തിരുവനന്തപുരം: ബജറ്റ് അവതരണ ദിനമായ നാളെ കെ.എം മാണിക്കെതിരെ പ്രതിഷേധവുമായി ഇടതു മുന്നണിയും യുവമോര്‍ച്ചയും നിയമസഭ വളയും . ഇന്ന് രാത്രിമുതല്‍ നിയമസഭ വളയാനാണ് തീരുമാനം. പാളയം ,യുദ്ധസ്മാരകം എന്നിവിടങ്ങളില്‍ നിയമസഭയിലേയ്ക്കുള്ള വഴി ഉപരോധിക്കാനാണ് എല്‍ഡിഎഫ് തീരുമാനം.
കെ.എം മാണി ഉള്‍പ്പടെ എല്ലാ ഭരണകക്ഷി എംഎല്‍എമാരും, പ്രതിപക്ഷ എംഎല്‍എമാരും നിയമസഭയ്ക്കകത്ത് തന്നെ തുടരുകയാണ്. മുഖ്യമന്ത്രി ഉമ്മന്‍ചാണ്ടി, പ്രതിപക്ഷ നേതാവ് വി.എസ് അച്യുതാനന്ദന്‍ എന്നിവരെല്ലാം നിയമസഭയില്‍ തന്നെ തുടരുകയാണ്.
നിയമസഭക്കു മുന്നില്‍ ഉപരോധിക്കേണ്ട പാതകളെ കുറിച്ച് പാര്‍ട്ടികള്‍ തമ്മില്‍ ധാരണയായിട്ടുണ്ട്. ജനജീവിതം സ്തംഭിപ്പിച്ചുകൊണ്ട് കെ.എം.മാണിയെ ഉപരോധിക്കേണ്ടതില്ലെന്നാണ് എല്‍ഡിഎഫിന്റെ തീരുമാനം. എല്ലാ പാതകളും ഉപരോധിക്കാനായിരുന്നു നേരത്തെ തീരുമാനം. നിയമസഭയിലേക്കുള്ള അഞ്ച് കവാടങ്ങളും ഇടതുമുന്നണി പ്രവര്‍ത്തകര്‍ ഉപരോധിക്കും. എന്നാല്‍ പൊലീസ് സഹായത്തോടെ മാണി സഭയിലെത്തിയാല്‍ വി.എസിന്റെയും കോടിയേരിയുടെയും നേതൃത്വത്തില്‍ തടയാനാണ് നീക്കം. മാധ്യമപ്രവര്‍ത്തകര്‍ക്കും നിയമസഭയിലേക്ക് പ്രവേശനം നിഷേധിച്ചിരിക്കുകയാണ്.
നിയമസഭയിലേക്കുള്ള റോഡുകള്‍ ഉപരോധിക്കുമെന്ന് യുവമോര്‍ച്ചയും അറിയിച്ചിട്ടുണ്ട്. ഇന്ന് വൈകിട്ടു മുതല്‍ സഭയ്ക്ക് ചുറ്റുമുള്ള റോഡുകള്‍ വളയുമെന്ന് യുവമോര്‍ച്ച അറിയിച്ചു.അതേസമയം സമരക്കാരെ തടയാന്‍ കടുത്ത സന്നാഹങ്ങളാണ് പോലീസ് ഒരുക്കുന്നത്. അഞ്ച് എസ്.പി മാരുടെ നേതൃത്വത്തില്‍ രണ്ടായിരത്തിലധികം പോലീസുകാര്‍ കെ.എം മാണിക്ക് സുരക്ഷയൊരുക്കും.
Discussion about this post