ദീപാവലി ആഘോഷങ്ങൾക്ക് മുന്നോടിയായി രാജ്യതലസ്ഥാനത്തും സമീപ പ്രദേശങ്ങളിലും വായുനിലവാരം അതിതീവ്രമായി മോശമായതിനെ തുടർന്ന് കേന്ദ്ര വായുനിലവാര മാനേജ്‌മെന്റ് കമ്മീഷൻ മൂന്നാം ഘട്ട ഗ്രാപ്പ് (GRAP-III) നിയന്ത്രണങ്ങൾ ഏർപ്പെടുത്തി. ഡൽഹിയിലെ ശരാശരി വായു ഗുണനിലവാര സൂചിക (AQI) 400-ന് മുകളിലെത്തി ‘കഠിനമായ’ വിഭാഗത്തിലേക്ക് താഴ്ന്നതോടെയാണ് നിർണ്ണായക നീക്കം. ജനങ്ങളുടെ ആരോഗ്യം മുൻനിർത്തിയും വായുമലിനീകരണം കൂടുതൽ സങ്കീർണ്ണമാകുന്നത് തടയാനുമാണ് ജി.ആർ.എ.പി (Graded Response Action Plan) പ്രകാരമുള്ള കർശന നിയന്ത്രണങ്ങൾ ഉടനടി നടപ്പിലാക്കാൻ അധികൃതർ ഉത്തരവിട്ടത്.
പുതിയ നിയന്ത്രണങ്ങൾ നിലവിൽ വന്നതോടെ ഡൽഹി, ഗുരുഗ്രാം, ഫരീദാബാദ്, ഗാസിയാബാദ്, നോയിഡ എന്നിവിടങ്ങളിൽ അത്യാവശ്യമല്ലാത്ത എല്ലാത്തരം നിർമ്മാണ, പൊളിക്കൽ പ്രവർത്തനങ്ങൾക്കും പൂർണ്ണ നിരോധനം ഏർപ്പെടുത്തി. റെയിൽവേ, മെട്രോ, പ്രതിരോധം, ആശുപത്രി എന്നിവയുമായി ബന്ധപ്പെട്ട പൊതുനിർമ്മാണ പ്രവർത്തനങ്ങൾക്ക് മാത്രമാണ് ഇളവുകൾ അനുവദിച്ചിട്ടുള്ളത്. കൂടാതെ ബി.എസ് 3 പെട്രോൾ, ബി.എസ് 4 ഡീസൽ നാലും അതിൽ കൂടുതലും ചക്രങ്ങളുള്ള സ്വകാര്യ വാഹനം ഓടിക്കുന്നതിനും എൻ.സി.ആർ മേഖലയിൽ വിലക്ക് ഏർപ്പെടുത്തിയിട്ടുണ്ട്. റോഡുകളിലെ പൊടിപടലങ്ങൾ കുറയ്ക്കുന്നതിനായി യന്ത്രങ്ങൾ ഉപയോഗിച്ചുള്ള ശുചീകരണവും ജലസേചനവും ശക്തമാക്കി.
പ്രാഥമിക വിദ്യാലയങ്ങളിലെ വിദ്യാർത്ഥികൾക്ക് നേരിട്ടുള്ള ക്ലാസുകൾ ഒഴിവാക്കി ഓൺലൈൻ പഠനരീതിയിലേക്ക് മാറാൻ സ്‌കൂളുകൾക്ക് സർക്കാർ നിർദ്ദേശം നൽകി. കല്ലുടക്കുന്ന ക്രഷറുകൾ, ഖനന പ്രവർത്തനങ്ങൾ, മലിനീകരണം ഉണ്ടാക്കുന്ന വ്യവസായശാലകൾ എന്നിവയുടെ പ്രവർത്തനവും താൽക്കാലികമായി നിർത്തിവെപ്പിച്ചു. നിയമലംഘനം നടത്തുന്ന വാഹനങ്ങൾക്കും സ്ഥാപനങ്ങൾക്കും എതിരെ വൻതുക പിഴ ചുമത്താൻ പ്രത്യേക പരിശോധനാ സംഘങ്ങളെയും നിയോഗിച്ചിട്ടുണ്ട്. വായുനിലവാരം മെച്ചപ്പെടുന്നതുവരെ പൊതുജനങ്ങൾ പരമാവധി പൊതുഗതാഗത സംവിധാനങ്ങൾ ഉപയോഗിക്കണമെന്ന് അധികൃതർ അഭ്യർത്ഥിച്ചു.
