തമിഴ്‌നാട്ടിലെ വാൽപ്പാറയിലുണ്ടായ അതിദാരുണമായ വാഹനാപകടത്തിൽ മലപ്പുറം സ്വദേശികളായ ഒമ്പത് പേർ മരിച്ച സംഭവത്തിൽ രാജ്യം നടുങ്ങുന്നു. മലപ്പുറം പാങ് പള്ളിപ്പറമ്പ് ജിഎൽപി സ്കൂളിലെ അധ്യാപകരും ജീവനക്കാരും കുടുംബാംഗങ്ങളും ഉൾപ്പെട്ട വിനോദയാത്ര സംഘമാണ് അപകടത്തിൽപ്പെട്ടത്. വെള്ളിയാഴ്ച പുലർച്ചെ മൂന്ന് മണിയോടെ സ്കൂളിൽ നിന്നും പുറപ്പെട്ട സംഘം വൈകിട്ട് 5.30-ഓടെയാണ് അപകടത്തിൽപ്പെട്ടത്. സംഭവത്തിൽ പ്രധാനമന്ത്രി നരേന്ദ്ര മോദി, മുഖ്യമന്ത്രി പിണറായി വിജയൻ തുടങ്ങിയ പ്രമുഖർ അഗാധമായ ദുഃഖം രേഖപ്പെടുത്തി.
അപകടവിവരമറിഞ്ഞതിൽ അതീവ ദുഃഖമുണ്ടെന്നും പ്രിയപ്പെട്ടവരെ നഷ്ടപ്പെട്ട കുടുംബങ്ങളുടെ വേദനയിൽ പങ്കുചേരുന്നുവെന്നും പ്രധാനമന്ത്രി എക്സിൽ കുറിച്ചു. പരിക്കേറ്റവർ എത്രയും വേഗം സുഖം പ്രാപിക്കട്ടെ എന്ന് പ്രാർത്ഥിക്കുന്നതായും അദ്ദേഹം അറിയിച്ചു. തമിഴ്‌നാട് സർക്കാരുമായി നിരന്തരം ബന്ധപ്പെടുന്നുണ്ടെന്നും മരിച്ചവരുടെ കുടുംബങ്ങൾക്ക് ആവശ്യമായ എല്ലാ സഹായങ്ങളും സർക്കാർ ഉറപ്പാക്കുമെന്നും മുഖ്യമന്ത്രി പിണറായി വിജയൻ വ്യക്തമാക്കി. മന്ത്രി വി. ശിവൻകുട്ടി കോയമ്പത്തൂർ കളക്ടറുമായും എസ്പിയുമായും ബന്ധപ്പെട്ട് തുടർനടപടികൾ ഏകോപിപ്പിക്കുന്നുണ്ട്.
പാങ് പള്ളിപ്പറമ്പ് ജിഎൽപി സ്കൂളിലെ പ്രധാനാധ്യാപിക പുലാമന്തോൾ സ്വദേശിനി അജിത (54), അധ്യാപകരും പാങ് സ്വദേശികളുമായ റംല (52), സുഹറ (43), ആശ (41), മജീദ് (43), അദ്ദേഹത്തിന്റെ ഭാര്യ റുഖിയ (39), ആയ സജിത (45), പാങ് യുപി സ്കൂളിലെ അധ്യാപിക ഷക്കീല (37), സുഹറയുടെ മകൻ ഹിഷാം (12) എന്നിവരാണ് മരിച്ചത്. മരിച്ച സജിതയുടെ മകൻ ഷഹദിൻ (11), സ്കൂൾ ഡ്രൈവർ നൗഷാദ് (39), ട്രാവലർ ഡ്രൈവർ മുഹമ്മദ് ഫാസിത്ത് (21) എന്നിവർ കോയമ്പത്തൂരിലെ ആശുപത്രിയിൽ അതീവ ഗുരുതരാവസ്ഥയിൽ ചികിത്സയിലാണ്. പത്ത് വയസ്സുകാരി മസ്നീൻ പൊള്ളാച്ചിയിലെ ആശുപത്രിയിലും ചികിത്സയിലുണ്ട്.
പ്രതിപക്ഷ നേതാവ് വി.ഡി സതീശൻ, കെ.സി വേണുഗോപാൽ എംപി, കൊടിക്കുന്നിൽ സുരേഷ് എംപി തുടങ്ങിയവരും അപകടത്തിൽ അനുശോചിച്ചു. കേരളത്തെയാകെ കണ്ണീരിലാഴ്ത്തിയ ഈ അപകടത്തിൽ പാങ് ഗ്രാമം ഒന്നടങ്കം വിറങ്ങലിച്ചു നിൽക്കുകയാണ്. മൃതദേഹങ്ങൾ പോസ്റ്റ്‌മോർട്ടം നടപടികൾക്ക് ശേഷം എത്രയും വേഗം നാട്ടിലെത്തിക്കാനുള്ള ശ്രമങ്ങൾ പുരോഗമിക്കുകയാണ്. തമിഴ്‌നാട്ടിലെ ജനപ്രതിനിധികളുമായും ഉദ്യോഗസ്ഥരുമായും ചേർന്ന് രക്ഷാപ്രവർത്തനങ്ങൾക്കും ചികിത്സാ സൗകര്യങ്ങൾക്കുമായി വിപുലമായ ക്രമീകരണങ്ങളാണ് ഏർപ്പെടുത്തിയിരിക്കുന്നത്.
