തമിഴ്‌നാടുമായി അതിർത്തി പങ്കിടുന്നത് കൊണ്ടു തന്നെ പാലക്കാടൻ രുചിപ്പെരുമയിൽ ഒരു തമിഴ് ടച്ചും കലർന്നിട്ടുണ്ടെന്ന് പറയാം. തമിഴ് മക്കളുടെ പല വിഭവങ്ങളും കേരളീയവത്ക്കരിച്ച് വിളമ്പുക മാത്രമല്ല , പാലക്കാടിന് സ്വന്തമായും പല വിഭവങ്ങളുണ്ട്. അതിൽ നാലുമണി പലഹാരമായി കഴിക്കാവുന്ന ഒന്നാണ് അപ്പം. സാധാരണ പച്ചരിയും തേങ്ങയും പാലും ചേർത്ത് അരച്ചുണ്ടാക്കുന്ന പാലപ്പമല്ല ഇത്. പനിയാരം, പണിയാരം എന്നിങ്ങനെയല്ലാം അറിയപ്പെടുന്ന ഇത് ഉണ്ടാക്കുന്ന രീതി തന്നെ വ്യത്യസ്തമാണ്. പാലക്കാടൻ അപ്പം എന്ന് പറയുമ്പോൾ തന്നെ പാലപ്പം എന്ന് തെറ്റിദ്ധരിച്ച് പോയവർക്ക് പനിയാരം എന്ന വിഭവമുണ്ടെന്ന് അറിയുന്നത് ഏറെ കൗതുകമായി തോന്നാം
ചിന്തമണി പനിയാരം ഉണ്ടാക്കുന്ന വിധം
ചേരുവകൾ;
പൊന്നി അരി, ഇഡ്ഡലി അരി, പച്ചരി, കടല പരിപ്പ്, ഉഴുന്ന് പരിപ്പ്, തുവര പരിപ്പ് എന്നിവ 1/2 ഗ്ലാസ് വീതം നന്നായി കഴുകി ഒരു രാത്രി മുഴുവൻ വെള്ളത്തിൽ കുതിർത്തു വയ്ക്കുക. വറ്റൽ മുളക് – 3 എണ്ണം, ഉപ്പ് – 1 1/4 ടീ സ്പൂൺ , മല്ലിയില -ആവശ്യത്തിന് , വെളിച്ചെണ്ണ -1 ടേബിൾ സ്പൂൺ, കടുക് – 1 ടീസ്പൂൺ, ചെറിയ ഉള്ളി -7-8 എണ്ണം, പച്ചമുളക്- 4 എണ്ണം.
തയ്യാറാക്കുന്ന വിധം
കുതിർത്തെടുത്ത അരിയും, ധാന്യങ്ങളും, വറ്റൽ മുളകും ചേർത്ത് മിക്‌സിയിൽ അരച്ചെടുക്കുക. അരച്ചെടുത്ത മാവിൽ ഉപ്പ് ചേർത്ത് നന്നായി ഇളക്കി യോജിപ്പിക്കു. ഇതിന് ശേഷം മാവ് 6 മണിക്കൂർ പുളിക്കാനായി വയ്ക്കുക. ഒരു ചീനചട്ടിയിൽ വെളിച്ചെണ്ണ ചൂടാക്കി കടുക് പൊട്ടിച്ചു ചെറിയ ഉള്ളിയും പച്ച മുളകും അരിഞ്ഞു കഷണങ്ങളാക്കി ചട്ടിയിലേക്കിട്ട് വഴറ്റുക. ഈ വറുത്തെടുത്ത ചേരുവ മല്ലിയിലക്കൊപ്പം പുളിപ്പിച്ച മാവിൽ കലർത്തി ഇളക്കുക. ഉണ്ണിയപ്പച്ചട്ടി ചൂടാക്കി 1 ടേബിൾ സ്പൂൺ വീതം എള്ളെണ്ണ ഓരോ കുഴിയിലും ഒഴിച്ച് ചൂടായശേഷം ഓരോ തവി മാവ് ഓരോന്നിലും ഒഴിച്ച് രണ്ട് പുറവും 2 മിനിറ്റ് വീതം ചുട്ടെടുക്കുക.
പാൽ പണിയാരം
ഒരു കപ്പ് പച്ചരി, മുക്കാൽ കപ്പ് ഉഴുന്ന്, തേങ്ങാപ്പാൽ, ഉപ്പ്, അഞ്ച് സ്പൂൺ പഞ്ചസാര, മൂന്ന് ഏലയ്ക്ക, കുക്കിംഗ് ഓയിൽ,
തയ്യാറാക്കുന്ന വിധം
ഒരു കപ്പ് പച്ചരി, മുക്കാൽ കപ്പ് ഉഴുന്നു പരിപ്പ് എന്നിവ നന്നായി കഴുകി 4 മണിക്കൂർ കുതിരാൻ വയ്ക്കുക. ശേഷം നന്നായി അരച്ച് ഇഡലി മാവിന്റെ പരുവത്തിലാക്കുക. ഒരു തേങ്ങയുടെ പാൽ മുഴുവനും എടുക്കുക. അതിലേക്ക് അഞ്ച് സ്പൂൺ പഞ്ചസാരയും ഒരു നുള്ള് ഉപ്പും, മൂന്ന് ഏലയ്ക്ക് പൊടിച്ചതും ചേർത്ത് ഇളക്കി യോജിപ്പിക്കുക.
കുക്കിംഗ് ഒായിൽ ചൂടാക്കിയ ശേഷം മാവ് ഒരു സ്പൂൺ ഉപയോഗിച്ച് കുഞ്ഞ് കുഞ്ഞ് ഉരുളകളാക്കി ഒഴിച്ച് വേവിക്കുക. ഗോൾഡൻ ബ്രൗൺ പരുവമാകുമ്പോൾ മാറ്റി വയ്ക്കുക.
ഒരു പാത്രത്തിലേക്ക് വറുത്തെടുത്ത അപ്പം എടുത്ത് അതിലേക്ക് നേരത്തെ തയ്യാറാക്കിയ തേങ്ങാപ്പാൽ ഒഴിച്ച് വച്ച് പത്ത് മിനിറ്റ് വച്ച ശേഷം കഴിക്കാം.
