ലക്‌നൗ: യുപി നിയമസഭ തെരഞ്ഞെടുപ്പില്‍ ബിജെപി കൃത്രിമത്വം കാട്ടിയെന്ന ആരോപണവുമായി ബിഎസ്പി നേതാവ് മായാവതി രംഗത്ത്. ഇലക്ട്രോണിക് വോട്ടിങ്ങ് മെഷീനുകളില്‍ അട്ടിമറി നടത്തിയാണ് ബിജെപി വോട്ടുകള്‍ കരസ്ഥമാക്കിയതെന്നാണ് മായവതിയുടെ ആരോപണം. തെരഞ്ഞെടുപ്പ് ഫലങ്ങള്‍ പുറത്തുവന്നതിന് പിന്നാലെ ലഖ്‌നൗവില്‍ മാധ്യമപ്രവര്‍ത്തകരെ അഭിസംബോധന ചെയ്യവെയാണ് മായാവതിയുടെ ആരോപണങ്ങള്‍.
ഇലക്ട്രോണിക് വോട്ടിങ് മെഷീനുകളില്‍ ബിജെപി അട്ടിമറി നടത്തി. ഏത് പാര്‍ട്ടിക്ക് വോട്ടുചെയ്താലും അതെല്ലാം ബിജെപിക്ക് രേഖപ്പെടുത്തുന്ന രീതിയിലാണ് വോട്ടിങ്‌മെഷീനുകള്‍ ക്രമീകരിച്ചിരുന്നതെന്നും മായാവതി പറഞ്ഞു. മറ്റ് പാര്‍ട്ടികള്‍ക്ക് രേഖപ്പെടുത്തിയ വോട്ടുകള്‍ യന്ത്രത്തില്‍ രേഖപ്പെടുത്തിയില്ല. അല്ലെങ്കില്‍ മറ്റ് പാര്‍ട്ടികള്‍ക്ക് രേഖപ്പെടുത്തിയ വോട്ടുകള്‍ കൂടി ബി.ജെ.പിക്ക് ലഭിച്ചു. ഇപ്രകാരമാണ് വോട്ടിംഗ് മെഷീനില്‍ കൃത്രിമം നടന്നതെന്ന് മായാവതി ആരോപിച്ചു.
മുസ്ലിം ഭൂരിപക്ഷ പ്രദേശങ്ങളിലെ നിയമസഭാ മണ്ഡലങ്ങളില്‍ ബിജെപിക്കാണ് കൂടുതല്‍ വോട്ടുകള്‍ കിട്ടിയിരിക്കുന്നത്. ഇത് അട്ടിമറി നടന്നുവെന്നതിന്റെ തെളിവാണെന്നും അന്വേഷണം വേണമെന്നും മായാവതി ആരോപിച്ചു. തെരഞ്ഞെടുപ്പ് റദ്ദാക്കുകയാണ് വേണ്ടത്. തെരഞ്ഞെടുപ്പ് കമ്മീഷന് ഇക്കാര്യങ്ങള്‍ ചൂണ്ടിക്കാണിച്ച് പരാതി നല്‍കും. ജനങ്ങള്‍ക്ക് ഇലക്ട്രോണിക് വോട്ടിങ് മെഷീനിലുളള വിശ്വാസം നഷ്ടമായി. ഇനി വരുന്ന തെരഞ്ഞെടുപ്പില്‍ ഇലക്ട്രോണിക് വോട്ടിങ് മെഷീന്‍ ഉപയോഗിക്കരുതെന്ന് തെരഞ്ഞെടുപ്പ് കമ്മീഷനോട് ആവശ്യപ്പെടുമെന്നും അവര്‍ പറഞ്ഞു.
തെരഞ്ഞെടുപ്പ് റദ്ദാക്കി ബാലറ്റ് പേപ്പര്‍ ഉപയോഗിച്ച് തെരഞ്ഞെടുപ്പ് നടത്തണമെന്നും മായാവതി ആവശ്യപ്പെട്ടു. ഇലക്ട്രോണിക് വോട്ടിംഗ് മെഷീനുകള്‍ വിശ്വാസയോഗ്യമല്ലെന്ന് തിരിച്ചറിഞ്ഞ് അമേരിക്കയില്‍ പോലും ബാലറ്റ് പേപ്പറാണ് ഉപയോഗിക്കുന്നത്. യു.പിയില്‍ കാണിച്ച കൃത്രിമം പഞ്ചാബില്‍ ചെയ്യാതിരുന്നതിനാലാണ് അവിടെ കോണ്‍ഗ്രസ് വിജയിച്ചതെന്നും മായാവതി ആരോപിച്ചു.
ബി.ജെ.പി വിജയിച്ച ഉത്തരാഖണ്ഡിലും വോട്ടിംഗ് മെഷീനില്‍ കൃത്രിമം നടന്നു. തെരഞ്ഞെടുപ്പ് റദ്ദാക്കണമെന്ന് ആവശ്യപ്പെട്ട് തെരഞ്ഞെടുപ്പ് കമ്മീഷന് താന്‍ കത്ത് നല്‍കിയിട്ടുണ്ടെന്നും മായാവതി കൂട്ടിച്ചേര്‍ത്തു. യു.പിയില്‍ എണ്‍പതോളം സീറ്റുകളുണ്ടായിരുന്ന ബി.എസ്.പി 19 സീറ്റുകളിലേക്ക് ഒതുങ്ങി.
പതിനഞ്ച് വര്‍ഷത്തിനുശേഷമാണ് ഉത്തര്‍പ്രദേശില്‍ ബിജെപി അധികാരത്തിലേക്ക് എത്തുന്നത്. ബിജെപിയുടെ മുന്നേറ്റത്തില്‍ തകര്‍ന്നടിഞ്ഞുപോയ മായാവതിയുടെ ബിഎസ്പിക്ക് 18 സീറ്റുകളില്‍ മാത്രമാണ് മുന്നേറ്റം ഉണ്ടാക്കാന്‍ കഴിഞ്ഞത്. എസ്പിയും കോണ്‍ഗ്രസുമുള്‍പ്പെടെയുളള സഖ്യവും തകര്‍ന്നടിഞ്ഞതിനാല്‍ വരുംദിവസങ്ങളില്‍ മായാവതിയുടെ ആരോപണം ഏറെ ചര്‍ച്ചയാകുമെന്നുറപ്പാണ്.
Discussion about this post