ദുബായിൽ നിന്ന് ഇസ്രായേലിലെ ടെൽ അവീവിലേക്ക് പറന്ന ഫ്ലൈദുബായ് വിമാനത്തിൽ വെച്ച് സഹപൈലറ്റ് നടത്തിയ ആക്രമണത്തെ യുണൈറ്റഡ് അറബ് എമിറേറ്റ്സ് ഔദ്യോഗികമായി ഭീകരാക്രമണമായി പ്രഖ്യാപിച്ചു. ഗുരുതരമായി പരിക്കേറ്റിട്ടും തളരാതെ പോരാടി 180 ഓളം വരുന്ന യാത്രക്കാരുടെ ജീവൻ രക്ഷിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിനെ യു.എ.ഇ അസിസ്റ്റന്റ് പ്രസിഡന്റ് അൻവർ ഗർഗാഷ് യഥാർത്ഥ നായകൻ എന്ന് വിശേഷിപ്പിച്ച് ആദരിച്ചു. കഠിനമായ സാഹചര്യത്തിലും ധീരതയും ഉത്തരവാദിത്തവും കാണിച്ച സ്മിത് വലിയൊരു ദുരന്തമാണ് ഒഴിവാക്കിയതെന്നും അദ്ദേഹത്തിന്റെ പ്രവർത്തനം പ്രശംസനീയമാണെന്നും യു.എ.ഇ ഭരണകൂടം വ്യക്തമാക്കി.
കോക്പിറ്റിനുള്ളിൽ വെച്ച് ഒമാനി പൈലറ്റായ അക്രമി സ്മിതിനെ കത്തികൊണ്ട് കുത്തുകയും വിമാനം തകർത്താൻ ശ്രമിക്കുകയുമായിരുന്നു. ചോര വാർന്നു ഒഴുകുന്ന അവസ്ഥയിലും ധൈര്യം കൈവിടാതെ സ്മിത് കോക്പിറ്റിന്റെ സുരക്ഷിത വാതിൽ തുറന്നു കൊടുത്തു. തുടർന്ന് വിമാനത്തിലുണ്ടായിരുന്ന മറ്റ് ജീവനക്കാരും യാത്രക്കാരും ചേർന്ന് അക്രമിയെ കീഴടക്കുകയായിരുന്നു. വിമാനം ഉടൻ തന്നെ സൗദി അറേബ്യയിലെ തബൂക്കിൽ അടിയന്തരമായി ലാൻഡ് ചെയ്താണ് വലിയ ദുരന്തം ഒഴിവാക്കിയത്.
നിലവിൽ ഈ സംഭവത്തെക്കുറിച്ച് അന്വേഷിക്കാൻ യു.എ.ഇ അറ്റോർണി ജനറൽ പ്രത്യേക അറ്റോർണി അന്വേഷണ സംഘത്തെ നിയോഗിച്ചിട്ടുണ്ട്. കസ്റ്റഡിയിലുള്ള പ്രതിയെ കൂടുതൽ ചോദ്യം ചെയ്യലിനായി സൗദി അധികൃതർ യു.എ.ഇക്ക് കൈമാറിയിട്ടുണ്ട്. കേസിന്റെ പിന്നിലുള്ള ഭീകരബന്ധവും ഗൂഢാലോചനയും വ്യക്തമാക്കാൻ സമഗ്രമായ അന്വേഷണം തുടരുകയാണെന്ന് യു.എ.ഇ ഭരണകൂടം അറിയിച്ചു.
