തിരുവനന്തപുരം: ബന്ധു നിയമന വിവാദം ചര്‍ച്ച ചെയ്യാനിരിക്കെ സിപിഎം കേന്ദ്ര കമ്മറ്റി യോഗത്തില്‍ ഇ.പി. ജയരാജന്‍ പങ്കെടുക്കില്ല. വിവാദത്തില്‍ ഇ.പി. ജയരാജന്റെയും പി.കെ. ശ്രീമതിയുടെയും ഭാഗം കേന്ദ്ര കമ്മറ്റി കേള്‍ക്കാനിരിക്കെയാണ് അദ്ദേഹം അവധിക്ക് അപേക്ഷ നല്‍കിയത്.
നേരത്തെ ഇക്കാര്യത്തില്‍ ഇരുവര്‍ക്കും വീഴ്ച പറ്റിയതായി സംസ്ഥാന ഘടകം വിലയിരുത്തിയിരുന്നു. ഇതേ വിലയിരുത്തല്‍ തന്നെയാണ് പോളിറ്റ് ബ്യൂറോയ്ക്കുമുള്ളത്. ഇത് സബന്ധിച്ച് വിശദമായ ചര്‍ച്ച ഇന്നത്തെ കേന്ദ്ര കമ്മറ്റിയില്‍ നടക്കും.
ജയരാജന്റെയും ശ്രീമതിയുടെയും ഭാഗത്തുനിന്നുള്ള വിശദീകരണം കേട്ടശേഷമായിരിക്കും ഇരുവര്‍ക്കുമെതിരായ നടപടി സംബന്ധിച്ച് തീരുമാനമെടുക്കുക. അദ്ദേഹത്തിന്റെ വിശദീകരണം എഴുതി നല്‍കാവുന്നതാണ്. അതേസമയം പി.കെ. ശ്രീമതി കേന്ദ്ര കമ്മറ്റിയില്‍ പങ്കെടുക്കുന്നുണ്ട്.
വിവാദം ഉണ്ടായ ഉടന്‍ ജയരാജന്‍ രാജിവെച്ചിരുന്നു. അതിനാല്‍ കടുത്ത നടപടി വേണ്ടെന്ന് നിലപാട് അംഗങ്ങളില്‍ ചിലര്‍ക്കുണ്ട്.
അതേസമയം കേന്ദ്ര കമ്മറ്റി അംഗങ്ങളായ രണ്ടു പേര്‍ക്ക് ജാഗ്രതക്കുറവുണ്ടായ സാഹചര്യത്തില്‍ കടുത്ത നടപടി വേണമെന്നും അഭിപ്രായവുമുണ്ട്. അതിനാല്‍ ഇരുവര്‍ക്കും ശാസനയോ താക്കീതോ ഉണ്ടായേക്കും.
Discussion about this post