വർദ്ധിച്ചുവരുന്ന ഭൗമരാഷ്ട്രീയ പ്രതിസന്ധികൾക്കിടയിൽ ആഭ്യന്തര വിതരണ ശൃംഖലയെ സംരക്ഷിക്കുന്നതിനും രൂപയുടെ മൂല്യം ഇടിയുന്നത് തടയുന്നതിനുമായി നിർണ്ണായക ഇറക്കുമതികൾ ഘട്ടംഘട്ടമായി വെട്ടിക്കുറയ്ക്കാൻ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്ര സർക്കാർ വൻ പദ്ധതികൾക്ക് രൂപം നൽകുന്നു. വിദേശ രാജ്യങ്ങളെ അമിതമായി ആശ്രയിക്കുന്ന പ്രധാന ഉൽപ്പന്ന വിഭാഗങ്ങൾ അടിയന്തരമായി കണ്ടെത്താനും അവയ്ക്ക് പകരമായി തദ്ദേശീയമായി നിർമ്മിച്ച ഉൽപ്പന്നങ്ങൾ വിപണിയിലെത്തിക്കാനും പ്രധാനമന്ത്രിയുടെ ഓഫീസ് വിവിധ മന്ത്രാലയങ്ങൾക്ക് കർശന നിർദ്ദേശം നൽകി.
ആഭ്യന്തര ഉൽപ്പാദനം പ്രോത്സാഹിപ്പിക്കുന്നതിനായി വൻതോതിലുള്ള സബ്‌സിഡികളും മറ്റ് സാമ്പത്തിക ആനുകൂല്യങ്ങളും നൽകാനാണ് സർക്കാർ ആലോചിക്കുന്നത്. ഇലക്ട്രോണിക്‌സ്, കെമിക്കലുകൾ, ജീവൻരക്ഷാ മരുന്നുകൾ, വളങ്ങൾ, സെമികണ്ടക്ടറുകൾ, ഓട്ടോമൊബൈൽ ഘടകങ്ങൾ, വൻകിട യന്ത്രസാമഗ്രികൾ എന്നിവയുൾപ്പെടെ നൂറിലധികം ഉൽപ്പന്നങ്ങളുടെ പട്ടിക വാണിജ്യ വ്യവസായ മന്ത്രാലയം ഇതിനോടകം തയ്യാറാക്കിക്കഴിഞ്ഞു.
ആഭ്യന്തര മാനുഫാക്ചറിങ് രംഗത്തിന് പുത്തൻ ഉണർവ് നൽകുന്നതിന്റെ ഭാഗമായി ചിപ്പ്, സ്മാർട്ട്‌ഫോൺ നിർമ്മാണ മേഖലകൾക്കുള്ള സാമ്പത്തിക സഹായം 1.9 ട്രില്യൺ രൂപയായി ഉയർത്താനുള്ള പദ്ധതിക്ക് കഴിഞ്ഞ ദിവസം കേന്ദ്ര മന്ത്രിസഭ അംഗീകാരം നൽകിയിരുന്നു. കൂടാതെ പേർഷ്യൻ ഗൾഫിലെ ഹോർമുസ് കടലിടുക്ക് അടച്ചുപൂട്ടിയതിനെ തുടർന്നുണ്ടായ ക്ഷാമം പരിഹരിക്കാൻ ആഭ്യന്തര വളം ഉൽപ്പാദനം വർദ്ധിപ്പിക്കുന്നതിനുള്ള പുതിയ നയത്തിനും കാബിനറ്റ് അനുമതി നൽകി.
ഇന്ത്യയിലെ നിർമ്മാണ മേഖല, പ്രത്യേകിച്ച് ഓട്ടോമൊബൈൽ, ടെക്നോളജി വ്യവസായങ്ങൾ ചൈനയിൽ നിന്നുള്ള ഇറക്കുമതിയെയാണ് പ്രധാനമായും ആശ്രയിക്കുന്നത്. ഇറാൻ യുദ്ധം മൂലമുണ്ടായ കടുത്ത ഊർജ്ജ പ്രതിസന്ധിയും കുതിച്ചുയരുന്ന ഇറക്കുമതി ബില്ലും ഇന്ത്യൻ രൂപയുടെ മൂല്യം ചരിത്രത്തിലെ ഏറ്റവും താഴ്ന്ന നിലയിലേക്ക് എത്തിച്ച സാഹചര്യത്തിലാണ് സ്വയംപര്യാപ്തത ലക്ഷ്യമിട്ടുള്ള ഈ അടിയന്തര നീക്കം. ഇൻഡസ്ഇൻഡ് ബാങ്ക് ഇക്കണോമിസ്റ്റ് ഗൗരവ് കപൂറിന്റെ വിലയിരുത്തൽ പ്രകാരം വ്യവസായ നയങ്ങൾ ആയുധമാക്കപ്പെടുന്ന ഇന്നത്തെ ആഗോള സാഹചര്യത്തിൽ ഇന്ത്യക്ക് സ്വയംപര്യാപ്തതയല്ലാതെ മറ്റ് വഴികളില്ല.
