ചണ്ഡീഗഢ്: പഞ്ചാബിൽ ലഹരിമാഫിയയുടെ അക്രമങ്ങളും ക്രമസമാധാന തകർച്ചയും രൂക്ഷമായിരിക്കെ ഭാര്യയോടൊപ്പം പാരീസിലേക്ക് ജന്മദിനാഘോഷ യാത്ര നടത്തി പഞ്ചാബ് മുഖ്യമന്ത്രി ഭഗവന്ത് മൻ. ലഹരി വിരുദ്ധ പ്രവർത്തകൻ പർവീന്ദർ സിംഗ് ഝോട്ട കൊല്ലപ്പെട്ടതിനെ തുടർന്ന് മാൻസയിൽ കടുത്ത ജനരോഷവും പ്രക്ഷോഭങ്ങളും പുകയുമ്പോഴാണ് മുഖ്യമന്ത്രിയുടെ ഈ വിദേശയാത്ര. ഭഗവന്ത് മന്നിന്റെ വിദേശയാത്രയെ കടുത്ത ഭാഷയിൽ വിമർശിച്ച് ബിജെപി ദേശീയ നേതാവ് മഞ്ജീന്ദർ സിംഗ് സിർസ രംഗത്തെത്തി.
പഞ്ചാബിലെ ജനങ്ങൾ കടുത്ത ഭീതിയിലും ആശങ്കയിലും കഴിയുമ്പോൾ മുഖ്യമന്ത്രി ടാക്സ് പണമുപയോഗിച്ച് പാരിസിൽ ജന്മദിനം ആഘോഷിക്കുകയാണെന്ന് വിഡിയോ സന്ദേശത്തിൽ സിർസ ആരോപിച്ചു. ലഹരി വിരുദ്ധ പ്രവർത്തകരെ പകൽവെളിച്ചത്തിൽ ലഹരി മാഫിയ വെടിവെച്ചു കൊല്ലുകയാണ്. എന്നാൽ കൊല്ലപ്പെട്ട പർവീന്ദർ സിംഗിന്റെ കുടുംബത്തെ സന്ദർശിക്കാനോ മാൻസയിലെ സ്ഥിതിഗതികൾ ശാന്തമാക്കാനോ മുതിരാതെയാണ് മൻ ഭാര്യയോടൊപ്പം പാരിസിലേക്ക് പറന്നത്. പാരിസിൽ നടക്കുന്ന ‘സിയാൽ പാരിസ് 2026’ ഫുഡ് എക്സിബിഷനിൽ മാർക്ക്ഫെഡ് (MARKFED) സ്റ്റാൾ ഇട്ടിട്ടുണ്ടെന്നും അത് സന്ദർശിക്കാനാണ് യാത്രയെന്നുമാണ് നൽകുന്ന വിശദീകരണം. എന്നാൽ ഫ്രഞ്ച് സർക്കാരിന്റെ ഔദ്യോഗിക ക്ഷണമില്ലാതെ, സ്വന്തം നികുതിദായകരുടെ പണം ചെലവഴിച്ച് മുഖ്യമന്ത്രിയും ഭാര്യയും എന്തിനാണ് ഇത്തരമൊരു യാത്ര നടത്തുന്നതെന്ന് സിർസ ചോദിച്ചു.
അതിനിടെ, സുരക്ഷാ കാരണങ്ങളും ഔദ്യോഗിക ക്ഷണമില്ലെന്ന കാര്യവും ചൂണ്ടിക്കാട്ടി ഭഗവന്ത് മന്നിന്റെ ഫ്രാൻസ് യാത്രയ്ക്ക് കേന്ദ്ര വിദേശകാര്യ മന്ത്രാലയം രാഷ്ട്രീയ അനുമതി (Political Clearance) നിഷേധിച്ചിരുന്നു. എന്നാൽ ഇതിനെതിരെ പഞ്ചാബ് സർക്കാർ സമർപ്പിച്ച ഹർജിയിൽ പഞ്ചാബ്-ഹരിയാന ഹൈക്കോടതി ഒക്ടോബർ 15 മുതൽ 21 വരെയുള്ള യാത്രയ്ക്ക് അനുമതി നൽകുകയായിരുന്നു. യാത്രയുടെ സമ്പൂർണ ചെലവ് മാർക്ക്ഫെഡ് ആണ് വഹിക്കുന്നതെന്ന് സർക്കാർ കോടതിയെ അറിയിച്ചിരുന്നു.
ലഹരി മാഫിയയുടെ കടുത്ത ആക്രമണങ്ങളാണ് അടുത്തിടെ പഞ്ചാബിൽ നടന്നത്. ലഹരി മരുന്ന് വിൽപ്പന ചോദ്യം ചെയ്തതിനാണ് മാൻസയിൽ വെച്ച് പർവീന്ദർ സിംഗ് ഝോട്ട വെടിയേറ്റു കൊല്ലപ്പെട്ടത്. മൃതദേഹം സംസ്കരിക്കാൻ പോലും വിസമ്മതിച്ച് കുടുംബാംഗങ്ങളും നാട്ടുകാരും ശക്തമായ പ്രക്ഷോഭത്തിലാണ്. ഇതിനുപുറമേ മറ്റൊരു ലഹരി ആക്രമണത്തിൽ ബികരംജിത് സിംഗ് കൊല്ലപ്പെട്ടതിലും, ലഹരി ലഭ്യതയ്ക്കെതിരെ ശബ്ദമുയർത്തിയ ഗുൽസാർ സിംഗിന്റെ ദുരൂഹ ആത്മഹത്യയിലും കേന്ദ്ര ആഭ്യന്തര മന്ത്രാലയം പഞ്ചാബ് സർക്കാരിനോട് അടിയന്തര റിപ്പോർട്ട് തേടിയിട്ടുണ്ട്. സംസ്ഥാനത്ത് ക്രമസമാധാനം പൂർണമായും തകർന്ന സാഹചര്യത്തിൽ ആം ആദ്മി പാർട്ടിക്കും ഭഗവന്ത് മന്നിനുമെതിരെ രാഷ്ട്രീയ നീക്കം ശക്തമാക്കാനാണ് ബിജെപിയുടെ തീരുമാനം.
