തിരുവനന്തപുരം: കേന്ദ്രമന്ത്രി അല്‍ഫോന്‍സ്‌ കണ്ണന്താനത്തിന്റെ പ്രൈവറ്റ്‌ സെക്രട്ടറിയായി കോഴിക്കോട്‌ മുന്‍ കലക്‌ടര്‍ എന്‍. പ്രശാന്തിനെ നിയമിച്ചേക്കുമെന്ന് റിപ്പോര്‍ട്ട്. പ്രശാന്തിന്റെ സേവനം വിട്ടുനല്‍കാന്‍ പ്രധാനമന്ത്രിക്കു കണ്ണന്താനം കത്തു നല്‍കിയതായും സൂചനയുണ്ട്‌.
കോഴിക്കോട്‌ ജില്ലാ കലക്‌ടറായിരിക്കെ ജനങ്ങളുടെ മനംകവര്‍ന്ന പ്രശാന്തിനെ അവര്‍ “കലക്‌ടര്‍ ബ്രോ” എന്നാണു വിളിച്ചിരുന്നത്. ജനങ്ങളുമായി നേരിട്ടുള്ള ആശയവിനിമയത്തിനായി അദ്ദേഹം ഫേസ്‌ബുക്ക്‌ പേജും ആരംഭിച്ചിരുന്നു.
അതേസമയം പ്രശാന്തിനു കേന്ദ്ര ജോയിന്റ്‌ സെക്രട്ടറി പദവിയുള്ള പ്രൈവറ്റ്‌ സെക്രട്ടറി തസ്‌തികയില്‍ നിയമനം ലഭിക്കുമോ എന്ന സംശയം ഉയരുന്നുണ്ട്‌. രമേശ്‌ ചെന്നിത്തല ആഭ്യന്തരമന്ത്രിയായിരിക്കെ അദ്ദേഹത്തിന്റെ പ്രൈവറ്റ്‌ സെക്രട്ടറിയായി പ്രവര്‍ത്തിച്ചതും കണ്ണന്താനം നിര്‍ദേശിച്ച തസ്‌തിക ലഭിക്കുന്നതിനു തടസമായേക്കും. ഇക്കാര്യത്തില്‍ കണ്ണന്താനം ബി.ജെ.പി. സംസ്‌ഥാന നേതൃത്വത്തിന്റെ അനുവാദം തേടിയിരുന്നില്ലെന്ന ആരോപണവുമുണ്ട്‌.
രമേശ്‌ ചെന്നിത്തലയുടെ പ്രൈവറ്റ്‌ സെക്രട്ടറിയായിരിക്കെ 2015-ലാണ്‌ പ്രശാന്തിനെ കോഴിക്കോട്‌ കലക്‌ടറായി നിയമിച്ചത്‌. കോഴിക്കോട്‌ എം.പിയായ എം.കെ. രാഘവനുമായി പ്രശാന്ത്‌ ഇടഞ്ഞത്‌ ഏറെ വിവാദം സൃഷ്‌ടിച്ചിരുന്നു. പീന്നീട്‌ അദ്ദേഹത്തെ ഉന്നത വിദ്യാഭ്യാസ സെക്രട്ടറിയായി നിയമിച്ചെങ്കിലും ചുമതല ഏറ്റെടുക്കാതെ അവധിയില്‍ പോയി. ഐ.എ.എസ്. അസോസിയേഷന്‍ സെക്രട്ടറി കൂടിയാണു പ്രശാന്ത്‌.
Discussion about this post