കഴിഞ്ഞ മാർച്ചിൽ അവസാനിച്ച സാമ്പത്തിക വർഷത്തിൽ ഇന്ത്യ ഏകദേശം 775 ബില്യൺ ഡോളറിന്റെ ഉൽപ്പന്നങ്ങളാണ് ഇറക്കുമതി ചെയ്തത്, ഇതിൽ അഞ്ചിലൊന്നും ചൈനയിൽ നിന്നായിരുന്നു. വ്യാപാര കമ്മി കുറയ്ക്കുന്നതിനൊപ്പം വിദേശനാണ്യ ശേഖരം സംരക്ഷിക്കാനും ചൈനയ്ക്ക് പകരമായി ഇന്ത്യയെ ഒരു ആഗോള നിർമ്മാണ ഹബ്ബാക്കി മാറ്റാനുമാണ് പ്രധാനമന്ത്രി ലക്ഷ്യമിടുന്നത്. യൂറോപ്യൻ യൂണിയൻ ഉൾപ്പെടെയുള്ള പങ്കാളികളുമായുള്ള ഇന്ത്യയുടെ സ്വതന്ത്ര വ്യാപാര കരാറുകൾ പുതിയ നിക്ഷേപങ്ങൾ ആകർഷിക്കാൻ സഹായിക്കുമെന്ന് സാമ്പത്തിക വിദഗ്ധർ ചൂണ്ടിക്കാണിക്കുന്നു. ആർബിഐ മുൻ ഗവർണറും നിലവിൽ പ്രധാനമന്ത്രിയുടെ പ്രിൻസിപ്പൽ സെക്രട്ടറിയുമായ ശക്തികാന്ത ദാസിന്റെ നേതൃത്വത്തിലുള്ള പ്രത്യേക ടാസ്‌ക് ഫോഴ്‌സാണ് ഇറക്കുമതി കുറയ്ക്കുന്നതിനുള്ള ബ്ലൂപ്രിന്റ് തയ്യാറാക്കുന്നത്.
ഇതിലേക്ക് സ്വകാര്യ, വിദേശ നിക്ഷേപകരെ ആകർഷിക്കുന്നതിനൊപ്പം പൊതുമേഖലാ സ്ഥാപനങ്ങളുടെ ഉൽപ്പാദന ശേഷി വർദ്ധിപ്പിക്കാനും നിർദ്ദേശമുണ്ട്. അടുത്ത മൂന്ന് വർഷത്തിനുള്ളിൽ വളം ഇറക്കുമതി 30 ശതമാനം കുറയ്ക്കുകയാണ് സർക്കാരിന്റെ പ്രധാന ലക്ഷ്യം. റഷ്യൻ എണ്ണ വാങ്ങുന്ന ആദ്യ അഞ്ച് രാജ്യങ്ങൾക്ക് മേൽ 100 ശതമാനം വരെ നികുതി ചുമത്താൻ അമേരിക്കൻ പ്രസിഡന്റ് ഡൊണാൾഡ് ട്രംപിന് അധികാരം നൽകുന്ന പുതിയ ഉപരോധ നിർദ്ദേശങ്ങൾ നിലനിൽക്കെ, ക്രൂഡ് ഓയിൽ, സ്വർണം എന്നിവയ്ക്ക് പകരമായി കാർഷിക പരിഷ്കരണങ്ങളിലൂടെ ഭക്ഷ്യ എണ്ണകളുടെയും പരിപ്പ് വർഗ്ഗങ്ങളുടെയും ഇറക്കുമതി കുറയ്ക്കാനാണ് ഇന്ത്യ ഇപ്പോൾ കൂടുതൽ ഊന്നൽ നൽകുന്നത്.
