ന്യൂഡൽഹി: റഷ്യയുമായുള്ള ഇന്ത്യയുടെ ദീർഘകാല ബന്ധത്തെച്ചൊല്ലിയുള്ള പാശ്ചാത്യ രാജ്യങ്ങളുടെ വിമർശനങ്ങൾ തള്ളി ശക്തമായ പ്രതികരണവുമായി വിദേശകാര്യ മന്ത്രി എസ്. ജയ്ശങ്കർ. രാജ്യത്തിന്റെ സുരക്ഷയും പരമാധികാരവും ഭീഷണിയിലായപ്പോഴൊക്കെയും മോസ്കോ ഇന്ത്യയ്ക്കൊപ്പം ഉറച്ചുനിന്നിട്ടുണ്ടെന്നും, ലോകത്തിലെ പ്രമുഖ ശക്തികളെല്ലാം പാകിസ്താനിലെ സൈനിക ഭരണകൂടത്തെ പിന്തുണച്ച കാലത്തും ഇന്ത്യയെ ചേർത്തുപിടിച്ച ചരിത്രം റഷ്യയ്ക്കുണ്ടെന്നും അദ്ദേഹം ഓർമ്മിപ്പിച്ചു. ന്യൂഡൽഹിയിൽ നടന്ന മ്യൂണിക്ക് സെക്യൂരിറ്റി കോൺഫറൻസിൽ സംസാരിക്കുകയായിരുന്നു അദ്ദേഹം.
നല്ല ചരിത്രമായാലും മോശം ചരിത്രമായാലും അത് ആളുകൾ അങ്ങനെ എളുപ്പത്തിൽ മറക്കില്ലെന്ന് ചൂണ്ടിക്കാട്ടിയ ജയ്ശങ്കർ, 1950-കൾ മുതൽ റഷ്യയുമായി തുടരുന്ന ചരിത്രപരമായ സഖ്യമാണ് ഇപ്പോഴും നയതന്ത്ര തീരുമാനങ്ങളെ സ്വാധീനിക്കുന്നതെന്ന് വ്യക്തമാക്കി. 1971-ലെ ഇന്ത്യ-പാകിസ്താൻ യുദ്ധകാലത്ത് അമേരിക്ക പാകിസ്താന് അനുകൂലമായി ബംഗാൾ ഉൾക്കടലിലേക്ക് നാവികസേനയെ അയച്ചപ്പോൾ സോവിയറ്റ് യൂണിയൻ ഇന്ത്യയ്ക്ക് നൽകിയ ചരിത്രപരമായ പിന്തുണയെ പരസ്യമായി പരാമർശിച്ചായിരുന്നു വിദേശകാര്യ മന്ത്രിയുടെ പ്രതികരണം. റഷ്യയെക്കുറിച്ചുള്ള യൂറോപ്പിന്റെ കാഴ്ചപ്പാട് ഇന്ത്യ അംഗീകരിക്കണമെന്ന് പ്രതീക്ഷിക്കാനാകില്ലെന്നും, സ്വന്തം അനുഭവങ്ങളുടെ വെളിച്ചത്തിലാണ് ഓരോ രാജ്യവും മറ്റ് രാജ്യങ്ങളുമായുള്ള ബന്ധത്തെ വിലയിരുത്തുന്നതെന്നും അദ്ദേഹം ഓർമ്മിപ്പിച്ചു. ഇന്ത്യയെ സംബന്ധിച്ചിടത്തോളം റഷ്യയുമായുള്ള ബന്ധം എന്നും തികച്ചും പോസിറ്റീവായ അനുഭവങ്ങൾ മാത്രമാണ് സമ്മാനിച്ചിട്ടുള്ളത്.
ഉക്രെയ്ൻ യുദ്ധ പശ്ചാത്തലത്തിൽ റഷ്യയിൽ നിന്ന് ക്രൂഡോയിൽ വാങ്ങുന്നതിനെച്ചൊല്ലിയുള്ള യു.എസിന്റെയും യൂറോപ്യൻ രാജ്യങ്ങളുടെയും വിമർശനങ്ങൾ പൂർണ്ണമായും അനാവശ്യമാണെന്ന് ഇന്ത്യ ആവർത്തിച്ചു. ആഗോള വിപണിയിലെ വിലക്കയറ്റം തടയാൻ ഇന്ത്യ റഷ്യൻ എണ്ണ വാങ്ങണമെന്ന് തുടക്കത്തിൽ ആവശ്യപ്പെട്ടത് അമേരിക്ക തന്നെയാണെന്ന് വിദേശകാര്യ മന്ത്രാലയം ചൂണ്ടിക്കാട്ടി. രാജ്യത്തെ സാധാരണക്കാരായ ഉപഭോക്താക്കളുടെ താൽപ്പര്യ സംരക്ഷണത്തിനാണ് ഇന്ത്യ മുൻഗണന നൽകുന്നതെന്നും ഇന്ധന ഇറക്കുമതിക്കായി ഒന്നിലധികം സ്രോതസ്സുകളെ ആശ്രയിക്കുന്ന നയമാണ് രാജ്യം തുടരുന്നതെന്നും പാർലമെന്ററി ഉപദേശക സമിതി യോഗത്തിൽ ജയ്ശങ്കർ വ്യക്തമാക്കി.
അതേസമയം, ഉക്രെയ്ൻ യുദ്ധത്തിൽ ചർച്ചകളിലൂടെയും നയതന്ത്രത്തിലൂടെയും സമാധാനം പുനഃസ്ഥാപിക്കണമെന്നാണ് ഇന്ത്യയുടെ നിലപാടെന്ന് അദ്ദേഹം വ്യക്തമാക്കി. യുദ്ധം അവസാനിപ്പിക്കാൻ റഷ്യയുമായും ഉക്രെയ്നുമായും ഇന്ത്യ നിരന്തരം ആശയവിനിമയം നടത്തുന്നുണ്ട്. ‘ഇത് യുദ്ധത്തിന്റെ യുഗമല്ല’ എന്ന പ്രധാനമന്ത്രി നരേന്ദ്ര മോദിയുടെ മുൻ പ്രസ്താവനയും, ‘അനന്തമായി നീളുന്ന യുദ്ധങ്ങൾ അവസാനിപ്പിക്കാൻ സമയമായി’ എന്ന് അടുത്തിടെ വ്ളാഡിമിർ പുടിനോട് മോദി വ്യക്തമാക്കിയ കാര്യവും ജയ്ശങ്കർ എടുത്തുപറഞ്ഞു. സൈനിക, ആണവ സഹകരണങ്ങൾക്കപ്പുറം വ്യാപാരം, ഊർജ്ജം, വിഭവങ്ങൾ എന്നീ മേഖലകളിലും റഷ്യയുമായുള്ള തന്ത്രപ്രധാന ബന്ധം ശക്തമായി മുന്നോട്ടുപോകുമെന്നും അദ്ദേഹം കൂട്ടിച്ചേർത്തു.
