ഓക്‌ലൻഡിൽ നടന്ന ഒരു പരിപാടിക്കിടെ ഇന്ത്യ ലോകത്തിലെ ഏറ്റവും വലിയ ബീഫ് ഉൽപ്പാദക രാജ്യമാണെന്ന് പ്രധാനമന്ത്രി നരേന്ദ്ര മോദി അവകാശപ്പെട്ടുവെന്ന തരത്തിൽ സോഷ്യൽ മീഡിയയിൽ പ്രചരിക്കുന്ന വീഡിയോ വ്യാജമാണെന്ന് ഫാക്റ്റ് ചെക്ക് റിപ്പോർട്ട്. 2026 ജൂലൈ 11-ന് ന്യൂസിലൻഡിലെ ഓക്‌ലൻഡിലുള്ള സ്പാർക്ക് അരീനയിൽ ഇന്ത്യൻ പ്രവാസികളെ അഭിസംബോധന ചെയ്ത് പ്രധാനമന്ത്രി സംസാരിക്കുന്ന ദൃശ്യങ്ങളാണ് തെറ്റായ അവകാശവാദത്തോടെ വ്യാപകമായി പ്രചരിച്ചത്. ഇന്ത്യ ബീഫ് ഉൽപ്പാദനത്തിൽ മുന്നിലാണെന്ന് മോദി അഭിമാനത്തോടെ പറയുന്നുവെന്നും, എന്നാൽ ഇതിന്റെ പേരിൽ നാട്ടിൽ പാവപ്പെട്ടവരെ അക്രമിക്കുന്നത് എന്തിനാണെന്നും ചോദ്യം ചെയ്തുകൊണ്ട് നിരവധി എക്സ് (ട്വിറ്റർ) ഉപയോക്താക്കളും ഉത്തർപ്രദേശിലെ കോൺഗ്രസ് നേതാവ് ദീപക് സിംഗ് ഉൾപ്പെടെയുള്ളവരും ഈ വീഡിയോ പങ്കുവെച്ചിരുന്നു. പ്രചാരണം ശക്തമായതോടെ ചിലർ പിന്നീട് ഈ പോസ്റ്റുകൾ ഡിലീറ്റ് ചെയ്യുകയും ചെയ്തു.
എന്നാൽ പ്രസ്തുത വീഡിയോ സൂക്ഷ്മമായി പരിശോധിച്ച പ്രമുഖ ഫാക്റ്റ് ചെക്ക് വെബ്‌സൈറ്റായ ആൾട്ട് ന്യൂസ് ഈ പ്രചാരണം പൂർണ്ണമായും വ്യാജമാണെന്ന് കണ്ടെത്തി. പ്രധാനമന്ത്രിയുടെ പ്രസംഗത്തിന്റെ ഓഡിയോ വ്യക്തതയ്ക്കായി വേഗത കുറച്ച് പരിശോധിച്ചപ്പോൾ, “ഇന്ന് ഇന്ത്യ ലോകത്തിലെ ഏറ്റവും വലിയ രണ്ടാമത്തെ ഗോതമ്പ്ഉൽപ്പാദക രാജ്യമാണ്” എന്നാണ് അദ്ദേഹം പറയുന്നതെന്ന് വ്യക്തമായി. പ്രസംഗത്തിലുടനീളം ‘ബീഫ്’ എന്ന വാക്ക് അദ്ദേഹം എവിടെയും ഉപയോഗിച്ചിട്ടില്ല.
പ്രധാനമന്ത്രിയുടെ ഔദ്യോഗിക പ്രസംഗത്തിന്റെ പൂർണ്ണരൂപം പരിശോധിച്ചപ്പോഴും 32.35-ാം മിനിറ്റിൽ അദ്ദേഹം ഗോതമ്പ് ഉൽപ്പാദനത്തെക്കുറിച്ചാണ് സംസാരിക്കുന്നതെന്ന് വ്യക്തമാണ്. കൂടാതെ പ്രസ് ഇൻഫർമേഷൻ ബ്യൂറോ പുറത്തുവിട്ട പ്രസംഗത്തിന്റെ ഔദ്യോഗിക ട്രാൻസ്ക്രിപ്റ്റിലും ഗോതമ്പ് ഉൽപ്പാദനത്തെക്കുറിച്ചുള്ള പരാമർശം മാത്രമാണുള്ളത്. ഇംഗ്ലീഷ് വാക്കായ ‘Wheat’ (ഗോതമ്പ്) എന്നതിനെ തെറ്റായ രീതിയിൽ വ്യാഖ്യാനിച്ചാണ് പ്രധാനമന്ത്രി ബീഫിനെക്കുറിച്ച് സംസാരിച്ചുവെന്ന തരത്തിൽ സോഷ്യൽ മീഡിയയിൽ വ്യാജ പ്രചാരണം അഴിച്ചുവിട്ടതെന്ന് ഇതോടെ തെളിഞ്ഞിരിക്കുകയാണ്.
