ന്യൂഡൽഹി: ഫോൺ പേ വഴി ഇന്ത്യൻ ബാങ്ക് അക്കൗണ്ടുകളിൽ നിന്നും ഇനി വിദേശരാജ്യങ്ങളിലെ മർച്ചന്റ് അക്കൗണ്ടുകളിലേക്കും പേമെന്റ് നടത്താം. നാഷണൽ പേമെന്റ്‌സ് കോർപ്പറേഷന്റെ ഇന്റർനാഷണൽ പേമെന്റ്‌സ് ലിമിറ്റഡ് ആവിഷ്‌കരിച്ച യുപിഐ ഇന്റർനാഷണൽ സംവിധാനം വഴിയാണ് സൗകര്യം ലഭ്യമാക്കുക. യുഎഇ, സിംഗപ്പൂർ, മൗറീഷ്യസ്, നേപ്പാൾ, ഭൂട്ടാൻ തുടങ്ങിയ രാജ്യങ്ങളിലെ മർച്ചന്റ് ഔട്ട്‌ലെറ്റുകളിലാണ് ഇടപാട് നടത്താനാകുക.
ഇന്റർനാഷണൽ യുപിഐ പേമെന്റ് സംവിധാനം വിനിയോഗിക്കുന്ന ഇന്ത്യയിലെ ആദ്യ മൊബൈൽ പേമെന്റ് ആപ്പ് ആണ് ഫോൺപേ. നേരത്തെ ഫോറെക്‌സ് കാർഡ് ഉപയോഗിച്ച് മാത്രമായിരുന്നു ഇത്തരത്തിൽ ഇടപാട് നടത്താനാകുമായിരുന്നത്. ഇന്റർനാഷണൽ ഡെബിറ്റ് കാർഡുകൾക്ക് സമാനമായി പുതിയ സംവിധാനം ഉപയോക്താക്കൾക്ക് ഉപയോഗിക്കാനാകുമെന്ന് ഫോൺ പേ അറിയിച്ചു.
ഈ സൗകര്യം ലഭ്യമായ വിദേശ രാജ്യങ്ങളിൽ സന്ദർശനം നടത്തുന്ന ഇന്ത്യക്കാർക്ക് മെർച്ചന്റ് ഔട്ട്്‌ലെറ്റുകളിൽ ഇനി ഈസിയായി പേമെന്റുകൾ നടത്താനാകുമെന്ന് ഫോൺപേ സിടിഒ രാഹുൽ ചാരി പറഞ്ഞു. ഇന്ത്യയിലെ മുൻനിര മൊബൈൽ പേമെന്റ് ആപ്പുകളിൽ ഒന്നാണ് ഫോൺപേ. നാഷണൽ പേമെന്റ്‌സ് കോർപ്പറേഷന്റെ ഡിസംബറിലെ കണക്ക് അനുസരിച്ച്് 6.39 ലക്ഷം കോടി രൂപയുടെ ട്രാൻസാക്ഷനാണ് ഫോൺ പേ വഴി നടന്നിട്ടുളളത്.
യുപിഐ ഇന്റർനാഷണൽ സൗകര്യം ഇക്കൊല്ലം കൂടുതൽ രാജ്യങ്ങളിലേർപ്പെടുത്താനാണ് നാഷണൽ പേമെന്റ്‌സ് കോർപ്പറേഷൻ ലക്ഷ്യമിടുന്നത്.
Discussion about this post