെ പരമാധികാരവും സുരക്ഷയും നേരിടുന്ന വലിയ വെല്ലുവിളികൾ തിരിച്ചറിയാൻ പങ്കാളിയായ അമേരിക്കയ്ക്ക് സാധിക്കാത്തത് ഇരുരാജ്യങ്ങളും തമ്മിലുള്ള ഉഭയകക്ഷി ബന്ധത്തെ പ്രതികൂലമായി ബാധിക്കുമെന്ന് അദ്ദേഹം തുറന്നടിച്ചു.
അയൽരാജ്യമായ പാകിസ്താൻ പതിറ്റാണ്ടുകളായി ഔദ്യോഗിക നയമെന്ന നിലയിൽ ഇന്ത്യക്കെതിരെ നടത്തുന്ന ഭീകരപ്രവർത്തനങ്ങൾ ഇന്ത്യയുടെ ഏറ്റവും പ്രധാനപ്പെട്ട ഭീഷണിയാണ്. ആഗോളതലത്തിൽ മറ്റൊരു രാജ്യവും നേരിട്ടിട്ടില്ലാത്ത രീതിയിലുള്ള അതിർത്തി കടന്നുള്ള ഭീകരവാദമാണ് ഇന്ത്യ നേരിടുന്നത്. തങ്ങൾക്ക് ഏറ്റവും പ്രധാനപ്പെട്ട ഈ വിഷയത്തിൽ പങ്കാളിത്ത രാജ്യങ്ങളിൽ നിന്നും വേണ്ടത്ര ധാരണയോ, തിരിച്ചറിവോ, സഹതാപമോ ലഭിക്കാത്തത് വലിയ പ്രശ്നങ്ങൾ സൃഷ്ടിക്കുന്നുണ്ടെന്ന് ഡൊണാൾഡ് ട്രംപ് ഭരണകൂടത്തിന്റെ നിലപാടുകളെ അക്കമിട്ട് നിരത്തി അദ്ദേഹം വ്യക്തമാക്കി. യുഎസ് പ്രസിഡന്റ് ഡൊണാൾഡ് ട്രംപിന്റെ നേതൃത്വത്തിൽ വാഷിംഗ്ടൺ ഇസ്ലാമാബാദുമായി കൂടുതൽ ബന്ധപ്പെടാൻ ശ്രമിക്കുന്ന പശ്ചാത്തലത്തിലാണ് ഈ രൂക്ഷവിമർശനം.
വ്യാപാര രംഗത്ത് അമേരിക്ക നടപ്പിലാക്കുന്ന പുതിയ ശൈലിയെയും ജയശങ്കർ ചോദ്യം ചെയ്തു. ബഹുമുഖ കരാറുകൾക്ക് പകരം ഓരോ രാജ്യങ്ങളുമായും വൺ-ടു-വൺ അടിസ്ഥാനത്തിൽ മാത്രം സംസാരിക്കുകയും മുൻപുണ്ടാക്കിയ എല്ലാ കരാറുകളും പുനഃപരിശോധിക്കുകയും ചെയ്യുന്ന പുതിയ വ്യാപാര ശൈലിയാണ് (Trading Template) വാഷിംഗ്ടൺ ഇപ്പോൾ പിന്തുടരുന്നത്. ട്രംപ് ഭരണകൂടത്തിന് കീഴിൽ റഷ്യൻ ഇന്ധന ഇറക്കുമതി, താരിഫുകൾ, വ്യാപാരം എന്നിവയിലടക്കം അമേരിക്കൻ നിലപാടുകൾ കടുക്കുമ്പോഴും, ഇരുരാജ്യങ്ങളും തമ്മിലുള്ള ബന്ധം കൂടുതൽ ഉയരങ്ങളിലേക്ക് പോകണമെന്നാണ് ഇന്ത്യ ആഗ്രഹിക്കുന്നതെന്നും, എന്നാൽ നേരിടുന്ന യാഥാർത്ഥ്യങ്ങളെ അഭിമുഖീകരിക്കാതെ അത് സാധ്യമല്ലെന്നും വിദേശകാര്യ മന്ത്രി ഓർമ്മിപ്പിച്ചു.
