പെഷവാർ: ഖൈബർ പഖ്തുൻഖ്വ (KP) പ്രവിശ്യയിൽ അടിയന്തരാവസ്ഥ പ്രഖ്യാപിച്ചതിന് പിന്നാലെ, അനധികൃതമായി താമസിക്കുന്ന അഫ്ഗാൻ പൗരന്മാർക്കെതിരെ അതിശക്തമായ നടപടിക്കൊരുങ്ങി പാകിസ്ഥാൻ സൈന്യവും സുരക്ഷാ സേനയും. നവംബർ ഒന്നു മുതൽ പ്രവിശ്യയിലെ പ്രമുഖ നഗരങ്ങളിൽ സംയുക്ത സുരക്ഷാ സേന വീടുകയറി വ്യാപക പരിശോധന നടത്തുമെന്ന് വിശ്വസനീയ സുരക്ഷാ കേന്ദ്രങ്ങളെ ഉദ്ധരിച്ച് മാധ്യമങ്ങൾ റിപ്പോർട്ട് ചെയ്തു.
അഫ്ഗാനിസ്ഥാനിലെ താലിബാൻ ഭരണകൂടവുമായുള്ള ബന്ധം വഷളായ പശ്ചാത്തലത്തിലും ഭീകരാക്രമണങ്ങൾ വർധിച്ച സാഹചര്യത്തിലുമാണ് പാക് ഭരണകൂടത്തിന്റെ ഈ വൻ സൈനിക നീക്കം. പെഷവാർ, കൊഹാട്, ബന്നു, ദേരാ ഇസ്മായിൽ ഖാൻ തുടങ്ങിയ പ്രധാന നഗരങ്ങളിലാണ് ആദ്യ ഘട്ടത്തിൽ സംയുക്ത സുരക്ഷാ സേനയുടെ റെയ്ഡുകളും മിന്നൽ പരിശോധനകളും നടക്കുക. പ്രവിശ്യാ തലസ്ഥാനമായ പെഷവാറിൽ വലിയ തോതിലുള്ള പരിശോധനകൾക്കാണ് ഏജൻസികൾ തയ്യാറെടുക്കുന്നത്.
അനധികൃതമായി താമസിക്കുന്നവരെ കണ്ടെത്താൻ നടത്തുന്ന ഈ കടുത്ത നടപടി അഫ്ഗാൻ വംശജരുടെ വ്യാപാര സ്ഥാപനങ്ങളിലേക്കും, അഫ്ഗാൻ പൗരന്മാരുമായി കുടുംബബന്ധമുള്ള പാകിസ്ഥാൻ പൗരന്മാരിലേക്കും നീളും. തലമുറകളായി അതിർത്തി ഇരുവശത്തുമായി കഴിയുന്ന സാധാരണക്കാരെയും കുടുംബങ്ങളെയും പരിശോധനയുടെ പേരിൽ സുരക്ഷാ സേന വേട്ടയാടുമോ എന്ന ആശങ്കയും പ്രദേശത്ത് ശക്തമാണ്.
അതിർത്തിയിലെ ക്രമസമാധാന നില തകർന്നുവെന്നും ഭീകരവാദം തടയുന്നതിൽ പ്രവിശ്യാ ഭരണകൂടം പരാജയപ്പെട്ടുവെന്നും ആരോപിച്ചാണ് ഒക്ടോബർ 11-ന് പാകിസ്ഥാൻ പ്രസിഡന്റ് ആസിഫ് അലി സർദാരി ഖൈബർ പഖ്തുൻഖ്വയിൽ അടിയന്തരാവസ്ഥയും ഗവർണർ ഭരണവും ഏർപ്പെടുത്തിയത്. പ്രധാനമന്ത്രി ഷെഹ്ബാസ് ഷെരീഫിന്റെ നിർദേശപ്രകാരം ഭരണഘടനയുടെ 232, 234 വകുപ്പുകൾ പ്രകാരമായിരുന്നു ഈ നടപടി.
