കടുത്ത വയറുവേദനയ്ക്ക് ചികിത്സ തേടി ആശുപത്രിയിലെത്തിയ 22കാരന്റെ വയറ്റില്‍ കണ്ടെത്തിയത് വിചിത്ര വസ്തുക്കള്‍. കത്തിയും കീ ചെയിനും അടക്കമുളള ലോഹവസ്തുക്കളാണ് ഇയാളുടെ വയറില്‍ നിന്ന് ഡോക്ടര്‍മാര്‍ കണ്ടെത്തിയത്. . ബിഹാറിലെ ഈസ്റ്റ് ചമ്പാരന്‍ ജില്ലയിലാണ് ഈ സംഭവം. വസ്തുക്കളെല്ലാം ശസ്ത്രക്രിയയിലൂടെ വയറ്റില്‍ നിന്നും നീക്കം ചെയ്‌തെന്നും യുവാവ് സുഖം പ്രാപിച്ച് വരികയാണെന്നും ഡോക്ടര്‍മാര്‍ അറിയിച്ചു.
ഏതാനും ദിവസങ്ങള്‍ക്ക് മുന്‍പാണ് മോതിഹാരി ജില്ലാ ആസ്ഥാനമായുളള ആശുപത്രിയില്‍ സഹിക്കാനാകാത്ത വയറുവേദനയുമായി യുവാവ് എത്തുന്നത്. എക്‌സ്‌റേ എടുത്ത് നോക്കിയപ്പോഴാണ് യുവാവിന്റെ വയറിനകത്ത് നിരവധി ലോഹവസ്തുക്കളുണ്ടെന്ന് കണ്ടെത്തിയത്.
ശസ്ത്രക്രിയയില്‍ ആദ്യം കണ്ടെത്തിയത് ഒരു കീ ചെയിനായിരുന്നു. പിന്നാലെ 2 താക്കോലുകളും നാലിഞ്ച് വലുപ്പം വരുന്ന ഒരു കത്തിയും രണ്ട് നഖംവെട്ടിയും കണ്ടെത്തി. ഇതെല്ലാം ശസ്ത്രക്രിയ വഴി യുവാവിന്റെ വയറ്റില്‍ നിന്നും നീക്കം ചെയ്തു. യുവാവിനോട് ഇതെല്ലാം എങ്ങനെ വയറ്റിലെത്തി എന്നു ചോദിച്ചപ്പോള്‍ തനിക്ക് ലോഹ വസ്തുക്കള്‍ വിഴുങ്ങുന്ന ശീലമുണ്ടെന്നായിരുന്നു മറുപടി.
ഇതൊരുതരം മാനസിക പ്രശ്‌നമാണെന്നും ചികില്‍സിച്ച് ഭേദമാക്കാനാകുമെന്നും ഡോക്ടര്‍ അറിയിച്ചു. അതേസമയം ശസ്ത്രക്രിയ വിജയകരമാണെന്നും ഉടനെ തന്നെ യുവാവ് ഡിസ്ചാര്‍ജ് ആകുമെന്നും ഡോക്ടര്‍ വ്യക്തമാക്കി.
Discussion about this post