സച്ചിന്റെ റെക്കോഡുകൾ ഒന്നൊന്നായി തകർത്ത് കോഹ്‌ലി; സാമൂഹ്യ മാദ്ധ്യമങ്ങളിൽ ചർച്ച കൊഴുക്കുന്നു; ആരാണ് ക്രിക്കറ്റിലെ ദൈവം – കിംഗോ മാസ്റ്റർ ബ്ലാസ്റ്ററോ ?

ന്യൂഡൽഹി : ലോക റെക്കോഡുകൾ ഒന്നൊന്നായി തകർത്ത് മുന്നേറുകയാണ് മുൻ ഇന്ത്യൻ നായകനും സ്റ്റാർ ബാറ്റ്സ്മാനുമായ വിരാട് കോഹ്‌ലി. ഇന്ത്യയിൽ ഏറ്റവും കൂടുതൽ സെഞ്ച്വറി എന്ന സച്ചിൻ ടെണ്ടുൽക്കറിന്റെ റെക്കോഡാണ് കോഹ്‌ലി തകർത്തത്. ഇന്ത്യയിൽ സച്ചിൻ 20 സെഞ്ച്വറിയാണ് നേടിയത്. ഇന്ന് കാര്യവട്ടത്ത് ശ്രീലങ്കക്കെതിരെ തകർപ്പൻ സെഞ്ച്വറി നേടിയതോടെ കോഹ്ലി ഇന്ത്യയിൽ 20 സെഞ്ച്വറി നേടിക്കഴിഞ്ഞു.

ഏതെങ്കിലും ഒരു രാജ്യത്തിനെതിരെ ഏറ്റവും കൂടുതൽ സെഞ്ച്വറി എന്ന സച്ചിന്റെ റെക്കോഡും കോഹ്ലി തകർത്തു. ഇന്നത്തെ സെഞ്ച്വറിയോടെ ശ്രീലങ്കക്കെതിരെ കോഹ്‌ലിയുടെ കണക്കിൽ പത്ത് സെഞ്ച്വറികളായി. ഓസ്ട്രേലിയക്കെതിരെ 9 സെഞ്ച്വറികൾ എന്ന സച്ചിന്റെ റെക്കോഡാണ് തകർന്നത്. നേരത്തെ വിൻഡീസിനെതിരെ 9 സെഞ്ച്വറികൾ നേടി കോഹ്ലി സച്ചിനൊപ്പമെത്തിയിരുന്നു.

ഏകദിനത്തിൽ ഏറ്റവും കൂടുതൽ സെഞ്ച്വറി എന്ന സച്ചിന്റെ റെക്കോഡ് തകർക്കാൻ കോഹ്ലിക്കിനി 4 സെഞ്ച്വറികൾ കൂടി മതി. ഈ ഫോമിൽ തുടരുകയാണെങ്കിൽ ഈ വർഷം തന്നെ കോഹ്ലി സച്ചിന്റെ റെക്കോഡ് തകർത്തേക്കും. ആകെ നൂറു സെഞ്ച്വറികൾ എന്ന റെക്കോഡിന് ഇനിയും 26 എണ്ണം പിറകിലാണ് കോഹ്‌ലി.വെറും 258 ഇന്നിംഗ്ദ് കളിച്ചാണ് കോഹ്‌ലി 46 സെഞ്ച്വറികൾ നേടിയതെങ്കിൽ സച്ചിന്റെ 49 സെഞ്ച്വറികൾ പിറന്നത് 452 ഇന്നിംഗ്സുകളിൽ നിന്നാണ്. ഏകദിനത്തിൽ സച്ചിന്റെ ആവറേജ് 44.83 ആകുമ്പോൾ കോഹ്‌ലിയുടേത് 58 നടുത്താണ്.

ടെസ്റ്റ് മത്സരങ്ങളിൽ കോഹ്‌ലിയുടെ ആവറേജും സെഞ്ച്വറികളുടെ എണ്ണവും സച്ചിനെക്കാൾ വളരെ പിറകിലാണ്. കോഹ്‌ലി ഇതുവരെ 27 സെഞ്ച്വറികൾ നേടിയപ്പോൾ സച്ചിന്റെ സെഞ്ച്വറികളുടെ എണ്ണം 51 ആണ്. സച്ചിന്റെ ആവറേജ് 53.78 ഉം കോഹ്‌ലിയുടേത് 48.9 ഉം ആണ്. ആകെ അന്താരാഷ്ട്ര കളികളിലെ റൺ നേട്ടം പരിശോധിച്ചാലും കോഹ്‌ലി പിറകിലാണ്. കോഹ്‌ലി ടി 20 യും കൂടി ചേർത്ത് 24,715 റൺസ് നേടിയപ്പോൾ സച്ചിൻ 34,357 റൺസ് നേടിയിട്ടുണ്ട്.

കോഹ്‌ലി റെക്കോഡുകൾ തകർക്കാൻ തുടങ്ങിയതോടെ സച്ചിനാണോ കോഹ്‌ലിയാണോ മികച്ചത് എന്ന ചർച്ച സാമൂഹ്യ മാദ്ധ്യമങ്ങളിൽ കൊഴുക്കുകയാണ്. സച്ചിന്റെ കാലത്തെ ലോകോത്തര ബൗളർമാരല്ല ഇപ്പോൾ ഉള്ളതെന്നാണ് സച്ചിൻ ആരാധകരുടെ മറുപടി. മാത്രമല്ല അന്ന് ബാറ്റ്സ്മാനു അനുകൂലമായി ഇത്രയും നിയമങ്ങളും ഉണ്ടായിരുന്നില്ല. സച്ചിൻ തന്നെ പലവട്ടം തെറ്റായ അമ്പയറിംഗ് തീരുമാനത്തിൽ പുറത്ത് പോകേണ്ടി വന്നിട്ടുണ്ട്. എന്നാൽ ഇപ്പോഴത്തെ കളികളിൽ റിവ്യൂ സിസ്റ്റം ബാറ്റ്സ്മാനെ സഹായിക്കുന്നുണ്ട്. എന്നാൽ സ്പീഡും കൃത്യതയുമുള്ള ബൗളർമാരും അവരെ പിന്തുണച്ച് കിടിലൻ ഫീൽഡർമാരുമുള്ള കാലമാണ് ഇതെന്നാണ് കോഹ്‌ലി ആരാധകർ ഇതിനു മറുപടിയായി പറയുന്നത്.

സച്ചിനോട് താരതമ്യം ചെയ്യാൻ ലോക ക്രിക്കറ്റിൽ നിലവിൽ ആരുമില്ലെന്നും ഇനി അങ്ങനെ ഒരാൾ ഉണ്ടാകില്ലെന്നുമാണ് ബഹുഹൂരിപക്ഷം ക്രിക്കറ്റ് പ്രേമികളുടേയും അഭിപ്രായം. എങ്കിലും സച്ചിന്റെ ക്രിക്കറ്റ് ദൈവം എന്ന പദവിക്ക് ഇളക്കം തട്ടുകയാണെന്ന മറുപടികളും ഉയരുന്നുണ്ട്.