ഡൽഹി: രാജസ്ഥാനിൽ രാഷ്ട്രീയ പ്രതിസന്ധി രൂക്ഷമായി തുടരവെ സിബിഐ അന്വേഷണത്തിന് സർക്കാരിനെ വെല്ലുവിളിച്ച് ബിജെപി. കോൺഗ്രസ്സ് പാർട്ടിക്കുള്ളിലെ തമ്മിലടിയും അധികാര തർക്കവും കൊഴുപ്പിക്കാൻ ബിജെപിയുടെ പേര് ദുരുപയോഗം ചെയ്യാൻ അനുവദിക്കില്ലെന്നും ബിജെപി വക്താവ് സംബിത് പത്ര വ്യക്തമാക്കി.
എം എൽ എമാരെ സ്വാധീനിക്കാൻ ബിജെപി ശ്രമിച്ചു എന്നതിന് തെളിവായി കോൺഗ്രസ്സ് പ്രചരിപ്പിക്കുന്ന ഫോൺ സംഭാഷണങ്ങളുടെ ആധികാരികത കേന്ദ്ര ഏജൻസിയെക്കൊണ്ട് തെളിയിക്കാൻ സർക്കാർ തയ്യാറാകണം. ഇനി ഫോൺ കോൾ വസ്തുതാപരമാണെങ്കിൽ തന്നെ ഏത് സാഹചര്യത്തിലാണ് അത് ചോർത്താൻ ഇടവന്നതെന്നും സർക്കാർ വിശദീകരിക്കണമെന്നും ബിജെപി ആവശ്യപ്പെട്ടു.
ഫോൺ വിവാദവുമായി ബന്ധപ്പെട്ട് കേന്ദ്ര മന്ത്രിക്കും ബിജെപി എം എൽ എമാർക്കും എതിരെ സ്വീകരിച്ചിരിക്കുന്ന നടപടികൾ നിയമപരമായി നിലനിൽക്കില്ലെന്നും സംസ്ഥാനത്തെ രാഷ്ട്രീയ അസ്ഥിരതയ്ക്ക് ഉടൻ പരിഹാരം കാണണമെന്നും ബിജെപി വ്യക്തമാക്കി. മുഖ്യമന്ത്രി അശോക് ഗെഹ്ലോട്ടും യുവനേതാവ് സച്ചിൻ പൈലറ്റും തമ്മിൽ ഉടലെടുത്ത തർക്കങ്ങളിൽ ആടിയുലയുന്ന രാജസ്ഥാൻ സർക്കാർ, ബിജെപി ഉയർത്തുന്ന ആവശ്യങ്ങൾക്ക് മുന്നിൽ പതറുകയാണ്.
