വിരാട് കോഹ്‌ലിയുടെ ശാരീരികക്ഷമതയെക്കുറിച്ച് ഉയർന്നു വന്ന അഭ്യൂഹങ്ങൾക്ക് അറുതി വരുത്തിയിരിക്കുകയാണ് ക്രുണാൽ പാണ്ഡ്യ. “വിരാട് കോഹ്‌ലി പൂർണ്ണ ആരോഗ്യവാനാണ്, അദ്ദേഹത്തെക്കുറിച്ച് ആശങ്കപ്പെടേണ്ട കാര്യമൊന്നുമില്ല. അദ്ദേഹം ഉടൻ തന്നെ ശക്തമായി തിരിച്ചെത്തും,” എന്ന് ക്രുണാൽ പാണ്ഡ്യ വ്യക്തമാക്കി. കോഹ്‌ലിക്ക് ചെറിയ പരിക്കുണ്ടെന്ന വാർത്തകൾ പ്രചരിക്കുന്നതിനിടെയാണ് ക്രുണാലിന്റെ ഈ വെളിപ്പെടുത്തൽ.
ആർസിബിയുടെ നട്ടെല്ലായ വിരാട് കോഹ്‌ലി ഈ സീസണിലും മികച്ച ഫോമിലാണ്. എന്നാൽ ഇന്നലെ ആർസിബിയുടെ മുംബൈക്കെതിരായ മത്സരത്തിൽ കോഹ്‌ലി ഫീൽഡിങ്ങിന് ഇറങ്ങിയിരുന്നില്ല. ബാറ്റിംഗിനിടെ തന്നെ അസ്വസ്ഥത പ്രകടപ്പിച്ച അദ്ദേഹം പരിക്കുപറ്റിയതിനാലാണ് കളത്തിൽ വരാതിരുന്നത്. എന്നാൽ ഇതൊന്നും കാര്യമാക്കേണ്ടതില്ലെന്നും കോഹ്‌ലി അടുത്ത മത്സരത്തിന് സജ്ജനാണെന്നുമാണ് ക്രുണാൽ നൽകുന്ന സൂചന.
വിരാട് കോഹ്‌ലിയുടെ കാര്യത്തിൽ വന്ന പോസിറ്റീവ് അപ്ഡേറ്റ് പോലെ ആർസിബി ആരാധകർക്ക് സന്തോഷ രാവായിരുന്നു ഇന്നലെയും. റോയല്‍ ചലഞ്ചേഴ്‌സ് ബെംഗളൂരുവിനെതിരെ 18 റണ്‍സിന്റെ തോല്‍വിയാണ് മുംബൈ നേരിട്ടത്. മുംബൈ, വാംഖഡെ സ്‌റ്റേഡിയത്തില്‍ ടോസ് നഷ്ടപ്പെട്ട് ബാറ്റിംഗിനെത്തിയ ആര്‍സിബി നാല് വിക്കറ്റ് നഷ്ടത്തില്‍ 240 റണ്‍സാണ് നേടിയത്. ഫില്‍ സാള്‍ട്ട് (36 പന്തില്‍ 78), രജത് പടിധാര്‍ (20 പന്തില്‍ 53), വിരാട് കോലി (38 പന്തില്‍ 50) എന്നിവരുടെ ഇന്നിംഗ്‌സുകളാണ് ആര്‍സിബിയെ മികച്ച സ്‌കോറിലേക്ക് നയിച്ചത്. മറുപടി ബാറ്റിംഗില്‍ മുംബൈക്ക് അഞ്ച് വിക്കറ്റ് നഷ്ടത്തില്‍ 222 റണ്‍സെടുക്കാനാണ് സാധിച്ചത്.
ഈ ജയത്തോടെ ആർസിബി പോയിന്റ് പട്ടികയിൽ മൂന്നാം സ്ഥാനത്ത് വന്നു. മുംബൈയാകട്ടെ സീസണിൽ വെറും ഒരു ജയവുമായി എട്ടാം സ്ഥാനത്താണ്.
