കണ്ണൂര്‍ : ലോക്‌സഭ തെരഞ്ഞെടുപ്പില്‍ കണ്ണൂര്‍ ജില്ലയിലെ പിലാത്തറയില്‍ കള്ളവോട്ട് നടന്നെന്ന ദൃശ്യങ്ങള്‍ വ്യാജമല്ലെന്ന് കളക്ടര്‍ റിപ്പോര്‍ട്ട് സമര്‍പ്പിച്ചു. കണ്ണൂര്‍ കലക്ടര്‍ മിര്‍ മുഹമ്മദലി ആണ് തെരഞ്ഞെടുപ്പ് കമീഷന് റിപ്പോര്‍ട്ട് നല്‍കിയത്. കള്ളവോട്ട് നടന്നുവെന്ന് ആരോപണമുള്ള ബൂത്തിലുണ്ടായിരുന്ന പ്രിസൈഡിങ് ഓഫിസര്‍ അടക്കമുള്ള ഉദ്യോഗസ്ഥരെ കലക്ടര്‍ വിളിച്ചുവരുത്തി വിശദീകരണം തേടിയ ശേഷമാണ് റിപ്പോര്‍ട്ട് നല്‍കിയത്. പുറത്തുവന്ന ദൃശ്യങ്ങള്‍ വ്യാജമല്ലെന്ന് വെബ് ക്യാം ഓപറേറ്റര്‍ കലക്ടര്‍ക്ക് വിശദീകരണം നല്‍കിയിട്ടുണ്ട്.
അതേസമയം, കാസര്‍കോട് ജില്ലയിലെ കള്ളവോട്ട് സംബന്ധിച്ച റിപ്പോര്‍ട്ട് ജില്ലാകളക്ടര്‍ നല്കിയിട്ടില്ലെന്നാണ് സൂചന. കൂടുതല്‍ അന്വേഷണം നടത്തിയശേഷമേ റിപ്പോര്‍ട്ട് നല്‍കൂ എന്നാണ് കാസര്‍കോട് ജില്ല കലക്ടര്‍ ഡോ. ഡി. സജിത് ബാബു വ്യക്തമാക്കിയത്. സംഭവത്തില്‍ കൂടുതല്‍ അന്വേഷണം നടത്തേണ്ടതുണ്ടെന്നും വിഡിയോ ദൃശ്യങ്ങള്‍ പരിശോധിക്കും. കള്ളവോട്ട് നടന്നുവെന്ന് ആരോപണം ഉയര്‍ന്ന ബൂത്തുകളില്‍ ഡ്യൂട്ടിയില്‍ ഉണ്ടായിരുന്ന ഉദ്യോഗസ്ഥരില്‍നിന്ന് മൊഴിയെടുക്കുമെന്നും കളക്ടര്‍ അറിയിച്ചു.
കാസര്‍കോട് മണ്ഡലത്തില്‍പെട്ട കണ്ണൂര്‍ ചെറുതാഴം ഗ്രാമപഞ്ചായത്തിലെ പിലാത്തറ എ.യു.പി സ്‌കൂളിലെ 19ാം നമ്പര്‍ ബൂത്ത്, കാസര്‍കോട് കയ്യൂര്‍-ചീമേനി പഞ്ചായത്തിലെ കൂളിയാട് ഗവ. ഹൈസ്‌കൂളിലെ 48ാം നമ്പര്‍ ബൂത്ത് എന്നിവിടങ്ങളില്‍ കള്ളവോട്ട് ചെയ്യുന്നതിന്റെ വിഡിയോ ദൃശ്യങ്ങളാണ് ശനിയാഴ്ച പുറത്തുവന്നത്.
കലക്ടര്‍മാരുടെ റിപ്പോര്‍ട്ട് തിങ്കളാഴ്ച ലഭിക്കുമെന്ന് മുഖ്യ തെരഞ്ഞെടുപ്പ് കമീഷണര്‍ ടിക്കാറാം മീണ അറിയിച്ചു. കാസര്‍കോട്, കണ്ണൂര്‍ കലക്ടര്‍മാരോട് സമഗ്ര റിപ്പോര്‍ട്ടാണ് ആവശ്യപ്പെട്ടത്. ആരോപണങ്ങള്‍ ഗൗരവമായാണ് കാണുന്നതെന്ന് ടിക്കാറാം മീണ പറഞ്ഞു.
കള്ളവോട്ട് സംഭവത്തില്‍ നിയമനടപടികളുമായി പോകുമെന്ന് കോണ്‍ഗ്രസ് അറിയിച്ചു. എന്നാല്‍ കള്ളവോട്ടല്ല ചെയ്തത് ഓപണ്‍ വോട്ടാണെന്നായിരുന്നു സി.പി.എം പ്രതികരണം.
Discussion about this post