അന്താരാഷ്ട്ര ക്രിമിനൽ കോടതിയിൽ അമേരിക്ക അംഗമാകണമെന്നും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെതിരെയുള്ള അറസ്റ്റ് വാറന്റ് നടപ്പിലാക്കണമെന്നും ന്യൂയോർക്ക് സിറ്റി മേയർ സോഹ്റാൻ മമദാനി. പ്രശസ്ത പോഡ്‌കാസ്റ്റ് അവതാരകനായ തിയോ വോണുമായി നടത്തിയ അഭിമുഖത്തിലാണ് മമദാനി തൻ്റെ നിലപാട് വ്യക്തമാക്കിയത്.
വംശഹത്യയുടെ സൂത്രധാരൻ എന്ന് നെതന്യാഹുവിനെ വിശേഷിപ്പിച്ച അദ്ദേഹം, അന്താരാഷ്ട്ര കോടതി പുറപ്പെടുവിക്കുന്ന അറസ്റ്റ് വാറന്റുകൾ എല്ലാവർക്കും ഒരുപോലെ ബാധകമാക്കണമെന്നും ആവശ്യപ്പെട്ടു. മുമ്പ് മേയർ തിരഞ്ഞെടുപ്പ് പ്രചാരണ വേളയിൽ നെതന്യാഹു ന്യൂയോർക്കിലെത്തിയാൽ അറസ്റ്റ് ചെയ്യുമെന്ന് മമദാനി പ്രഖ്യാപിച്ചിരുന്നെങ്കിലും, അതിനുള്ള നിയമപരമായ അധികാരം തൻ്റെ ഭരണകൂടത്തിനില്ലെന്ന് പിന്നീട് അദ്ദേഹം സമ്മതിച്ചു. ഗാസയിലെ ജനങ്ങൾക്കെതിരെ പട്ടിണിയെ യുദ്ധതന്ത്രമാക്കിയതും മറ്റ് ക്രൂരതകളും ചൂണ്ടിക്കാട്ടിയാണ് ഐസിസി നെതന്യാഹുവിനെതിരെ വാറന്റ് പുറപ്പെടുവിച്ചത്.
ഐക്യരാഷ്ട്രസഭയുടെ പൊതുസഭയെ അഭിസംബോധന ചെയ്യാൻ കഴിഞ്ഞ മാസം നെതന്യാഹു ന്യൂയോർക്കിലെത്തിയപ്പോൾ നിരവധി ലോകനേതാക്കൾ സഭയിൽ നിന്ന് ഇറങ്ങിപ്പോയിരുന്നു. എന്നാൽ, ആരോപണങ്ങളെയും ഐസിസിയുടെ വാറന്റിനെയും പൂർണ്ണമായി തള്ളിക്കളഞ്ഞ നെതന്യാഹുവിന്റെ ഓഫീസ്, അന്താരാഷ്ട്ര കോടതിയുടെ നടപടിയെ കങ്കാരു കോടതിയുടെ പ്രഹസനമെന്നാണ് വിശേഷിപ്പിച്ചത്.
