കേരളത്തിലെ രാഷ്ട്രീയ ഗോദയിൽ പുതിയ ചർച്ചകൾക്ക് തിരികൊളുത്തി ജമാഅത്തെ ഇസ്ലാമി നേതാവ് മുജീബ് റഹ്മാന്റെ പ്രസ്താവന. കേരളത്തിൽ തങ്ങളുടെ ‘മധുരം’ നുണയാത്ത ഏക പാർട്ടി ബിജെപിയാണെന്നും മറ്റ് പ്രധാന മുന്നണികളെല്ലാം ജമാഅത്തെ ഇസ്ലാമിയുമായി വിവിധ ഘട്ടങ്ങളിൽ സഹകരിച്ചിട്ടുണ്ടെന്നുമുള്ള അദ്ദേഹത്തിന്റെ വെളിപ്പെടുത്തൽ രാഷ്ട്രീയ കേരളത്തിൽ വലിയ ചലനങ്ങളാണ് സൃഷ്ടിക്കുന്നത്. ഇടത്-വലത് മുന്നണികൾ വോട്ട് ബാങ്ക് ലക്ഷ്യമിട്ട് തങ്ങളുമായി അവിശുദ്ധ ബന്ധം പുലർത്തുമ്പോൾ, ബിജെപി മാത്രമാണ് തങ്ങളുടെ പ്രത്യയശാസ്ത്രത്തോടും നിലപാടുകളോടും വിട്ടുവീഴ്ചയില്ലാത്ത അകലം പാലിച്ചതെന്ന് അദ്ദേഹം പരോക്ഷമായി സമ്മതിക്കുന്നു.
കാലാകാലങ്ങളായി കേരളം ഭരിച്ച എൽഡിഎഫും യുഡിഎഫും തിരഞ്ഞെടുപ്പ് വിജയത്തിനായി ജമാഅത്തെ ഇസ്ലാമി പോലുള്ള സംഘടനകളുടെ പിന്തുണ തേടിയിട്ടുണ്ടെന്ന ആക്ഷേപം ബിജെപി നേരത്തെ തന്നെ ഉന്നയിച്ചിരുന്നു. ഈ ആരോപണങ്ങളെ ശരിവെക്കുന്ന രീതിയിലാണ് ഇപ്പോൾ പുറത്തുവന്നിരിക്കുന്ന വെളിപ്പെടുത്തൽ. തങ്ങളെ തീവ്രവാദികളായി മുദ്രകുത്തുമ്പോഴും അധികാരം നിലനിർത്താൻ ഇരുമുന്നണികളും രഹസ്യമായും പരസ്യമായും സഹായം തേടിയിട്ടുണ്ടെന്ന് നേതാവ് വ്യക്തമാക്കുന്നു. എന്നാൽ ബിജെപി തങ്ങളുടെ രാഷ്ട്രീയ നിലപാടുകളിൽ നിന്ന് അണുവിട മാറാതെ ജമാഅത്തെ ഇസ്ലാമിയെ എതിർക്കുന്ന ഏക പാർട്ടിയായി തുടരുന്നുവെന്നത് ശ്രദ്ധേയമാണ്.
മുജീബ് റഹ്മാന്റെ ഈ പ്രസ്താവന വരാനിരിക്കുന്ന തിരഞ്ഞെടുപ്പുകളിൽ വലിയ ആയുധമാക്കാനാണ് ബിജെപി നീക്കം. കേരളത്തിലെ ജനങ്ങളെ വിഡ്ഢികളാക്കി ഇടത്-വലത് മുന്നണികൾ നടത്തുന്ന വർഗീയ പ്രീണന രാഷ്ട്രീയത്തിന്റെ തെളിവാണ് ഇതെന്ന് ബിജെപി നേതൃത്വം ആരോപിക്കുന്നു. ജമാഅത്തെ ഇസ്ലാമിയുമായി സഖ്യമുണ്ടാക്കുന്നവർ രാജ്യസുരക്ഷയെക്കുറിച്ചും ജനാധിപത്യ മൂല്യങ്ങളെക്കുറിച്ചും സംസാരിക്കാൻ അർഹതയില്ലാത്തവരാണെന്നും ബിജെപി കുറ്റപ്പെടുത്തി. ഈ വെളിപ്പെടുത്തലോടെ തങ്ങളുടെ ‘മതനിരപേക്ഷ’ മുഖം നഷ്ടപ്പെടുമോ എന്ന ആശങ്കയിലാണ് കോൺഗ്രസും സി പി എമ്മും.
