ഡൽഹി: രാജ്യത്തെ സർവ്വകലാശാലകളെ നശിപ്പിക്കാനുള്ള നീക്കം ഒരു തരത്തിലും അംഗീകരിക്കാനാവില്ലെന്ന് കേന്ദ്ര മാനവ വിഭവശേഷി വികസന വകുപ്പ് മന്ത്രി രമേശ് പൊഖ്രിയാൽ നിശാങ്ക്. ജവഹർലാൽ നെഹ്രു സർവ്വകലാശാലയും ജാമിയ മില്ലിയയുമൊക്കെ നല്ല രീതിയിൽ പ്രവർത്തിച്ചു വരുന്ന സ്ഥാപനങ്ങളാണ്. ഇവയെ നശിപ്പിക്കാനുള്ള ചിലരുടെ നീക്കങ്ങൾ ഒരു തരത്തിലും അനുവദിക്കപ്പെടില്ലെന്ന് അദ്ദേഹം വ്യക്തമാക്കി.
കഴിഞ്ഞ ഡിസംബർ മാസം 15ന് ജാമിയ മില്ലിയ സർവ്വകലാശാലയിൽ നടന്ന അനിഷ്ട സംഭവങ്ങളുടെ വീഡിയോകൾ സാമൂഹിക മാദ്ധ്യമങ്ങളിൽ പ്രചരിക്കുന്നത് ശ്രദ്ധയിൽ പെട്ടപ്പോഴായിരുന്നു മന്ത്രിയുടെ പ്രതികരണം. സമരം നടക്കുന്നതിനിടെ ചിലർ പൊലീസിന് നേരെ കല്ലെറിയുന്നതും വാഹനങ്ങൾ അഗ്നിക്കിരയാക്കുന്നതും ദൃശ്യങ്ങളിലുണ്ട്. തുടർന്ന് ചിലർ സർവ്വകലാശാലയിലേക്ക് കയറി പോകുന്നതും ചിലരെ പൊലീസ് സർവ്വകലാശാല ലൈബ്രറിക്കുള്ളിൽ കടന്ന് മർദ്ദിക്കുന്നതും ദൃശ്യങ്ങളിൽ വ്യക്തമാണ്.
Discussion about this post