കോട്ടയം: ഗവര്‍ണര്‍ക്ക് പരാതി നല്‍കാനെത്തിയ വിദ്യാര്‍ത്ഥിയെ ബലം പ്രയോഗിച്ച് കസ്റ്റഡിയിലെടുത്ത് പോലിസ്. എം.ജി സര്‍വകലാശാല വി.സി സാബു തോമസിനെതിരെ പരാതി നല്‍കാനെത്തിയ ഗവേഷണ വിദ്യാര്‍ഥി ദീപ പി. മോഹനെയാണ് പാലീസ് കസ്റ്റഡിയിലെടുത്തത്. ദലിത് വിദ്യാര്‍ഥിയായതിനാല്‍ ഗവേഷണം പൂര്‍ത്തിയാക്കാന്‍ ലാബ് സൗകര്യം അടക്കമുള്ളവ വി.സി അനുവദിക്കില്ലെന്നാണ് ദീപയുടെ പരാതി.
പൊലീസ് ദീപയെ ബലം പ്രയോഗിച്ച് കസ്റ്റഡിലെടുത്ത് ഗാന്ധി നഗര്‍ സ്റ്റേഷനില്‍ കരുതല്‍ തടങ്കലിലാക്കുകയായിരുന്നു. സ്റ്റേഷനിലെത്തിയ ദീപയുടെ കൈക്ക് പിടിച്ച് വലിച്ചിഴച്ചിക്കുന്നതിന്റെയും തുടര്‍ന്ന് ദീപ അലമുറയിടുന്നതിന്റെയും ദൃശ്യങ്ങള്‍ പുറത്തുവന്നിട്ടുണ്ട്. എം.ജി വി.സി തന്നെ ദ്രോഹിക്കുകയാണെന്ന് ദീപ മാധ്യമങ്ങളോട് പറഞ്ഞു. ഗവര്‍ണറെ കാണാനായി കാത്തിരിക്കുമ്പോഴാണ് പൊലീസ് ബലം പ്രയോഗിച്ച് കസ്റ്റഡിയിലെടുത്തതെന്നും ദീപ വ്യക്തമാക്കി.
മാര്‍ക്ക്ദാന വിവാദത്തില്‍ കാര്യങ്ങള്‍ നേരിട്ട് മനസിലാക്കാന്‍ ഗവര്‍ണര്‍ ആരിഫ് മുഹമ്മദ് ഖാന്‍ നാനോ ടെക്‌നോളജി വകുപ്പില്‍ രഹസ്യ സന്ദര്‍ശനത്തിനായി എത്തിയിരുന്നു. ഇവിടെവെച്ച് ഗവര്‍ണര്‍ക്ക് പരാതി നല്‍കാനാണ് ദീപ എത്തിയത്.
Discussion about this post