ലേ: ലഡാക്ക് ലഫ്. ഗവർണറായി ബ്രിഗേഡിയർ ബി.ഡി മിശ്ര (റിട്ട.) ചുമതലയേറ്റു. ലേയിലെ രാജ് നിവാസിൽ നടന്ന ചടങ്ങിൽ ജമ്മു-കശ്മീർ ആൻഡ് ലഡാക്ക് ഹൈക്കോടതി ചീഫ് ജസ്റ്റീസ് എൻ കൊടീശ്വർ സിംഗ് സത്യവാചകം ചൊല്ലിക്കൊടുത്തു. നേരത്തെ അരുണാചൽ പ്രദേശിലെ ഗവർണർ ആയിരുന്നു.
2019 ഒക്ടോബർ 19 ന് ചുമതലയേറ്റ രാധാകൃഷ്ണ മാഥൂരിന് ശേഷം ലഡാക്കിൽ നിയമിതനാകുന്ന രണ്ടാമത്തെ ലഫ്. ഗവർണർ ആണ് ബി.ഡി മിശ്ര. ഫെബ്രുവരി 11 നാണ് രാധാകൃഷ്ണ മാഥൂർ രാജിവെച്ചത്.
കാർഗിൽ ആൻഡ് ലേ ഓട്ടോണമസ് ഹിൽ ഡെവലപ്‌മെന്റ് കൗൺസിൽസിലെ എക്‌സിക്യൂട്ടീവ് കൗൺസിലർമാരും ലഡാക്ക് എംപിയും ഭരണ നിർവ്വഹണവകുപ്പിലെ ഉദ്യോഗസ്ഥരും ഉൾപ്പെടെ സത്യപ്രതിജ്ഞാ ചടങ്ങിൽ പങ്കെടുത്തിരുന്നു. ലഡാക്ക് പോലീസ് ഗാർഡ് ഓഫ് ഓണർ നൽകിയാണ് ലഫ്. ഗവർണറെ സ്വീകരിച്ചത്.
2019 ൽ ആർട്ടിക്കിൾ 370 റദ്ദാക്കിയതോടെ ജമ്മു കശ്മീരിനെയും ലഡാക്കിനെയും രണ്ട് കേന്ദ്രഭരണ പ്രദേശങ്ങളാക്കി മാറ്റിയിരുന്നു.
എൻഎസ്ജിയുടെ ബ്ലാക്ക് ക്യാറ്റ് കമാൻഡോ വിഭാഗത്തിന്റെ കമാൻഡർ ആയിരുന്നു ബി.ഡി മിശ്ര. ഉത്തർപ്രദേശ് സ്വദേശിയാണ്. 1962 ൽ ചൈനയ്‌ക്കെതിരായ യുദ്ധത്തിലും 65 ൽ പാകിസ്താനെതിരെയും 71 ൽ ബംഗ്ലാദേശ് വിമോചന സമരത്തിലും പങ്കെടുത്തിട്ടുണ്ട്. 33 വർഷത്തെ സൈനിക സേവനത്തിന് ശേഷം 1995 ജനുവരി 31 നാണ് വിരമിച്ചത്.
Discussion about this post