ഇതോടെ, ജയിലിൽ കഴിയുന്ന മുൻ പ്രധാനമന്ത്രി ഇമ്രാൻ ഖാന്റെ പാർട്ടിയായ പാകിസ്ഥാൻ തെഹ്രീകെ ഇൻസാഫിന്റെ (PTI) നേതൃത്വത്തിലുള്ള പ്രവിശ്യാ സർക്കാരിനെ പുറത്താക്കുകയും ഭരണാധികാരം ഗവർണർ ഫൈസൽ കരീം കുന്ദിക്ക് കൈമാറുകയും ചെയ്തു. ക്രമസമാധാന പാലനത്തിനായി പ്രവിശ്യയിൽ പാക് സൈന്യത്തെയും വിന്യസിച്ചിട്ടുണ്ട്.
എന്നാൽ, ഈ നീക്കം രാഷ്ട്രീയ പകപോക്കലാണെന്നാണ് ഇമ്രാൻ ഖാന്റെ പാർട്ടി ആരോപിക്കുന്നത്. ഇമ്രാൻ ഖാന്റെ മോചനമാവശ്യപ്പെട്ട് അനുഭാവികൾ ഇസ്ലാമാബാദിലേക്ക് നടത്താനിരുന്ന വൻ പ്രതിഷേധ മാർച്ച് തടയാനും പ്രവിശ്യയിലെ പി.ടി.ഐ സ്വാധീനം തകർക്കാനുമാണ് കേന്ദ്ര സർക്കാർ അടിയന്തരാവസ്ഥ പ്രഖ്യാപിച്ചതെന്ന് പാർട്ടി കുറ്റപ്പെടുത്തി. ഫെഡറൽ സർക്കാരിന്റെ നിർബന്ധിത ഏറ്റെടുക്കലിനെതിരെ പി.ടി.ഐ പെഷവാർ ഹൈക്കോടതിയെ സമീപിച്ചിട്ടുമുണ്ട്.
അഫ്ഗാൻ പൗരന്മാർക്കെതിരായ റെയ്ഡ് രാഷ്ട്രീയ എതിരാളികളെയും വിമർശകരെയും അടിച്ചമർത്താൻ കേന്ദ്ര സർക്കാർ ആയുധമാക്കുമെന്നും ഭയപ്പെടുന്നുണ്ട്. പ്രദേശത്തെ ഖനികൾ, ധാതുക്കൾ, മറ്റ് സ്വാഭാവിക വിഭവങ്ങൾ എന്നിവയുടെ മേലുള്ള പ്രവിശ്യാ സർക്കാരിന്റെ അധികാരം കവരാൻ അടിയന്തരാവസ്ഥ വഴിവെക്കുമെന്നും രാഷ്ട്രീയ നിരീക്ഷകർ ചൂണ്ടിക്കാണിക്കുന്നു.
പാക് സേനാ തലവൻ ആസിം മുനീറിന്റെ നേതൃത്വത്തിൽ 2023 ഒക്ടോബറിലാണ് അഫ്ഗാൻ അഭയാർത്ഥികളെ തിരികെ അയക്കാനുള്ള നീക്കം ആരംഭിച്ചത്. ഇതിനകം 25 ലക്ഷത്തിലധികം അഫ്ഗാൻ പൗരന്മാരാണ് പാകിസ്ഥാനിൽ നിന്ന് തിരികെ പോയത്. അതിർത്തി തർക്കങ്ങളും ഭീകരാക്രമണങ്ങളും കാരണം ഇരു രാജ്യങ്ങളും തമ്മിലുള്ള ബന്ധം കൂടുതൽ വഷളായ സാഹചര്യത്തിലാണ് ഇപ്പോൾ അടിയന്തരാവസ്ഥയുടെ മറവിൽ അഫ്ഗാൻ പൗരന്മാർക്കെതിരായ നടപടി പാകിസ്ഥാൻ കൂടുതൽ കടുപ്പിക്കുന്നത്.
