കൊച്ചി: വ്യവസായിയെ തട്ടിക്കൊണ്ടുപോയി ഭീഷണിപ്പെടുത്തിയ കേസില്‍ പൊലീസില്‍ കീഴടങ്ങിയ സിപിഎം നേതാവും കളമശ്ശേരി മുന്‍ ഏരിയ സെക്രട്ടറിയുമായിരുന്ന സക്കീര്‍ ഹുസൈനെ കോടതിയില്‍ ഹാജരാക്കി. എറണാകുളം ജനറല്‍ ആശുപത്രിയില്‍ വൈദ്യപരിശോധനക്ക് വിധേയനാക്കിയ ശേഷമാണ് കോടതിയില്‍ എത്തിച്ചത്. ജാമ്യം ഇന്നു തന്നെ പരിഗണിക്കണമെന്ന് ഹൈകോടതി നിര്‍ദ്ദേശിച്ചിരുന്നു.
എന്നാല്‍ സക്കീറിനെ കസ്റ്റഡിയില്‍ വിട്ടുകിട്ടണമെന്ന് പൊലീസ് ആവശ്യപ്പെടില്ല. കസ്റ്റഡി ആവശ്യപ്പെടാന്‍ കഴിയില്ലെന്നാണ് പൊലീസിന് ലഭിച്ച നിയമോപദേശം. സക്കീര്‍ ഹുസൈന്‍ ഇന്ന് രാവിലെ എട്ടുമണിയോടെയാണ് കൊച്ചി പൊലീസ് കമ്മീഷണര്‍ ഓഫീസിലെത്തി കീഴടങ്ങിയത്. മാധ്യമങ്ങളെ മുന്നില്‍ പെടാതെ കാര്‍ പാര്‍ക്കിങ്ങ് ഏരിയയിലൂടെ രഹസ്യമായാണ് ഓഫീസിനകത്ത് കടന്നത്. കേസില്‍ മുന്‍കൂര്‍ ജാമ്യംതേടി തിങ്കളാഴ്ച ഹൈകോടതിയെ സമീപിച്ചപ്പോള്‍ ഒരാഴ്ചക്കകം അന്വേഷണ ഉദ്യോഗസ്ഥന്‍ മുമ്പാകെ കീഴടങ്ങാന്‍ നിര്‍ദേശിച്ചിരുന്നു. വ്യവസായിയെ തട്ടിക്കൊണ്ടുപോയ ഭീഷണിപ്പെടുത്തിയ കേസില്‍ പൊലീസ് ഒക്‌ടോബര്‍ 26നാണ് കേസെടുത്തത്. 22 ദിവസമായി ഒളിവിലായിരുന്നു. സക്കീര്‍ ഹുസൈന്‍ പൊലീസ് മുമ്പാകെ കീഴടങ്ങണമെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ തന്നെ കഴിഞ്ഞ ദിവസം ആവശ്യപ്പെട്ടിരുന്നു.
കേസിലെ ഒന്നാം പ്രതിയാണ് സക്കീര്‍ ഹുസൈന്‍. കേസിലെ രണ്ടും മൂന്നും പ്രതികളായ കറുകപ്പള്ളി സിദ്ദിഖും ഫൈസലും റിമാന്‍ഡിലാണ്. നാലാം പ്രതി ഷീല തോമസിനെതിരെ പൊലീസ് ഇതുവരെ നടപടി എടുത്തിട്ടില്ല. ഒളിവിലായിരുന്ന സക്കീര്‍ ഹുസൈന്‍ ഏരിയ കമ്മിറ്റി ഓഫീസിലെത്തിയത് വിവാദമായിരുന്നു.
Discussion about this post