തിരുവനന്തപുരം: സൂപ്പർ സ്റ്റാർ രജനികാന്ത് കേരളത്തിൽ. പുതിയ ചിത്രം ‘തലൈവർ 170’ ന്റെ ഷൂട്ടിംഗിന് വേണ്ടിയാണ് താരം കേരളത്തിൽ എത്തിയത്. ഉച്ചയോടെ തിരുവനന്തപുരം വിമാനത്താവളത്തിൽ എത്തിയ അദ്ദേഹത്തെ കാണാൻ നിരവധി പേരാണ് തടിച്ചു കൂടിയിരുന്നത്.
വിമാനം ഇറങ്ങിയ രജനികാന്തിനെ വിമാനത്താവളം അധികൃതർ സ്വീകരിച്ചു. അദ്ദേഹത്തിനൊപ്പം അധികൃതരും ജീവനക്കാരും ഫോട്ടോയും എടുത്തു. വിമാനത്താവള അധികൃതരുടെ അകമ്പടിയോടെയാണ് അദ്ദേഹം പുറത്തെത്തി കാറിൽ കയറിയത്.
രജനികാന്തിന്റെ വരവറിഞ്ഞ് നിരവധി ആരാധകരാണ് വിമാനത്താവളത്തിന് പുറത്ത് തടിച്ചു കൂടിയത്. താരത്തെ കണ്ടതും ആരാധകർ ആർപ്പ് വിളിച്ചു. എല്ലാവർക്കും വണക്കമെന്ന് കൈകൂപ്പി പറഞ്ഞതിന് ശേഷമാണ് അദ്ദേഹം വാഹനത്തിൽ കയറിയത്.
തലൈവർ 170 എന്നത് പുതിയ ചിത്രത്തിന് താത്കാലികമായി നൽകിയിരിക്കുന്ന പേരാണ്. ടി.ജെ ജ്ഞാനവേലാണ് ചിത്രം സംവിധാനം ചെയ്യുന്നത്. ലൈക പ്രൊഡക്ഷൻസ് ആണ് നിർമ്മിക്കുന്നത്. പത്ത് ദിവസമാണ് കേരളത്തിലെ സിനിമയുടെ ചിത്രീകരണം. വെള്ളായണി കാർഷിക കോളേജിലും ശംഖുമുഖത്തെ വീട്ടിലുമാണ് ഷൂട്ടിംഗ്. ആദ്യമായിട്ടാണ് ഒരു രജനി ചിത്രം തലസ്ഥാനത്ത് ചിത്രീകരിക്കുന്നത്. മഞ്ജു വാര്യർ, ഫഹദ് ഫാസിൽ, റിതിതക സിംഗ്, റാണ ദുഗ്ഗുബാട്ടി തുടങ്ങി വൻ താര നിരതന്നെ ചിത്രത്തിൽ അണിനിരക്കുന്നുണ്ട്.
