കാസര്കോട്: മുഖ്യമന്ത്രി എത്തുന്ന പാര്ട്ടി പരിപാടിക്ക് വേദിയൊരുക്കാന് വഴിയരികിലെ തണല് മരങ്ങള് സിപിഎം പ്രവര്ത്തകര് മുറിച്ചു മാറ്റിയെന്ന പരാതിയുമായി നാട്ടുകാര്. കാസര്കോട് പെരിയാട്ടടുക്കത്താണ് സംഭവം. അനുമതിയില്ലാതെ പൊതുമരാമത്ത് വകുപ്പിന്റെ ഉടമസ്ഥതയിലുള്ള അഞ്ച് തണല് മരങ്ങളാണ് മുറിച്ച് മാറ്റിയത്. ഈ മാസം 23ാം തിയതിയാണ് സിപിഎം പനയാല് ലോക്കല് കമ്മറ്റി ഓഫീസ് ഉദ്ഘാടനത്തിനായി മുഖ്യമന്ത്രി പിണറായി വിജയന് പെരിയാട്ടടുക്കത്തെത്തുന്നത്.
വനംവകുപ്പിന്റെയോ പഞ്ചായത്തിന്റെയോ അനുമതി ഇല്ലാതെയാണ് മരങ്ങള് മുറിച്ചു മാറ്റിയതെന്നാണ് നാട്ടുകാരുടെ ആരോപണം. എന്നാല് വഴിയരികില് വൈദ്യുതി ലൈനിനോട് ചേര്ന്ന് അപകടാവസ്ഥയില് വളര്ന്നതോടെയാണ് മരങ്ങള് മുറിച്ചു മാറ്റിയതെന്നാണ് സിപിഎമ്മിന്റെ വിശദീകരണം. സംഭവത്തില് ഇതുവരെ നടപടി എടുക്കാന് പൊതുമരാമത്ത് വകുപ്പോ പഞ്ചായത്ത് അധികൃതരോ തയ്യാറായിട്ടില്ല.












