സിപിഎമ്മിന്റെ സെക്രട്ടറിയേറ്റ് മാർച്ചിനിടെ പൊലീസ് ഉദ്യോഗസ്ഥർക്കെതിരേ വധഭീഷണി മുഴക്കിയ സിപിഎം എംഎൽഎമാരായ വി. ജോയി, കടകംപള്ളി സുരേന്ദ്രൻ എന്നിവർക്കെതിരേ ജാമ്യമില്ലാ വകുപ്പുകൾ ചുമത്തി കേസെടുത്തു. യൂത്ത് കോൺഗ്രസ് സംസ്ഥാന സെക്രട്ടറി രഞ്ജിത് രവീന്ദ്രൻ നൽകിയ പരാതിയിലാണ് തിരുവനന്തപുരം കന്റോൺമെന്റ് പൊലീസ് നടപടിയെടുത്തത്.
കഴിഞ്ഞദിവസം നടന്ന മാർച്ചിനിടെ കന്റോൺമെന്റ് അസിസ്റ്റന്റ് കമ്മീഷണർ ജയചന്ദ്രനോട് സംസാരിക്കവേയാണ് സിപിഎം ജില്ലാ സെക്രട്ടറി കൂടിയായ വി. ജോയിയും കടകംപള്ളി സുരേന്ദ്രനും കന്റോൺമെന്റ് എസ്എച്ച്ഒ സതീശ്കുമാർ, എസ്ഐ ഗോകുൽ എന്നിവർക്കെതിരേ ഭീഷണിപ്പെടുത്തുന്ന രീതിയിൽ പരാമർശങ്ങൾ നടത്തിയത്.
മാർച്ചിനിടയിലെ തർക്കത്തിനിടെ ഉദ്യോഗസ്ഥരെക്കൊണ്ട് പൊറുതിമുട്ടിയാൽ ഇവിടെ ഒരു കൊലപാതകം നടക്കുമെന്ന് വി. ജോയി പറയുകയായിരുന്നു. എന്നാൽ, എസ്ഐ ഗോകുലും സതീശ്കുമാറും തിരികെ വീട്ടിലെത്തി കുട്ടികളെ താലോലിക്കില്ലെന്നായിരുന്നു കടകംപള്ളി സുരേന്ദ്രന്റെ പരാമർശം. സംഭവം വലിയ വിവാദമായതോടെ വിഷയത്തിൽ വി. ജോയി വിശദീകരണവുമായി രംഗത്തെത്തി. താൻ എസിപിയോടാണ് കാര്യങ്ങൾ വ്യക്തമാക്കിയതെന്നും ആരെയും കൊല്ലുമെന്നല്ല, മറിച്ച് പൊലീസിന്റെ ഇത്തരത്തിലുള്ള പ്രകോപനങ്ങൾ തുടർന്നാൽ സമരം ചെയ്യുന്ന വിദ്യാർഥികളിൽ ആരെങ്കിലും മരണപ്പെടാനും ഇവിടെയൊരു കൊലപാതകം നടക്കാനും സാധ്യതയുണ്ടെന്നുമാണ് ഉദ്ദേശിച്ചതെന്നും വി. ജോയി വ്യക്തമാക്കി
