ന്യൂഡൽഹി : വിദ്യാഭ്യാസത്തെ ക്ലാസ്സ് റൂമിലെ ചുവരുകൾക്കുള്ളിലൊതുക്കാതെ പുറം ലോകവുമായി ബന്ധിപ്പിക്കുന്ന രീതിയിലുള്ളതാക്കണമെന്ന് പ്രധാനമന്ത്രി നരേന്ദ്രമോദി. കേന്ദ്ര വിദ്യാഭ്യാസ വകുപ്പ് സംഘടിപ്പിച്ച ‘ശിക്ഷ പർവ്’ എന്ന കോൺക്ലേവിൽ ജനങ്ങളെ അഭിസംബോധന ചെയ്ത് സംസാരിക്കുമ്പോഴാണ് അദ്ദേഹം ഇക്കാര്യം വ്യക്തമാക്കിയത്.
2022-ഓടെ ദേശീയ വിദ്യാഭ്യാസ നയം മുന്നോട്ടു വെച്ചിട്ടുള്ള പുതിയ പാഠ്യപദ്ധതി എല്ലാ സ്കൂളുകളിലും നടപ്പിലാക്കുമെന്നും അദ്ദേഹം അറിയിച്ചു.ക്ലാസ്റൂമിന്റെ ചുവരുകൾക്കപ്പുറത്തെ ലോകത്തേക്ക് കുട്ടികളെ ബന്ധിപ്പിക്കുന്ന രീതിയിലുള്ളതാണ് പുതിയ പാഠ്യപദ്ധതിയെന്ന് മോദി വ്യക്തമാക്കി.2022 ആകുമ്പോഴേക്കും വിദ്യാർഥികൾ പുതിയ പാഠ്യപദ്ധതിയുടെ ഭാഗമാകും. ഇതിലൂടെ ഭാവിയിൽ വിമർശനാത്മക ചിന്ത, സർഗ്ഗാത്മകത എന്നിവയുള്ള കുട്ടികളെ വാർത്തെടുക്കാനും ഫലപ്രദമായി ആശയ വിനിമയം നടത്താൻ അവരെ പ്രാപ്തരാക്കാനും കഴിയും-പ്രധാനമന്ത്രി കൂട്ടിച്ചേർത്തു.
