ഡൽഹി: ലഡാക്കിൽ ചൈനയുടെ കടന്നു കയറ്റം ചെറുക്കുന്നതിനിടെ വീരമൃത്യു വരിച്ച സൈനികർക്ക് ഡി ആർ ഡി ഓയുടെ ആദരം. ഡൽഹിയിൽ സജ്ജമാക്കുന്ന സർദാർ പട്ടേൽ കൊവിഡ് 19 സ്പെഷ്യാലിറ്റി ആശുപത്രിക്ക് ജൂൺ 15 സംഘർഷത്തിൽ വീരമൃത്യു വരിച്ച സൈനികരുടെ പേര് നൽകും.
ജൂൺ 15ന് ഗാല്വൻ താഴ്വരയിലുണ്ടായ സംഘർഷത്തിൽ വീരമൃത്യു വരിച്ച കേണൽ ബി സന്തോഷ് ബാബുവിന്റെ പേരിലായിരിക്കും ആശുപത്രിയുടെ തീവ്രപരിചരണ വിഭാഗവും വെന്റിലേറ്റർ വാർഡുകളും അറിയപ്പെടുക. കേന്ദ്ര ആഭ്യന്തരമന്ത്രി അമിത് ഷായും രാജ്യരക്ഷാ വകുപ്പ് മന്ത്രി രാജ്നാഥ് സിംഗും ചേർന്ന് ഞായറാഴ്ച ആശുപത്രി ജനങ്ങൾക്ക് സമർപ്പിക്കും.
മുഴുവൻ വാർഡുകളും എയർ കണ്ടീഷൻ സംവിധാനത്തിൽ പ്രവർത്തിക്കുന്ന ആശുപത്രിയിൽ ആയിരം കിടക്കകൾ ഉണ്ടായിരിക്കും. പ്രത്യേക തീവ്രപരിചരണ വിഭാഗം മുഴുവൻ സമയവും ആശുപത്രിയിൽ പ്രവർത്തിക്കും.
അതേസമയം പ്രധാനമന്ത്രി നരേന്ദ്ര മോദിയുടെ അപ്രതീക്ഷിത ലഡാക്ക് സന്ദർശനം ചൈനയ്ക്ക് കനത്ത ആഘാതമായതായാണ് വിലയിരുത്തൽ. അധിനിവേശത്തിന്റെ കാലഘട്ടം അവസാനിച്ചുവെന്നും ഇന്ത്യൻ സായുധ സേനകളുടെ ആഗ്നേയ ശൗര്യം ശത്രുക്കൾക്ക് ബോദ്ധ്യപ്പെട്ടുവെന്നും അദ്ദേഹം പ്രഖ്യാപിച്ചിരുന്നു.
