തിരുവനന്തപുരം: രാഷ്ട്രീയ കേരളം ഉറ്റുനോക്കുന്ന വിവാദപരമായ മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റിന്റെ (ഇഡി) ശുപാർശ കത്തിന്മേൽ സംസ്ഥാന സർക്കാരിന്റെ അന്തിമ തീരുമാനം ഇന്നുണ്ടായേക്കും. കേസിൽ വിജിലൻസ് അന്വേഷണം പ്രഖ്യാപിക്കുന്നതിനായി പ്രത്യേക അന്വേഷണ സംഘത്തെ (SIT) രൂപീകരിക്കാനാണ് സർക്കാരിൽ ധാരണയായിരിക്കുന്നത്. അന്വേഷണ സ്വഭാവം നിർണ്ണയിക്കുന്നതിനായി മുഖ്യമന്ത്രിയും ആഭ്യന്തരമന്ത്രിയും തമ്മിൽ നടത്തുന്ന നിർണായക ചർച്ചയ്ക്ക് ശേഷമായിരിക്കും ഔദ്യോഗിക ഉത്തരവ് പുറത്തിറങ്ങുക.
സിഎംആർഎൽ – എക്സാലോജിക് ഇടപാടുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയൻ, മകൾ വീണ വിജയൻ, മുൻ മന്ത്രി പി.എ. മുഹമ്മദ് റിയാസ് തുടങ്ങിയവർക്കെതിരെ അഴിമതി നിരോധന നിയമപ്രകാരം കേസെടുത്ത് അന്വേഷണം നടത്തണമെന്നായിരുന്നു ഇഡി സംസ്ഥാന പോലീസ് മേധാവിക്ക് നൽകിയ കത്തിലെ നിർദ്ദേശം. ഇതിന്റെ അടിസ്ഥാനത്തിൽ ലഭിച്ച നിയമോപദേശത്തിൽ അഴിമതി നിരോധന വകുപ്പുകൾ പ്രകാരവും വരവിൽ കവിഞ്ഞ സ്വത്ത് സമ്പാദനത്തിനും കേസെടുക്കാമെന്ന് വ്യക്തമാക്കുന്നുണ്ട്. എജി നൽകിയ നിയമോപദേശമടങ്ങിയ ഫയൽ ആഭ്യന്തര സെക്രട്ടറി ആഭ്യന്തരമന്ത്രിക്ക് കൈമാറിയിട്ടുണ്ട്.
ചെയ്യാത്ത സേവനത്തിനാണ് എക്സാലോജിക് കമ്പനിക്ക് തുക കൈമാറിയതെന്നും, ഇത് മൂന്നാം കക്ഷി വഴി പൊതുപ്രവർത്തകൻ വാങ്ങിയ കൈക്കൂലിയായി കണക്കാക്കാമെന്നും എജിയുടെ നിയമോപദേശത്തിൽ വ്യക്തമാക്കുന്നു.2018-ലെ അഴിമതി നിരോധന നിയമഭേദഗതിക്ക് മുൻപും ശേഷവും പണമിടപാടുകൾ നടന്നിട്ടുള്ളതിനാൽ രണ്ടു കാലഘട്ടത്തിലെയും വകുപ്പുകൾ ചുമത്തി അന്വേഷണം നടത്താമെന്നാണ് വിലയിരുത്തൽ. ഇഡിയുടെ കത്തിന്റെ അടിസ്ഥാനത്തിൽ പ്രാഥമിക അന്വേഷണമോ (Quick Verification) അല്ലെങ്കിൽ എഫ്ഐആർ രജിസ്റ്റർ ചെയ്ത് നേരിട്ടുള്ള അന്വേഷണമോ പ്രഖ്യാപിക്കാനാണ് സർക്കാർ ആലോചിക്കുന്നത്. ഉന്നത പോലീസ് ഉദ്യോഗസ്ഥരെ ഉൾപ്പെടുത്തി പ്രത്യേക സംഘത്തെ നിയോഗിച്ചുകൊണ്ട് അടിയന്തര നടപടികളിലേക്ക് കടക്കാനാണ് നീക്കം.
